Emọs 9 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹdjọeguo rẹ Ọrovwohwo na a sa Vabọ Rọye-e

¹ Me da mrẹ Ọrovwohwo ro mudia vwẹ oma rẹ agbada na; Ọ da ta. Kporo ichivwo na bẹsiẹ rẹ ichiotọ na vwo yeghe, ro vwo rhurie she teyẹ iyovwi rẹ ihwo na ejobi, iri ghwu chekọ ke Me vwọ ọlọkọ hwe ayen; ọvuọvo rẹ ayen cha sa djẹ vabọ-ọ, ọvuọvo rẹ ayen sa djẹ yanra-an.

² Owenẹ ayen tọn ro evun rẹ Erivwi etiyin obọ mẹ da reyọ ayen rhe, owenẹ ayen yeri kpo odjuvwu, mi si ayen wotọ.

³ Owenẹ ayen sioma nu vwẹ enu rẹ ugbenu ri Kaniẹh Me je guọnọ ayen phia, owenẹ ayen sioma nu vwẹ obọtọ rẹ abadi, ki mi ji jẹ ọrọdekọ ra rhovwo ayen.

⁴ Owenẹ ivwighrẹ rayen mu ayen ighuvwu dede, etiyin Me da vwẹ ọlọkọ rhe, nẹ o hwe ayen; ke Me cha tọn ẹro mẹ vi ayen vwẹ o rẹ umwemwu. ọ dia erhuvwu-u.

⁵ Ọrovwohwo na, Ọghẹnẹ rẹ otuofovwi na, ohwo rọ vwẹ obọ te akpọ na ọ me wran ihwo re dia evun rọye ejobi mi muoma phihọ, aye ejobi mi ku reghe reghe kerẹ Nile ọ me rha kpọ kerẹ Nile rẹ Ijipt;

⁶ Ohwo rọ bọn uvun rọye kpenu vwẹ obi irharheghe, rọ nẹrhẹ ẹmwa dia obotọ rẹ akpọ na; rọ se ame rẹ abadi na reyọ, o mi kuo phihọ enu rẹ akpọ na–-Ọrovwohwo na ọye odẹ rọye.

⁷ Ọ dianẹ wọ họhọ ihwo rẹ Etiopia kẹ vwẹ? E ihwo rẹ Izrẹl? eriyin Ọrovwohwo na tare, Ọ dia omẹvwẹ ri si Izrẹl nẹ otọ rẹ Ijipt rhe, vẹ ihwo ri Filistia nẹ Kaftọ rhe vẹ Siria nẹ Kir rhe?

⁸ Nighere, ẹro rẹ Ọrovwohwo Ọghẹnẹ ọ he enu rẹ uvie rẹ umwemwu, ki mi hwe nẹ otọ na; ji mi che hwe uwevwi ri Jekọp ejobi-i, eriyin Ọrovwohwo na tare.

⁹ Kidie nighere, mi che ji urhi, mi che kpogho uwevwi rẹ Izrẹl vwẹ ohri rẹ ẹgborho na kerẹ obo ra da vwẹ ophorhemu phorho emu, ẹkẹvuọvo ubioragha ọvuọvo che se she teye otọ-ọ.

¹⁰ Iruimwemwu rẹ hẹ ohri rẹ ihwo mẹ ejobi che ghwu ughwu rẹ ọlọkọ, re tanẹ, umiovwo che se te avwanre oma-a.

A Cha vwẹ Emu na Ejobi Rhoma Rhe Izrẹl Vwobọ

¹¹ Vwẹ ẹdẹ yena ke Me cha kpare utughẹ ri Devid ro sheri vrẹn ke fi iphrophro rọye di, ka rhuẹrẹ uwevwi ro sheri na bọn, ka rhoma bọn kerẹ ọke rẹ awanre;

¹² rere ayen mrẹ asan reyọ asan ro chekọ vwẹ Edọm vẹ ẹgborho na ejobi ra vwẹ odẹ mẹ se, eriyin Ọrovwohwo rọ ru ọnana na tare.

¹³ Nighere, ẹdẹ cha, eriyin Ọrovwohwo na tare, rẹ ovorivoro de che voro wan ihwo ri vuẹ orhọ rẹ ohwo ro chiyi edi da ra yan mu ohwo rọ kọn ibiedi, igbenu na ke cha djẹ ọkẹre rẹ udi rẹ ọmiẹmiẹ. igbenu rẹ itete na ejobi ki che hwerhe ọkẹre rọye.

¹⁴ Ke Me cha rhoma reyọ ughwẹ rẹ ihwo mẹ Izrẹl rhivwi rhe ayen, irere ri sheri na ka rhoma bọn ayen ka dia ayen; kẹ ayen kọn ogba ri vain, kẹ ayen da udi rọye, kẹ ayen kọn ogba ayen ke re ibi rọye.

¹⁵ Ke Me kọn ayen phihọ otọ rẹ obọ rayen, a gbe cha sa kọrọ ayen kufia-a vwẹ evun rẹ otọ re Me vwọ kẹ ayen na, eriyin Ọrovwohwo Ọghẹnẹ wẹn tare.