Emọs 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ E nẹ Ọrovwohwo na tare. Fiki rẹ ogbeku erha ri Moab, ji kugbe ẹne, Me gbe sa rhan unu rẹ ehwe na-a, fikirdie ọ torhẹ ibeku rẹ ovie rẹ Idọm hirhe phihọ Iwurhie.

² Vwẹ ọtiọye na ki mi che phi erhanre phihọ Moab, kọ torhẹ ogba ọgangan ri Keriọt, Moab ko ghwu vwẹ uherevie re unuebo, vwẹ evun rẹ ekpere vẹ umri rẹ owanre,

³ Mi che si osun rọye nẹ uherevie rọye, ki mi ji hwe isun na kugbe, Ọrovwohwo na tarọ.

⁴ E nẹ Ọrovwohwo na tare. Fiki rẹ ogbeku erha ri Juda, ji kugbe ẹne, Me gbe sa rhan unu rẹ ehwe na-a, fikiridie ayen sen urhi rẹ Ọrovwohwo na, ayen gbe yọnre iji rọye-e ẹkẹvuọvo efian rayen sun ayen ghwru, kirobo rẹ esẹ rayen yanre.

⁵ Fiki rẹ ọtiọye na ki mi phi erhanre phihọ Juda, kọ torhẹ ogba ọgangan ri Jerusalẹm.

A Cha vwẹ Izrẹl Guẹdjọ

⁶ E nẹ Ọrovwohwo na tare: Fiki rẹ ogbeku erha rẹ Izrẹl, ji kugbe ẹne, Me gbe san rhan unu rẹ ehwe na-a; fikiridie ayen shẹ evwata fiki rẹ idọnọ, ihwo rẹ akpọ bẹn fiki rẹ awọ re isabato ivẹ…

⁷ ayen ihwo ri chiyi uyovwi rẹ ovwiogbere mu ivwurhie rẹ otọ, ayen Me djẹ ihwo re he ukpokpogho kufia, te ọsẹ vẹ ọmọ rọye Me rọvwọ aye ọvo, ọtiọye na ayen de gbe odẹ ọfuanfon Mẹ ẹgua.

⁸ Ayen mi sherhẹ kẹrẹ kaghada kaghada iwun re vwo viẹnwa keye ayen kuẹ phihọ vwerhe; evun rẹ uwevwi rẹ Ọghẹnẹ rayen kọye ayen da da idi, idi rẹ ihwo vwọ je oko

⁹ Je Me guọghọ ihwo rẹ Amọr re hẹ obaro rayen, re epha grogro kerẹ igedu, re epha gangan kerẹ iloho, Me guọghọ emamọ rọye rọ he obenu, kugbe awọ rọye rọ he obotọ.

¹⁰ Mi ji si ovwan nẹ otọ rẹ Ijipt rhe, mi de sun ovwan ikpe ujuvẹ vwẹ evun rẹ aghwa rere wa vwọ reyọ otọ rẹ Amọr.

¹¹ Me da vwẹ emọ rẹ ovwan ẹvo ru emraro, imighene rẹ ovwan ẹvo vwo ru ijigbo. O dia ọtiọye, E ihwo rẹ Izrẹl? Ọrovwohwo na tarọ.

¹² Ẹkẹvuọvo wa da nẹrhẹ ijigho na da udi, we de ji urhi kẹ emraro na nẹ, wa mraro-o,

¹³ Nighe, Me nyẹ ovwan muotọ vwẹ asan wẹn kerẹ idjighere re kru oghwa nyẹ rọ tan muotọ.

¹⁴ Ogba re ọnẹ gbe cha sa dje-e, ihwo re ganre gbi che vwo oganga-an, yẹrẹ ọgba gbi che se sivwi oma rọye-e.

¹⁵ Ohwo rọ yọnrọn umurhabọ gbi se mudia-a, ọgba rẹ onẹ gbi se sivwi oma rọye-e, yẹrẹ ohwo rọ gua iyesi gbi se sivwi oma rọye-e,

¹⁶ ku gbe ohwo ro vwo udu vwẹ ohri rẹ egba kọ djẹ veẹ ẹbẹba vwẹ ẹdẹ yena, Ọrovwohwo na tarọ.