Ẹsta 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹsta veri nẹ Ọye ra rẹ kẹ Ihwo rọye

¹ Ọke ri Modekai vwo nyo obo re ruru na, Modekai da bẹrẹ emwa rọye ọ da vwẹ isiso rhuo o de broma phihọ iwurhie, o de kpo evun rẹ orere na, ko beroma ọ da viẹ gangan.

² O de kpo unu rẹ egodo rẹ ovie na, kidie ohwo ọvuọvo yivwẹ rua anurhoro rẹ egodo rẹ ovie na-a ọ da dianẹ ọ vwẹ esisio rhuo.

³ Vwi kubrakpọ kubrakpọ, re de ghwoghwo urhi rẹ ovie na ejobi, omemuohọ rode kọ herọ kẹ ihwo ri Ju, vẹ owẹvwe echiro vẹ oviẹ vẹ omavwerhe, ayen buebu de shevwerhe esisio vẹ iwurhie.

⁴ Ọke rẹ emetẹ rẹ Ẹsta vẹ eghwara rọye rhe vwọ ta kẹ, oma da ghwọrọ aye rẹ ovie na gangan; ọ da reyọ iwun vwo rhe Modekai nẹ o ku phihọ, rere o si emwa rẹ isisio rọye na nu, ẹkẹvuọvo ọ reyo aye-en.

⁵ Etiyin Ẹsta de se Hatak, ọvo vwẹ eghwara rẹ ovie na, re vwo vi nẹ ọ vwẹ ẹro te, ọ da ta kẹ nẹ ọ ra nọ Modekai otọ rẹ emu nana.

⁶ Hatak de bru Modekai kpo obo ọsuere rẹ orere na vwẹ obaro rẹ anurhoro rẹ ovie na.

⁷ Modekai de gbe ikun rẹ obo re phiare ejobi kẹ, vẹ unu rẹ igho ri Haman veri nẹ ọye hwa phihọ ekpu re ovie ra vwọ ghwọrọ ihwo ri Ju.

⁸ Modekai da je vwẹ ọbe rẹ urhi na re siri vwi Susa rere a vwọ ghwọrọ ayen vwọ kẹ, rere ọ vwọ nẹ Ẹsta re o dje otọ rọye kẹ rere o bru ovie na ra ra rẹ vwọ kẹ ihwo rọye.

⁹ Etiyin Hatak da ra ta kẹ Ẹsta obọ ri Modekai tare.

¹⁰ Ẹsta da ta kẹ Hatak, ọ da vuẹ uwevwi rhe Modekai nẹ,

¹¹ Idibo rẹ ovie vẹ ihwo ejobi re hẹ ubrakpọ rẹ otọ rẹ ovie riẹnre nẹ ọshare yere aye de bru ovie kpo ọguan rọ hẹ obo uvun na jẹ e sere-e, urhi ọvuọvo kọye herọ kẹ, ihwo ejobi o vwo ọvo ro nuro-o ke hwe ayen, jokpa rẹ ohwo rẹ ovie yọnre ọkpọ rẹ ọro na kẹ ọye ọvo re rhọ. Yẹ e ji se vwe nẹ me rhe mrẹ ovie ẹdẹ ọgban nana-a.

¹² Obo rẹ Ẹsta tare na a da rha ta kẹ Modekai.

¹³ Etiyin Modekai da rha vwẹ ovuẹ kẹ ayen vwo rhe Ẹsta, Wo roro nẹ obo ọguan rẹ ovie wọ epha na ku wọ vabọ nọ ihwo ri Ju ri chekọ na.

¹⁴ Kidie wo de fotovwi vwẹ ọke ọtiọnana, ọfuvwegbe vẹ esivwo cha wan asan ọfa bru ihwo ri Ju rhe-e, ẹkẹvuọvo te owẹ te uwevwi rẹ ọsẹ wẹn cha ghwọrọ. Kono riẹnre nẹ wọ je rhe uvie na vwẹ utiẹ ọke ọtiọnana?

¹⁵ Etiyin Ẹsta da ta kẹ ayen nẹ ayen ta kẹ Mọdekai.

¹⁶ Yanran, re koko ihwo ri Ju ejobi ra mrẹ vwi Susa, re we chiri owẹvwe kẹ vwẹ, wa ria-a, wa je da-a vwẹ ẹdẹ erha te ason te uvo. Mẹvwẹ vẹ emetẹ mẹ ji chiri owẹvwe kirobo ri wo ruru na. Ọke yena ki mi bru ovie na, jẹ ọna vẹ urhi she phihọ-ọ, ọ da dianẹ me ghwọrọ, me ghwọrọ.

¹⁷ Mọdekai da yanran o de re ru obo rẹ Ẹsta ta kẹ na ejobi.