Daniẹl 11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Vwọ kẹ vwẹ, ukpe rẹsosuọ ri Dariọs ohwo ri Mid, mi de mudia gba me da vwẹ ogangan vwọ kẹ.

Ovie rẹ Obohwẹre Ọnre Kugbe Ovie rẹ Obọrhe Ọnre

² Asakiephana ki mi gbe uyota na kẹ wẹ. Nighe, ivie erha efa che mu vwi Pẹsha; ọrẹne ọye che me fe vrẹn ayen ejobi, ọ da rhe wan oma rẹ efe na vwo ogangan re, kọ cha riẹriẹ ihwo vwo mukpahe uvie ri Grik.

³ Etiyin ovie rode ko che mu, ko che sun vẹ ogangan rode o mi rhe ru obo ri jere.

⁴ O de rhi vrẹnre, uvie rọye kọ cha guọghọ ka gharọ phihọ igogo ẹne rẹ irharheghe na, ẹkẹvuọvo ọ dia emọ rọye a cha gharọ kẹ-ẹ, yẹrẹ kirobo rẹ ogangan rẹ isuesun rọye epha-a, kidie a cha sanvwẹ uvie rọye reyọ ko che vwọ kẹ ihwo efa.

⁵ Etiyin re ovie rẹ obuko ọnre kọ cha goma, ẹkẹvuọvo usun rẹ emọ rẹ ovie na ọvo cha goma nọ uvie rọye kọ cha dia uvie rode.

⁶ Ikpe evo da wan nu, ayen ki che mu ugbeyan, ọmọtẹ rẹ ovie rẹ obuko ọnre ko che bru ovie rẹ obọhwẹre ọnre rhe, rhe guọnọ ufuoma, ẹkẹvuọvo o gbe sa yọnrọn ogangan rẹ igbabọ rọye-e, tẹ ọye vẹ uvwiẹ rọye cha dia krẹ-ẹ, ẹkẹvuọvo ke cha siobọ no, te idibo rọye, ọmọ rọye, kugbe ihwo re wan oma rọye fe.

⁷ Vwẹ ọke yena oghọn ọvo kọ cha tan nẹ awọ rọye rhe vwẹ adia rọye; ko che nene unuofovwi na họnre kọ cha ro ogba rẹ ovie rẹ obọhwẹre ọnre, ọ ve ayen che phi ko che phi kparobọ.

⁸ Ọ je cha ghwẹ ẹdjọ rayen kpo Ijipt kugbe ema re duvwuru vẹ ekuakua rẹ idọnọ efuanfọn vẹ oro rọ ghare, vwẹ ikpe evo o rhe che nene ovie rẹ obọhwẹre ọnre na họnre-e.

⁹ Ọ rẹ okuko na kọ cha rhe otọ rẹ ovie rọ obuko ọnre na, ẹkẹvuọvo ko che rhivwi kpo otọ rọye.

¹⁰ Emọ rọye ke cha kpare ofovwi, ayen me ghwẹ unuofovwi buebu koko, ke cha ghwẹ rhe rhe vọn asan ejobi reghe reghe, ayen me rha kpare ofovwi na rhiri re te ogba rọye.

¹¹ Ọke yena ophu ko che mu ovie rẹ obuko ọnre, ọ me kpare ohọnre bru ovie rẹ obọhwẹre ọnre rhe, kọ cha ghwẹ ihwo buebu koko, ẹkẹvuọvo e che phi ayen phihọ obọ rọye.

¹² Ọke rọ de phi urogho na kparobọ nure, kọ cha kparẹ oma kpenu, ko che gere uriori ihwe she teye otọ, ẹkẹvuọvo o che se phi kparobọ-ọ.

¹³ Kidie ovie rẹ obọhwẹre ọnre je cha ghwa urogho buebu rhe, ri bunọ e rẹsosuọ, ikpe evo da wan nu, kọ cha ghwẹ unuofovwi rode rhe vẹ ekuakua buebu.

¹⁴ Vwẹ ọke yena ihwo buebu che mukpahe ovie rọ hẹ obuko ọnre, ihwo ri gbe ozighi re hẹ ohri rẹ ovwan ki che yoro oma phia rere ayen vwo ru obo rẹ emramrẹ na tare gba, ẹkẹvuọvo ayen che she.

¹⁵ Etiyin re ovie rẹ obọhwẹre ọnre kọ cha hwa riariẹ phihọ o mi phi orere ra gba ogba ọgangan phihọ na kua. Egba rẹ unuofovwi ro nẹ obuko ọnre rhe na dede che se mudia-a, eyẹ ihwo ro di mu tọrọ nẹ obonẹ vẹ obonẹ rhe-e, kidie ayen che vwo ogangan vwo mudia-a.

