Ẹfesọs 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Nẹ Ughwu ra Ro Arhọ

¹ Ọ da rhọvwọ ovwan, vwẹ ọke rẹ ovwan vwo ghwu fiki rẹ urhi ẹchọ vẹ umwemwu,

² rẹ ovwan ka yan phihọ, we de nene idjerhe rẹ akpọ nana, nene osun rẹ ogangan rẹ irharheghe, erhi ro ruẹ iruo vwẹ asakiephana vwẹ evun rẹ emọ ri jẹ ọghọ evwo na.

³ Ohri rẹ enana avwanre ka dia jovwo vwẹ evun rẹ urhuru sivwe rẹ ugboma rẹ avwanre, ri nene ẹguọnọ rẹ ugboma kugbe iroro, ọtiọye na kirobo re vwiẹ avwanre phihọ avwanre kẹ emọ rẹ ophu, kirobo rẹ ihwo rẹ akpo ri chekọ epha.

⁴ Ẹkẹvuọvo Ọghẹnẹ, rọ vẹ arodọvwẹ buebu, vwẹ evun rẹ ẹguọnọ rode ro vwo kẹ avwanre na,

⁵ vwẹ ọke rẹ avwanre vwo ghwu fiki rẹ urhi ẹchọ rẹ avwanre na, ọ da kpare avwanre vi Kristi vrẹn (ẹserọphẹ e vwo sivwi ovwan).

⁶ Ọghẹnẹ da kpare avwanre vẹ ọye vrẹn, a da vwẹ avwanre vẹ ọye tidia vwẹ asan ro kpenu vwi Kristi Jesu,

⁷ rere vwẹ oge rọ cha na ọ vwẹ ẹserọphẹ ro je re na kugbe arodọvwẹ rọye vwo nẹ avwanre vwẹ evun ri Kristi Jesu.

⁸ Kidie fiki rẹ ẹserọphẹ e vwo sivwi ovwan vwẹ oma rẹ esegbuyota; ọnana dia iruo rẹ obọ rẹ ovwa-an, okẹ rẹ Ọghẹnẹ.

⁹ Ọ dia ifiki rẹ iruo-o, rere ohwo vwo jẹ eyan ẹyan.

¹⁰ Kidie avwanre ekuakua rẹ iruo rọye, ra mare vwi Kristi Jesu vwọ kẹ iruo esiri, rẹ Ọghẹnẹ rhuẹrẹ vwọ hẹ otọ rhabae, nẹ avwanre yan nene ayen.

Ọvo vwi Kristi

¹¹ Vwẹ ọtiọye na wa gba karohọ nẹ rhabae ovwan Keferi vwẹ ugboma na, ke se ovwan ijẹyanvwọ fiki rẹ obo re se oyanvwe, ra vwẹ obọ ru.

¹² Gba karohọ nẹ vwẹ ọke yena ka hẹriẹ ovwan nẹ Kristi, ra riẹriẹ ghwru nẹ emotọ rẹ Izrẹl, kẹ erhorha rẹ ọphọ rẹ ive na, ri vwo iphiẹrohọ-ọ ri vwo Ọghẹnẹ vwẹ akpọ na-a.

¹³ Asakiephana vwẹ evun ri Kristi Jesu ovwan re epha shesheri jovwo ke rhi si ovwan kẹrẹ vwẹ evun rẹ ọbara ri Kristi.

¹⁴ Kidie ọye hẹ ufuoma rẹ ovwan, o de ku avwanre ivẹ kugbe ọvo, o da kpare ughwru rẹ ofovwi rọ hẹ uherevie rẹ avwanre kufia.

¹⁵ Ọ da vwẹ ugboma rọye vwọ guọghọ irhi re jiri kugbe iji, rere asan rẹ ihwo ivẹ epha jovwo na ro vwo ruo phihọ ohwo ọkpokpọ ọvuọvo vwẹ evun rẹ oma rọye, kọye ufuoma sa vwọ dia,

¹⁶ rere vwẹ agbagba na ọ vwọ sa rhuẹrẹ avwanre vẹ Ọghẹnẹ kugbe vwẹ ugboma ọvo, rere ohọre ejobi vwo fue.

¹⁷ Ọ da rhe rhi ghwoghwo ufuoma kẹ ovwan re hẹ ogboko kugbe ufuoma kẹ ayen otu re kẹre.

¹⁸ Kidie oma rọye avwanre ivẹ na wan mrẹ asan vwẹ evun rẹ Erhi ọvo na vwo bru Ọsẹ na.

¹⁹ Vwẹ ọtiọye na ovwan gbe hẹ erhorha kugbe ihwo re kua rhe-e, ẹkẹvuọvo ovwan vẹ ihwo efuanfon na kẹ emotọ kugbe ihwo rẹ evwruvwevwi rẹ Ọghẹnẹ,

²⁰ ra bọn phihọ enu rẹ uchivwo rẹ iyinkọn na kugbe emraro na, Kristi Jesu vẹ ekpuyovwi kọye hẹ ubioragha rode re vwo vi ubienyẹ.

²¹ Evun Kristi kọye uwevwi na ejobi wan tan kugbe ọ da rho hirhe phihọ uwevwi rẹ ẹga ọfuanfon vwẹ evun rẹ Ọrovwohwo.

²² Evun rọye kọye a je bọn ovwan phihọ ẹdia rẹ Ọghẹnẹ vwẹ evun rẹ Erhi na.