Daniẹl 8 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Daniẹl mrẹ Emramrẹ rẹ Egbo Kugbe Okri

¹ Vwẹ ukpe rerha rẹ ẹriọ rẹ Bẹlshaza, mẹvwẹ ri Daniẹl da mrẹ emramrẹ vwẹ ọke re me vwọ mrẹ ọ rẹsosuọ na nu.

² Me da mrẹ vwẹ evun rẹ emramrẹ na; mi vwo ni, kẹ otorho ri Susa mie pha, vwẹ ubrotọ rẹ Elam; me da mrẹ vwẹ evun rẹ emramrẹ na, nẹ oma rẹ urhie rẹ Ulai mie pha.

³ Me vwọ kpare opharo me da mrẹ, nighe, egbo ọvo ro mudia phihọ egbẹn rẹ urhie na. O vwo ighoro ivẹ, ighoro ive na da tan kpenu, ẹkẹvuọvo ọvo de kpenu nọ ọrivẹ, ọ ro me kpenu na kọye tanrhe ka uko.

⁴ Me da mrẹ egbo na rọ djẹ kpo obọhwẹre vẹ obenu vẹ obotọ rẹ akpọ na, o vwo eranvwe ọvuọvo ro se sivwi ohwo nẹ ogangan rọye-e, obo ri jere ọye o ruẹ, o de mu oma rọye kpenu.

⁵ Ri mi vwo roro re, nighe, ẹkpro ọvo da bẹre wan abọ rẹ akpọ ro chekọ rhe, ọ vwẹ obọ te otọ-ọ; ẹkprọ na vwo ighoro ọvo gheregbe vwẹ uvwre rẹ ibiẹro rọye ivẹ na.

⁶ O de bru egbo na rọ vẹ ighoro ivẹ na rhe, re me mrẹre ro mudia vwẹ egbẹ rẹ urhie na, ọ da djẹ karọ vwẹ ophu ọgangan rode.

⁷ Me da mrẹ obo ro rhi bi kẹrẹ egbo na. Ophu de muo kpahọ, o de dje egbo na o de vwirhi ighoro rọye ivẹ na nu; egbo na rhe vwo ogangan ro se vwo mudia vwẹ obaro rọye-e, ẹkẹvuọvọ o muro teye otọ ọ da ro obenu rọye chiyi; o rhe vwo ohwo ọvuọvo ro se sivwi egbo na nẹ ogangan rọye-e.

⁸ Etiyin ẹkpro na da rhe kpare oma rọye kpenu gangan, ẹkẹvuọvo ọke rọ rhe vwọ ganre, ighoro rọye rọde na de rhi vwirhi, asan rẹ ighoro na vwirhi nu na ighoro ẹne efa da tan no rhe ri nẹ igogo rẹ odju ẹne rẹ irharheghe rẹ akpọ na.

⁹ Vwẹ oma rẹ ighoro ọvo vwẹ usun rẹ ighoro ẹne na imighoro ọvo tutuno da tan no rhe, rọ rhe rho gangan kpo obotọ, kpo obaro ọnre, ro kpo obo otọ rẹ urinrin na.

¹⁰ Ọ da tan rhuarho gangan, rhiri re te irharheghe, otu re isio evo re hẹ obenu na, o de gere ayen she phihọ otọ, o de chiyi ayen muotọ.

¹¹ O de mu oma rọye kpenu, tobọ re te asan rẹ Osun rẹ otu rẹ obenu na epha na; izobo ra torhẹ kẹ kọke kọke na ọ da reyọ mie, asan eshẹ rọye na e de kporo te otọ.

¹² Otu na vẹ izobo ra tọrhe kẹ kọke kọke na fiki rẹ ẹguegbe na e de mie ayen vwọ kẹ, a da guọghọ uyota te otọ, O de yovwi kẹ ighoro na vwẹ emu ejobi ro ruẹ.

¹³ Etiyin mi de nyo ohwo ọfuanfon ọvo rọ ta ota kẹ ohwo ọfuanfon ọfa nẹ, Ọkevọ emramrẹ ra mrẹ kpahe izobo ẹtorhẹ rẹ kọke kọke na krite, ẹguegbe rọ nẹrhẹ asan kua fiotọ, kugbe ẹshẹ na ra cha guọghọ vẹ otu na re che chiyi muoto?

