Aizaya 65 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ehwe fiki re Emuakpahọ

¹ Me choma Me vwẹ oma Mẹ phia kẹ ayen otu re nọ ekpẹn mẹ-ẹ; Me choma rere ihwo re guọnọ ovwẹ-ẹ vwọ sa mrẹ vwẹ. Me da ta, Mẹvwẹ na, Mẹvwẹ na, vwọ kẹ ẹgborho ro se odẹ mẹ-ẹ.

² Me bẹre abọ mẹ vwẹ ẹdẹ na ejobi vwọ kẹ ihwo ri gbe ozighi, re yan phihọ idjerhe ro je yovwo, ri nene ona rẹ evun rayen ọvo,

³ Ihwo re kpare ophu mẹ te vwe unu sa kọke kọke ejobi, ri ze izobo vwẹ evun rẹ udju re torhẹ egẹn vwe enu rẹ ikerekpẹn;

⁴ ri tidia vwẹ enu rẹ ishi, ri sioma nẹ vwẹ asan odjahọ vwẹ ason ejobi, re ria uvwo rẹ esi, re ria ukodo rẹ obo ri tuoma vwẹ itaso rayen;

⁵ re tanẹ, Sẹro rẹ oma wẹn, wo siẹ kẹre ovwẹ-ẹ, kidie a vwẹ ovwẹ tephe kẹ wẹ Enana kẹ ivwirhi vwẹ evun rẹ inwe mẹ, erhanre rọ torhẹ kẹdẹ kẹdẹ ejobi.

⁶ Nighere, e siro phihọ obaro mẹ, Mi che fotovwi-i, ẹkẹvuọvo Me cha hwa osa, e, Me cha hwa osa phihọ agada rayen

⁷ orukuruku rayen kugbe orukuruku rẹ ese rayen kugbe, eriyin Ọrovwohwo tare; fikiridie ayen torhẹ egẹn vwẹ enu rẹ igbenu na ayen da van ku vwe vwẹ enu rẹ igbenu itete na, Me cha vwanvwe phihọ agada rayen osa re ọbo rayen ruru rhabae.

⁸ Enẹ Ọrovwohwo tare: Kirobo ra mrẹ wain vwẹ eduru na, re ayen da tanẹ, Wọ ghwọrọ-ọ na, kidie erhovwo herọ, ọtiọye Mi ru fiki rẹ idibo Mẹ, Me rha ghwọrọ ayen ejobi-i.

⁹ Me cha reyọ uvwiẹ ri Jekọp rhe, i ri nẹ Juda rhe ke reuku rẹ igbenu Mẹ; e re Me jẹreyọ ke vwọ re uku, idibo Mẹ ke cha dia etiyin.

¹⁰ Sharọn kọ cha dia otọ re egbri keẹ uchuru Mẹ, iyara re Akọr kẹ asan rẹ ekru rẹ uchuru Mẹ che rhuẹ phihọ, vwọ kẹ ihwo Mẹ re guọnọ ovwẹ.

¹¹ Ẹkẹvuọvo vwọ kẹ wẹ rọ sen Ọrovwohwo na, rẹ ugbenu ọfuanfon Mẹ chọẹro, ro mu imẹjẹ phihọ otọ kẹ ephaẹbọ re gua iko rẹ idi vwọ kẹ Urhiẹvwe;

¹² Ke Me vwẹ owẹ kẹ ọlọkọ, ovwan ejobi ki che gbe uyovwi phihọ otọ kẹ ọ ro hwe ihwo na; fikiridie, ọke Mi vwo se, wo nyori-i, ọke Me vwọ ta ota, wọ kerhọ-ọn, ẹkẹvuọvo wo de ru umwemwu vwẹ obaro Mẹ, wọ da jẹ obo ri tu vwe oma .

