Emọs 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Iruo rẹ Ọmraro na

¹ Nyo ota nana rẹ Ọrovwohwo ta kpahe owẹ na, E ihwo rẹ Izrẹl, vwọ kpahe orua na ejobi re Me reyọ nẹ otọ rẹ Ijipt rhe na;

² Wẹ ọvo Me riẹnre vwẹ usun rẹ erua rẹ akpọ na ejobi, fiki rẹ ọtiọye na ki mi hwe we fiki rẹ orukuruku wẹn ejobi.

³ Ihwo ivẹ sa yan kugbe-e, jokpa nẹ ayen ta phihọ

⁴ Okpohrokpo de kperẹ vwẹ evun rẹ egbo, yọ mrẹ eranvwe ro mu-u? Ke ọmọ re okpohrokpo di kperẹ vwẹ evun re unu rọye, yo mu emuọvo-o?

⁵ Ufi di siẹ hwa ọphran vwẹ evun rẹ otọ ya kpahe ufi hẹrhẹ-ẹ? Ufi di muẹ phagha vwẹ otọ, yẹ emu ọvuọvo muro-o?

⁶ E hworo owanre vwẹ orere re oshọ de jẹ ihwo emuọ? okpetu di she vwẹ orere, rẹ Ọrovwohwo de jẹ obọ evwo vwọ?

⁷ Uyota Ọrovwohwo Ọghẹnẹ na se ru emuọvo-o, ro de je odjahọ rọye ẹ vwọ phia kẹ ihwo rọye emraro na-a

⁸ Okpohrokpo na kperi; kono oshọ je muo? Ọrovwohwo Ọghẹnẹ na ta nure. kono ri jẹ aroẹmrẹ?

Ẹghwọro ri Sameria

⁹ Ghwoghwo kẹ ogba ọgangan vwẹ Asiria; ji kugbe ogba ọgangan vwẹ otọ re Ijipt, re wọ ta, ovwan ghwẹ oma rẹ koko vwẹ enu rẹ igbenu ri Sameria, re wa mrẹ edo rode rọ hẹ evun rọye, vẹ oshenyẹ rọ hẹ uherevie rọye.

¹⁰ Ayen riẹn obo re ruẹ emuesiri-i Ọrovwohwo na tare Ihwo re guọnọ ozighi ve ugborho vwẹ ogba ọgangan rayen.

¹¹ Fiki rẹ ọtiọye na e nẹ Ọrovwohwo Ọghẹnẹ na tare: Ukọn kọ cha riariẹ otọ na phihọ ogba wọ gba riariẹ oma na ke kporo te otọ, ogba ọgangan wẹn ka cha kua fiotọ.

¹² E nẹ Ọrovwohwo na tare, Ọtiobo rẹ osuigodẹ sanvwe awọ ivẹ nẹ unu rẹ okpohrokpo ye, eye ubro rẹ orhọn na, ọtiọye (esivwi ihwo rẹ Izrẹl re dia Sameria) vwẹ akakọ rẹ idjighere vẹ abọvo rẹ ehwa vwo sivwi ihwo rẹ Izrẹl re dia Sameria.

¹³ Nyo, re we se iseri hwe uwevwi ri Jekọp, Ọrovwohwo Ọghẹnẹ tarọ, Ọghẹnẹ rẹ otu na.

¹⁴ Vwẹ ẹdẹ mi de che hwẹ Izrẹl fiki rẹ ogbeku rọye, Me je cha guọghọ egbada ri Bẹtẹl, ka cha nyavwe ighoro rẹ agbada na kufia ki che she teye otọ.

¹⁵ Ke Me cha guọghọ uwevwi rẹ ekpahe kugbe uwevwi rẹ ọkiuvọ; iwevwi rẹ akeni cha guọghọ, iwevwi ride na ki che vwo oba, Ọrovwohwo na tarọ.