¹⁴ Ọ da ta kẹ, ovwọnvwọn vẹ irhiọke uriori ivẹ kugbe ujori erha; kẹsiẹye a ke cha rhoma ma ẹshẹ na phihọ ẹdia ro shephihọ kẹ.

¹⁵ Ọke rẹ mẹvwẹ, ri Daniẹl vwọ mrẹ emramrẹ nana nu, me da guọnọ otọ rọye riẹn, nighe, emu ọvo de mudia vwẹ obaro mẹ rọ họhọ ohwo rẹ akpọ.

¹⁶ Mi de nyo urhuru rẹ ohwo ọvo vwẹ uvwre rẹ eghẹn rẹ Ulai na; o de se, Gabriẹl, ru ohwo nana rọ riẹn otọ rẹ emramrẹ na.

¹⁷ Etiyin ọ de rhi sikerẹ asan ri mi mudia phihọ rọ vwọ rhe re, ọshọ de mu vwẹ mi de she bọvwọn opharo rhuotọ. Ẹkẹvuọvo ọ da ta kẹ vwẹ, Jọ ro wẹ, E Ọmọ rẹ ohwo, nẹ emramrẹ nana ọye ọ rẹ ọke rẹ oba na.

¹⁸ Ọke rọ ghwa vwọ ta ota kẹ vwẹ na, mi de shero okpo ovwerhẹ rode, me da bọvwọn opharo rhuotọ, ẹkẹvuọvo ọ da vwẹ obọ te vwẹ, ọ da kpare ovwẹ vrẹn mudia.

¹⁹ O da ta, Nighe, me cha nẹrhẹ wọ riẹn obo re cha phia vwẹ obo oba rẹ ophu na, kidie ọ kpoma phihọ ọke rẹ obo oba re bruphihọ otọ na.

²⁰ Vwọ kpahe egbo na vẹ ighoro ivẹ, ru wọ mrẹre na, enana ivie ri Midia vẹ Pẹsha.

²¹ Ekpro na ke rha vwẹ ovie ri Grik, ighoro rode rọ hẹ uvwre rẹ ibiẹro rọye na ọye ovie rẹsosuọ.

²² Vwọ kpahe ighoro re vwirhiri ye, rẹ ighoro ẹne da tan nẹ ẹdia rọye rhe na, uvie ẹne che mu vwẹ ẹgborho roye na rhe, ẹkẹvuọvo ọ dia ogangan rọyẹ-ẹ.

²³ Vwẹ oba rẹ isuesun rayen re, ọke rẹ igburhi na de rhi ru te asan rẹ ukoko rayen da vọn re; ovie ro yivwaro rọ sa fan otọ rẹ ido, ko che muẹ.

²⁴ Ogangan rọye kọ cha rho, kọ cha guọghọ eguọghọ ro muoshọ, kemu kemu ro ruru ejobi ko shephihọ kẹ, kọ guọghọ eshare vẹ ẹgba kugbe ihwo efuanfon na.

²⁵ Vwẹ oma rẹ aghwanre ro ruẹ efian ko che yovwi vwẹ obọ rọye, kọ cha vwẹ ọhọrobọ rọye vwọ kpare oma rọye kpenu. O cha vwẹ ovuẹ rhe rọ ke guọghọ ihwo buebu-u, ọ cha tobọ mu kpahe Ọmọ rẹ ivie na; ẹkẹvuọvo, o dia obọ rẹ ohwo rẹ akpọ a cha vwọ guọghọ-ọ.

²⁶ Emramrẹ rẹ ovwọnvwọn vẹ irhiọke ra tare ye uyota, ẹkẹvuọvo gbe rhurhu emramrẹ na, kidie ọ kpoma phihọ ẹdẹ buebu ro cha.

²⁷ Etiyin Mẹvwẹ ri Daniẹl oma da ghwọrọ ovwẹ me da mwọga vwẹ ọmọke, etiyin mi de vrẹn kpo iruo rẹ ovie; ẹkẹvuọvo emramrẹ na de gbe vwẹ unu mamọ, me gbe rha riẹn otọ rọye-e.