¹⁶ Ẹkẹvuọvo kohwo kohwo ro bruro rhe ejobi ko ru obo ri jere, ohwo ọvuọvo che se mudia vwẹ obaro rọye-e, ko che mudia phihọ otọ rẹ urinrin na, ayen ejobi ke cha dia evun rẹ ogangan rọye.

¹⁷ O che mu opharo rọye vi rọ da rhe vẹ ogangan rẹ uvie rọye ejobi, ọ cha ghwẹ iroro rẹ ufuoma rhe o mi rhe ru ayen. Ọ cha vwẹ ọmọtẹ rọye vwo eya kẹ rọ vwọ sa guọghọ uvie na, ẹkevuọvọ o che mudia-a eyẹ o fi erere kẹ-ẹ.

¹⁸ Ukuko rọye kọ che hirhe epharo ku obo erhuru na kọ reyọ ayen buebu, ẹkẹvuọvo onotu ọvo ko che phi oba phihọ arọeyivwo rọye ọruyota kọ cha nẹrhẹ ọjẹfia rọye rhọma she hwe.

¹⁹ Etiyin ko che hirhe epharo rọye ku ogba rẹ otọ rọye; ẹkẹvuọvo ọ cha kprowọ o mi she, a gbe cha mrẹ-ẹ.

²⁰ Ohwo ọvo ko che mu vwẹ ẹdia rọye, ovwiosa rọ cha rhe vwẹ oma rẹ urinrin rẹ uvie na; ẹkẹvuọvo ẹmẹ ẹdẹ da wanu ka cha guọghọ; o dia ophu yẹrẹ ofovwi-i.

²¹ Vwẹ ẹdia rọye orharhe rẹ ohwo che mu ohwo re ji mu ọghọ rẹ ovie kẹ-ẹ; ọ cha rhe ọ cha vuẹ ohwo ọvuọvo-o kọ cha vwẹ unuẹrarọ vwọ reyọ uvie na.

²² Otuofovwi na ejobi ke che hwerhe ayen yanran a me guọghọ ayen nu vwẹ irharo rọye, ji te osun rẹ ọphọ na rhe.

²³ Nẹ ọke rẹ ayen vwọ mu ugbeyan rhe, uruemu rẹ ephiaphiẹn kọye o che ru, ọ vẹ imihwo krẹn ri che nene.

²⁴ Kpregede na, ọ cha rhe ubrete rọ me fe vwẹ otọ na; ko che ru obo rẹ esẹ roye, yerẹ esẹ rẹ esẹ roye ji ru dẹvo-o, kọ vẹn ayen gborhọ ayen, ekuakua rẹ ugborho, kugbe ekuakua ejobi. Asan rọ ma gan ejobi ọ cha vwẹ ona reyọ ayen, ẹkẹvuọvo ọmọke krẹn.

²⁵ Ọ cha rhariẹ ogangan rọye vẹ arọeyivwo rọye kpahẹ ovie rọ hẹ obuko ọnre vẹ unuofovwi rode, ovie rẹ obuko ọnre kọ cha kpare ofovwi rhe vẹ unuofovwi ọgangan, ẹkẹvuọvo o che se mudia-a, fikiridie a hwa phihọ otọ hẹrhe.

²⁶ Vwevwe rẹ ihwo re ria emu oghaghare rọye cha dia ukọn kẹ; unuọfovwi rọye ke che hwerhe kufia, ke che hwe ihwo buebu vọn otọ mini mini.

²⁷ Vwọ kẹ ivie ivẹ na, ẹnwẹn rẹ umwemwu ọvo kọye cha vọn ayen evun, ayen cha vwọrọn efian vwẹ enu rẹ imẹjẹ ọvuọvo na, ẹkẹvuọvo o che vwo otọ-ọ; kidie oba na che te vwẹ obọ vwẹ ọke re bruru na.

²⁸ Kọ che rhivwi rhe otọ rọye vẹ eyere buebu, ẹkẹvuọvo udu rọye kọ che mu kpahe ọphọ ọfuanfon na. Ko che ru obo ri jere ro de hirhe kpo otọ rọye.

²⁹ Ọke re bruru na de te kọ che rhivwi rhe obuko ọnre na, ẹkevuọvọ ọke nana rha cha dia kere ọke rẹsosuọ-ọ.

³⁰ Kidie ekọ rẹ Kitim che muẹkpahọ, ọshọ ko muo, ko sioma reyọ, kọ che sioma te uko ophu ko muo, kọ cha vwọ sọ ọphọ ọfuanfọn na. Ko che rhivwi ọ me kerhọn re ihwo re siẹn ọphọ ọfuanfọn na.

