Ẹsta 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ona ri Haman guọnọ vwọ hwe ihwo ri Ju

¹ Rẹ enana ejobi vwọ wan nu, Ovie Ahasuerus da kpare Haman ọmọ ri Hamedata rẹ ohwo rẹ Agag kpenu, ọ da vwọ ka obaro kẹ isun re vẹ ọye gba herọ.

² Idibo rẹ ovie ejobi re hẹ asan anurhoro rẹ ovie na ejobi de diguẹ kẹ Haman, fikiridie ovie na ji urhi ọtiọye kpahọ. Ẹkẹvuọvo Modekai gbi diguẹ-ẹ ọ je vwẹ uyovwi kpotọ-ọ.

³ Etiyin idibo rẹ ovie re hẹ anurhoro rẹ ovie na da ta kẹ Modekai Die sorọ wọ vwọ chọ urhi rẹ ovie?

⁴ Ọke rẹ ayen vwọ ta kẹ kẹdẹ kẹdẹ jọ ka erhọ raye-en, ayen da ta kẹ Haman, sẹ ayen sa mrẹ nẹ eta ri Modekai sa sẹ; kidie ọ ta kẹ ayen nẹ ọye ohwo ri Ju.

⁵ Oke ri Haman vwọ mrẹ nẹ Modekai diguẹ-ẹ eyẹ ọ ji vwẹ uyovwi kpotọ kẹ-ẹ, ivun de rhi miovwo Haman.

⁶ Ẹkẹvuọvo ọ gbi guọnọ nọ ọye yọnre Modekai ọvo-o. Ọtiọye na re vwo dje ihwo ri Modekai kẹ nu re na, Haman kọ guọnọ guọghọ ihwo ri Ju ejobi, ihwo ri Modekai re hẹ uvie rẹ Ahasuerus na ejobi.

⁷ Vwẹ emeranvwe rẹsosuọ, rọ dia emeranvwe ri Nisan, vwẹ ukpe rihwivẹ rẹ Ahasuerus vwọ re ovie, ayen de duvwu itẹ vwẹ obaro ri Haman kẹdẹ kẹdẹ ayen de ji duvwo kemeranvwe kemeranvwe re te emeranvwe ihwivẹ, rọ dia emeranvwe rẹ Ada.

⁸ Etiyin Haman da ta kẹ Ovie Ahasuerus nẹ ihwo evo herọ re hra nene asan ejobi vwẹ ibrotọ ejobi rẹ uvie wẹn na; urhi rayen vẹ ọ rẹ ihwo efa dia ọvo-o, ayen je yọnrọn urhi rẹ ovie-e, vwẹ ọtiọye na ki didi erere ri te ovie re di vwo chiri ako rayen.

⁹ O de je ovie e gbẹ jo ji urhi re a ghwọrọ ayen nu, Me hwa talẹnt rẹ idọnọ efuanfọn uriori ihwe kẹ ihwo rẹ ovie vwẹ iruo na kẹ rere ayen phi igho na phihọ ekpu rẹ ovie.

¹⁰ Etiyin ovie na de ku isa rọye nẹ obọ rọye vwọ kẹ Haman rẹ ohwo rẹ Agag, ọmọ ri Hamedata, ọvweghrẹn ri Ju na.

¹¹ Ovie na da ta kẹ Haman, A vwẹ igho na kẹ wẹ, Ji te ihwo na rhe, rere wọ vwẹ ayen ru obo ri wo rori nẹ ofori.

¹² Etiyin e de se isiẹbe rẹ ovie koko vwẹ ẹdẹ ihwerha rẹ emeranvwe rẹsosuọ na, etiyin e de si urhi na kirobo ri Haman tare, e de sio vwo rhe ekakuro rẹ ovie vẹ isun rẹ ubrakpọ na ejobi kugbe emọ rẹ ivie rẹ ihwo na ejobi, kuẹ ubrakpọ ọvuọvo kuẹ isiesi rọye, kuẹ ihwo kuẹ ẹphẹrẹ rayen, e de sio vwẹ odẹ rẹ Ovie Ahasuerus ọ da rha vwẹ isa rẹ ovie tamuo.

¹³ A de vwẹ ẹbe na kẹ ikọn na ghwa kpo ubrakpọ rẹ ovie na suẹn ejobi, re a ghwọrọ re ehwe, re si ihwo ri Ju ejobi notọ, tọmọ tọkpako, teya temọ, vwẹ ẹdẹ ọvuọvo, ẹdẹ ihwerha rẹ emeranvwe ihwivẹ rọ dia emeranvwe re se Ada, e mi rhe gborho ekuakua rayen reyọ.

¹⁴ Ọbe na ọvo e mi rhe se kere urhi vwẹ ubrakpọ ọvuọvo vwo ghwoghwo kẹ ihwo na ejobi re ayen choma hẹrhẹ ẹdẹ yena

¹⁵ Ikọn na da yanran kpata kpata kirobo rẹ urhi rẹ ovie na epha, e de ji urhi na vwi Susa rẹ otorere na. Etiyin ovie na vi Haman de tidia ke da udi, ẹkẹvuọvo orere ri Susa de rhi tighi ku.