Emọs 8 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Emramrẹ Rẹne: Obere rẹ Emamọ rẹ Orero

¹ Enẹ Ọrovwohwo Ọghẹnẹ vwọ nẹ vwẹ; nighere, obere rẹ emamọ rẹ ọkeuvo.

² Ọ ke ta, Emọs, die wọ mrẹre? Me da ta, obere re emamọ rẹ ọkeuvo. Etiyin Ọrovwohwo da ta kẹ vwẹ, Oba na teri kẹ ihwo mẹ Izrẹl nure, Me gbe rha cha wanvrẹn aye-en.

³ Ine rẹ uwevwi rẹ Ọghẹnẹ na, ko che hirhe phihọ oviẹ vwẹ ẹdẹ yena, eriyin Ọrovwohwo Ọghẹnẹ na tare, irivwi na ke cha dia buebu, vwi kasan kasan ke che mu aycn kufia runrun.

Ẹghwọrọ rẹ Izrẹl Kẹre Otọ re

⁴ We nyo ọnana, ovwan ri chiyi ihwo rẹ akpọ bẹn muotọ, rẹ ovwan de hirhiẹ ivwiogbere rẹ otọ na,

⁵ tanẹ, ọkevọ ọtuphro rẹ emeranvwe ọkpokpọ na vwo re, rere ma ra shẹ ọka? Kugbe ẹdidjala na, rere avwanre ra ghwẹ ọka ra shẹ, rere me ru iputusẹ havwe rere shekẹl rho, rere ma ghwa ayen re vwẹ evwanvwọn,

⁶ rere ma vwẹ idọnọ efuanfon dẹ ivwiegbere na, rere a rha vwẹ isabato ivẹ dẹ ihwo rẹ akpọ bẹn, rere a rha shẹ ivwuvwu rẹ eka?

⁷ Ọrovwohwo na vwẹ omephuo ri Jekọp vwo duvwu iyori nure; uyota uruemu rayen sa cha chọrọ ovwẹ ẹro-o.

⁸ Otọ na rhe kpogho vwi fiki rẹ ọnana, kohwo kohwo rọ dia evun rọye de muomaphihọ rẹ ayen ejobi de ku reghe reghe kerẹ Nile, ro de phio rhe phio kpo ro ki divwi, kere Nile rẹ Ijipt?

⁹ Vwẹ ẹdẹ yena eriyin Ọrovwohwo Ọghẹnẹ na tare, ki mi che ru ọnre ko che she vwẹ oghẹruvo, egho ko che mu vwẹ uvo koko na.

¹⁰ Ki mi che hirhe orẹ wẹn phihọ omaemuohọ, ine ẹsuọ wẹn ejobi phihọ omaevwerhe ke Me vwẹ emwa rẹ uvweri rhuo ayen ejobi, uyovwi rẹ ohwo kohwo ko gbe akpan; kọ họhọ ohwo ro muomaphihọ fiki ọmọ ọvuọvo ro vwiẹri oba rọye kẹ ẹdẹ rọ yara korokoro.

¹¹ Nighere, ẹdẹ cha, eriyin Ọrovwohwo Ọghẹnẹ tare, re Me cha vwẹ owẹvwe rhe otọ na; ọ di owẹvwe rẹ emuọre-e, yẹrẹ ọrẹ urhurame-e, ẹkẹvuọvo owẹvwe rẹ ota rẹ Ọrovwohwo.

¹² Ayen che ghoro nẹ abadi re te abadi, nẹ obọhwẹre ọnre kpọ obaro ọnrc, ayen ke djẹ rhe djẹ kpo, rhe guọnọ ota rẹ Ọrovwohwo na, ẹkẹvuọvo jẹ ayen cha mrẹ-ẹ.

¹³ Vwẹ ẹdẹ yena emetobẹ iyoyovwi vẹ imighene ki shero fiki rẹ urhuruame.

¹⁴ Ihwo re vwẹ Ashima ri Sameria duvwu iyori, tanẹ, Kirobo rẹ ẹdjọ wẹn herọ na, E Dan, ji kugbe obo rẹ idjerhe ri Bẹẹrsheba herọ na, ayen che she, ayen gbi vrẹn ọfa-a.