³¹ Ihwo rẹ ofovwi rọye ke cha vwẹ oma phia ki che gbe uwevwi rẹ Ọghẹnẹ na ẹgua vẹ ọgba na, kọ reyọ izobo rẹ ẹtorhẹ re kọke kọke na no. Kẹ ayen cha vwẹ imu rẹ ẹgua re guọghọ asan na vwo muẹ.

³² Kọ cha vwẹ unuerarọ vẹ ọphiẹnvwe phiẹn ihwo ri gbe ọphọ na ku; ẹkẹvuọvo ihwo re riẹn Ọghẹnẹ rayen che mudia gan ke ayen họnre.

³³ Ihwo evo vwẹ ohri rẹ ihwo na ri vwo ọhọ cha nẹrhẹ ihwo buebu vwo ọhọ owenẹ a vwẹ ọlọkọ vẹ erhanre hwe ayen, imu eyẹ ugborho, vwẹ ẹmẹ ẹdẹ krẹn.

³⁴ Ọke rẹ ayen de she, ayen ke cha mrẹ ọmọchuko krẹn. Ihwo buebu cha vwẹ ota rẹ ophiẹnvwe kuoma kugbe ayen;

³⁵ ihwo evo vwẹ usun rẹ ihwo na ri vwo ọhọ ji che she, ra vwọ fan ayen je nabọ hworhe ayen, re vwo ru ayen fuanfon, bẹsiẹ rẹ oba na vwo te, kidie ọke re bruru na ji te-e.

³⁶ Ovie na kọ che ru obo ri jere, ko che brọrho o mi rhe mu oma rọye kpenu nọ edjọ kedjọ, kọ cha ta ota rẹ ọdẹ kpahe Ọghẹnẹ ro vwo eghẹnẹ ejobi na. O che yovwo bẹsiẹ rẹ ophu na vwọ gba; fikiridie obo ra jẹ iroro rọye kpahe otọ kẹ jovwo na cha phia.

³⁷ Ọ cha davwerhọn rẹ ẹghẹnẹ rẹ esẹ rọye-e, yẹrẹ ohwo ọvo rẹ eya na ma guọnọ, ọ cha davwerhọn rẹ edjọ-ọ kidie o che mu oma rọye kpenu nọ ayen ejobi.

³⁸ Ọ cha vwẹ ọghọ kẹ edjọ rẹ ogba na chọ enana ra, edjọ rẹ esẹ rọye riẹnre-e kọye ọ cha vwẹ oro vẹ idọnọ efuanfọn bru ọghọ phihọ oma, vẹ ibieragha vẹ ẹse eghaghare.

³⁹ Ọ vẹ ogba rọ ma gan ejobi gbe che vwo te vẹ ọchuko rẹ edjọ ọrhorha. Ihwo re rhọvwe kẹ kọye ọ cha vwẹ ọrho kẹ. Kọ cha vwẹ ayen muẹ vwẹ enu rẹ ihwo buebu, kọ ghare otọ na vwọ hwa osa kẹ ayen.

⁴⁰ Ọke rẹ obo oba na de te ovie rẹ obuko ọnre na ko che nene họnre, ẹkẹvuọvo ovie rẹ obọhwẹre ọnre kọ cha họrhọ ruọ kerẹ ukori rẹ odju vẹ ekpẹrẹ rẹ ofovwi vẹ ihwo re gua iyesi, vẹ ekọ buebu, ko che te irho buebu ko phi ayen kparobọ ọ me wanvrẹn

⁴¹ Kọ che te otọ rẹ urinrin na. Ihwo uriori ihwe ki che she, ẹkẹvuọvo e che sivwi enana nẹ obọ rọye. Edọm vi Moab kugbe etọ rọ ma rhọ vwi Amọn.

⁴² Ọ cha riẹn obọ rọye kpahe irho na, otọ rẹ Ijipt cha sa vabọ-ọ.

⁴³ Kọ cha dia osun rẹ efe rẹ oro vẹ idọnọ efuanfọn, kugbe ekuakua re ghare vwẹ Ijipt, ihwo ri Libia vẹ Etiopia che nene.

⁴⁴ Ẹkẹvuọvo ikun ro nẹ obaro ọnre vẹ obọhwẹre ọnre rhe cha nẹrhẹ oshọ muọ, kọ che vrẹn vẹ ọphu gangan ra guọghọ ihwo buebu te otọ.

⁴⁵ Kọ cha bọn ighẹn rẹ ovie rọye phihọ ahwa rẹ abadi rode na vẹ ugbenu ọfuanfọn rẹ urinrin na; dede na o che vwo oba, o vwo ohwo ọvuọvo rọ cha uko-o.