Ẹfesọs 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Vwẹ ọtiọye na ovwan gba vwẹ ẹro kere Ọghẹnẹ, kerẹ emọ re ghare.

² Re wan yan vwẹ evun rẹ ẹguọnọ, kirobo ri Kristi guọnọ avwanre ro de siobọ nẹ oma rọye vwọ kẹ avwanre, vwo ze izobo ro gbo ọnrhe ororo kẹ Ọghẹnẹ.

³ Ẹkẹvuọvo ọfaurhie kugbe oka koka rẹ ijẹfuọn ejobi eyẹ urhuru evwo e jẹn e se odẹ rọye vwẹ ohri rẹ ovwa-an, kirobo ro fori vwẹ ohri rẹ ihwo efuanfon.

⁴ E jẹn a mrẹ inuhu, eyẹ ogbegbeta, eyẹ ọpata, ri jefo-o; kpe re eyena wa me kpẹvwẹ.

⁵ Jẹ ọna mu ovwan ẹro, nẹ ọvwọfanrhiẹ eyẹ ohwo ro jẹfuọn, eyẹ ovwurhuru (kọye hẹ, ọgedjọ) vwo uku ọvuọvo vwẹ uvie ri Kristi kugbe Ọghẹnẹ na-a.

Yan kerẹ Emọ rẹ Urhukpẹ

⁶ We jẹn ohwo ọvuọvo vwẹ eta ifefe phiẹn ovwa-an, kidie fiki rẹ imu nana ophu rẹ Ọghẹnẹ vwọ tua kpahe emọ ri jẹ ọghọ evwo na.

⁷ Vwẹ ọtiọye na we kuẹ oma kugbe aye-en.

⁸ Kidie ebri ovwan epha jovwo, ẹkẹvuọvo vwẹ asakiephana ovwan kẹ urhukpẹ vwẹ evun rẹ Ọrovwohwo; wa gba yan kerẹ emọ rẹ Urhukpe.

⁹ (Kidie emamọ rẹ urhukpẹ vwenẹ a mrẹ vwẹ evun rẹ obo ri yoma ejobi kugbe obo re gbare kugbe uyota);

¹⁰ gba davwe wo yono obo ri je Ọrovwohwo.

¹¹ We vwo obọ vwẹ iruo ofefe re ruẹ vwẹ ebri na-a, ẹkẹvuọvo kpe rẹ ọyena we tue ayen phia.

¹² Kidie e de gbe ikun rẹ obo rẹ ayen ruẹ vwẹ odjahọ na oma vo ohwo hwe;

¹³ ẹkẹvuọvo ọke rẹ urhukpe de tue emu phiare ka nabọ mrẹ fiotọ, kidie kemu kemu ra mrẹ fiotọ nure hẹ urhukpẹ.

¹⁴ Vwẹ ọtiọye na kọye ọ vwọ ta, We rọ vwerhẹ, rhọvwọ, ọ ro ghwuru, varhe, Kristi kọ kẹ wẹ orẹmrẹ.

¹⁵ Wa nabọ nite obo rẹ ovwan yan, we muẹ yan djidji-i ẹkẹvuọvo kerẹ evwaghwanre.

¹⁶ We kuẹ ọke fia-a, fikiridie ọke na pha brabra.

¹⁷ Vwẹ eriyin na we gbi ghẹ-ẹ, ẹkẹvuọvo we gbe vwo ẹruọ rẹ obo rẹ ọhọre rẹ Ọrovwohwo epha.

¹⁸ We gbi jẹ idi muẹ ovwa-an, kidie ọye ozighi; ẹkẹvuọvo gbe jẹ Erhi na vọn ovwan oma.

¹⁹ Ovwan ta ota kẹ ohwohwo vwẹ une rẹ ejiro kugbe une kugbe une rẹ erhi, vwẹ udu wẹn ejobi so une vwevwerhe kẹ Ọrovwohwo.

²⁰ Ọke kọke vwi kemu kemu ejobi vwẹ ẹkpẹvwẹ vwẹ odẹ rẹ Ọrovwavwanre Jesu Kristi kẹ Ọghẹnẹ Ọsẹ na.

²¹ Ohwohwo vwẹ oma kpotọ kẹ ohwohwo vwẹ oshọ ri Kristi.

Eya Kugbe Eshare

²² Eya na, wa vwẹ oma kpotọ kẹ eshare rẹ ovwan, kirobo ra vwẹ oma kpotọ kẹ Ọrovwohwo.

²³ Kidie ọshare hẹ olori rẹ aye kirobo ri Kristi hẹ olori rẹ ishọshi na, ugboma rọye, ekpoyovwi rọye hẹ osivwi rọye.

²⁴ Kirobo rẹ ishọshi vwẹ oma kpotọ kẹ Kristi na, ọtiọye eya na je vwẹ oma kpotọ kẹ eshare rayen vwi kemu kemu.

²⁵ Eshare na, wa guọnọ eya rẹ ovwan, kirobo ri Kristi guọnọ ishọshi rọye ọ da vwẹ oma rọye vwọ kẹ,

²⁶ rere o vwo ruo fon, rere ọ vwẹ ame rẹ ota rọye hworhẹ fon,

²⁷ rere a sa vwẹ ishọshi na phia vwẹ obaro rọye vwẹ udidi o vwo upe-e eyẹ iriẹ-ẹn eyẹ oghẹre rẹ emu ọtiọye, rere ọ vwọ dia fuanfon o vwo eka-an.

²⁸ Mrẹmrẹ ọtiọye eshare na guọnọ eya rayen kerẹ omobọ rayen. Ohwo rọ guọnọ aye rọye yọ guọnọ omobọ rọye.

²⁹ Kidie ohwo ji rhi tuoma rẹ omobọ rọye dẹvo-o, ẹkẹvuọvo ọ ghẹrẹ ọ me nabọ vwẹ ẹro te, kirobo ri Kristi ruẹ kẹ ishọshi na,

³⁰ fikiridie avwanre ekuakua rẹ ugboma rọye.

³¹ Fiki rẹ ọnana ọshare vwọ yan jẹ ọsẹ vẹ oni rọye vwo ọ vẹ aye rọye me ra tan oma kugbe, ayen ivẹ na me rhe dia oma ọvo.

³² Ọnana igbunu rode, ki mi vwiro dje Kristi kugbe ishọshi na.

³³ Vwẹ ọtiọye na, e jẹn ohwo ọvuọvo guọnọ aye rọye kerẹ omobọ rọye, e gbe rhe jẹn aye vwẹ oma kpotọ kẹ ọshare rọye.