Ẹfesọs 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Okugbe rẹ Oma na

¹ Mẹvwẹ, rọ hẹ uwodi fiki rẹ Ọrovwohwo na, nabọ rẹ ovwan rere ovwan yere eyere ro fori kẹ use nana re se ovwan phihọ na.

² Vwẹ omaevwokpotọ kugbe edẹndẹn, vẹ akoechiro, ohwohwo chirako rẹ ohwohwo vwẹ evun rẹ ẹguọnọ,

³ pharhe ra vwọ yọnre okugbe rẹ Erhi na vwẹ ẹguọnọ rẹ ufuoma.

⁴ Oma ọvuọvo rẹ herọ kugbe Erhi ọvuọvo, kirobo re se ovwan rhe iphiẹrohọ ọvuọvo na rọ hẹ evun rẹ use rẹ ovwan na.

⁵ Ọrovwohwo ọvuọvo, esegbuyota ọvuọvo, ame-ẹreyọ ọvuọvo.

⁶ Ọghẹnẹ ọvuọvo kugbe Ọsẹ rẹ avwanre ejobi, ọye me kpenu vwẹ emu ejobi rọ wan oma rẹ emu ejobi vwẹ evun rẹ emu ejobi.

⁷ Ẹkẹvuọvo a vwẹ ẹserọphẹ kẹ avwanre ọvuọvo kirobo rẹ ovwanvwọn rẹ okẹ ri Kristi epha.

⁸ Fiki rẹ ọtiọye na ọ vwọ ta nẹ, Ọke ro de yeri kpenu re ko sun ighuvwu buebu, o mi rhe ru ẹse kẹ ihwo

⁹ (Ra vwọ ta nẹ, O yeri kpenu, kidie ọ rha epha rha nọ nẹ o ke wotọ kpo orho rẹ igbephẹre?

¹⁰ Ohwo ọvuọvo ro ke wotọ na ọye je hẹ ohwo ro ji yeri kpenu phelephele, rere ọ vọn emu ejobi.)

¹¹ Okẹ rọye ke rha vwẹ ọna nẹ otu evo dia iyinkọn, evo emraro, evo aghwoghwo, evun osun vẹ iyono.

¹² Vwọ kẹ omaẹcha rẹ ihwo efuanfon na, vwọ kẹ iruo rẹ odibo egbe, vwọ kẹ ebanbon rẹ ugboma ri Kristi,

¹³ bẹsiẹ rẹ avwanre ejobi che vwo te okugbe rẹ esegbuyota na, kugbe erianriẹn rẹ Ọmọ rẹ Ọghẹnẹ na, rhi te omiragua, vwẹ evun rẹ ọvọnvọn rẹ ọrho rẹ Kristi.

¹⁴ Rere avwanre vwo jẹ dia kerẹ imitete, re phieghe cha phieghe kpo rẹ odju rẹ uyono kuyono muẹ, aghware rẹ ihwo vẹ ona rayen vwẹ ophiẹvwe.

¹⁵ Kpe rọ yena, ta uyota na vwẹ ẹguọnọ, avwanre ke rho bro ra vwẹ idjerhe kidjerhe re te ohwo na rọ hẹ uyovwi na, re te Kristi.

¹⁶ Oma rọye ọye oma na ejobi da tan kugbe a da rhuọ kugbe vwẹ uriẹn kuriẹn ejobi ra vwọ kẹ, ọke rẹ abọ ọvuọvo de ru iruo yoyovwi re, oma na kọ riẹn rhua ọ me rhe bọn oma rọye phihọ ẹguọnọ.

Akpọ rẹ Awanrẹ kugbe Akpọ Ọkpokpọ na

¹⁷ Asakiephana me rhọvwe ọnana me ke rha je dia oseri vwẹ evun rẹ Ọrovwohwo nẹ, ovwan rhe yerẹ kirobo rẹ ihwo ri Keferi ruẹ-ẹ, fiki rẹ ugheghẹ rẹ udu rayen.

¹⁸ Ayen vwo ẹruọ-ọ, ra phiẹ ghwru nẹ akpọ eyere rẹ Ọghẹnẹ fiki rẹ ugheghẹ rọ hẹ ayen oma, fiki rẹ udu ogangan rayen.

¹⁹ Udu rẹ ayen de ghwodirhe ki ruẹ zighi zighi, urhuru evwo ko si ayen ruẹ oka rẹ umwemwu koka rẹ umwemwu.

²⁰ Ọ dia ọtiọye ovwan yono mie Kristi-i!

²¹ A reyerọ phihọ nẹ ovwan nyo kpahọ re de yono ovwan vwọ hẹ evun rọye, uyota na kirobo rọ epha vwẹ evun ri Kristi.

²² Gbe ku oma rẹ ovwan rẹ awanre na kugbe uruemu rẹ ovwan rẹ awanre na ro miovwiri fiki rẹ ophiẹvwe rẹ urhuru sivwi ofefe na kufia.

²³ Rere a rhoma rhiọ ovwan vwẹ evun rẹ erhi rọ hẹ udu rẹ ovwan,

²⁴ re we ku ohwo ọkpokpọ na phihọ oma, ra mare vwẹ uhoho rẹ Ọghẹnẹ vwẹ omamọ rẹ ọvwata kugbe ẹfuọn.

Irhi rẹ Akpọ Ọkpokpọ na

²⁵ Fiki rẹ ọtiọye na, we de siobọ nẹ efian ẹvwọrọn nu, e gbe jẹn ohwo ọvuọvo ta uyota kẹ ọrivẹ rọye, kidie avwanre ejobi oma ọvo.

²⁶ Mu ophu ẹkẹvuọvo wo ru umwemwu-u; wo jẹn ọnre she kpotọ ghene ophu wẹ-ẹn,

²⁷ wọ vwẹ asan kẹ idẹbono rọ tan owọ muotọ-ọ.

²⁸ E jẹn ohwo ro cho uji jẹ uji vwo, ẹkẹvuọvo e jẹ ọ vwẹ obọ rọye wian, ọ vwẹ abọ rọye ru iruo ro vwo ọghọ, rere ọ mrẹ vwọ kẹ ayen otu rẹ akpọ bẹn.

²⁹ E jẹn ota umwemwu nẹ unu rẹ ovwan cha-a, ẹkẹvuọvo ota esiri rọ vọnre vẹ uyono, ro fori kẹ oghẹre ẹde, rọ vwẹ erhuvwu kẹ otu ri nyoro.

³⁰ We jẹn ophu muẹ Erhi Ọfuanfon rẹ Ọghẹnẹ ra vwọ kẹ ovwan nẹ ọ yonre ovwan re te ẹdẹ rẹ etanhirhe na-a.

³¹ We siobọ nẹ ivuemiovwo kugbe ẹghwọ kugbe ophu kugbe oseghe kugbe ọphọphọvwe vwẹ ohri rẹ ovwan, vẹ ọnko.

³² Ni arodọvwẹ kẹ ohwohwo, we siẹ ohwo aro-o, vwo ghovwo ohwohwo, kirobo rẹ Ọghẹnẹ wan oma ri Kristi vwo ghovwo ovwan.