¹³ Fiki rẹ ọtiọye na enẹ Ọrovwohwo Ọghẹnẹ tare: Nighere, idibo Mẹ cha re emu, ẹkẹvuọvo owẹvwe che hwe we, nighere, idibo mẹ cha da udi, ẹkẹvuọvo urhuru che hwe we, nighe, idibo Mẹ cha ghọghọ, ẹkẹvuọvo oma cha vo owẹ,

¹⁴ nighere, idibo Mẹ cha so ine fiki rẹ aghọghọ rọ hẹ udu rayen ẹkẹvuọvo wọ che kperi fiki rẹ ọdjadja rọ he udu wẹn, wo che beroma fiki rẹ ọdjarhe re erhi wẹn.

¹⁵ Wọ cha yan jẹ odẹ wẹn vwo kẹ ọ re Me jẹreyọ na vwọ harhe ekan, Ọrovwohwo rẹ Ọghẹnẹ ko ghwie we hwe, ẹkẹvuọvo idibo rọye ko mu odẹ ọfa kẹ ayen.

¹⁶ Vwẹ ọtiọye na ohwo rọ nẹ ẹrhovwo kẹ oma rọye vwẹ otọ na kọ nẹ ẹrhovwo kẹ oma rọye vwẹ oma rẹ Ọghẹnẹ rẹ uyota na, ohwo ro duvwu iyori vwẹ otọ na kẹ odẹ rẹ Ọghẹnẹ rẹ uyota na o vwo duvwo, kidie ukpokpogho rẹ awanre na chọẹro re i sioma nu kẹ ibiẹro mẹ re.

Odjuvwu Ọkpokpọ kugbe Akpọ Ọkpokpọ

¹⁷ Kidie gbe nighe, Me ma idjuvwu ọkpokpọ vẹ akpọ ọkpokpọ, ekuakua rẹ awanre na a gbe karophihọ aye-en eyẹ iroro gbe ra-a.

¹⁸ Ẹkẹvuọvo gba ghọghọ re oma vwerhe owẹ bẹdẹ vwẹ oma rẹ obo re Me mare, kidie nighere, Me ma Jerusalẹm vwọ kẹ omavwerhe, ihwo rọye ke aghọghọ.

¹⁹ Me ghọghọ vwẹ oma ri Jerusalẹm, oma rẹ ihwo Mẹ ke vwerhe ovwẹ, e gbi nyo umri rẹ ovie vwẹ evun rọye-e kugbe ekpere rẹ enu ebro-o.

²⁰ A gbe cha mrẹ vwẹ evun rọye ọfa-a, ọmọ ọboba rọ wan emọ kpo emọ-ọ, eye ọmare rẹ ẹdẹ rẹ ughwu rọye jẹ gba-a kidie omotete ke ikpe ujori o vwo ghwu, oruimwemwu ro te ẹgbukpe ujori yẹ a harherọ.

²¹ Ayen ke bọn iwevwi kẹ ayen dia evun rayen, ayen ke kọn ogba ri vain kẹ ayen re emamọ rọye.

²² Ayen gbe bọn rẹ ohwo ọfa da dia-a, ayen gbe kọn rẹ ohwo da riọ-ọ, kidie kirobo re ẹdẹ re urhe cha dia ọtiọye ẹdẹ rẹ ihwo Mẹ cha dia, ihwo Mẹ re Me jẹreyo na ke cha ghọghọ krekri vwẹ iruo re ayen vwẹ abọ rayen ru.

²³ Ayen gbe wian kufia-a, eyẹ ayen gbi vwiẹ emọ kẹ ughwu-u, kidie ayen ke dia uvwiẹ rẹ ebruphihọ rẹ Ọrovwohwo, te ayen kugbe emọ rayen.

²⁴ Tavwe re ayen ki se ki mi nyo, re ayen je vwo ta ota na ki Mi nyo ayen.

²⁵ Okpohrokpo vẹ ogodẹ ke cha re emu kugbe, ekpẹn kọ cha re ọdi kerẹ erhuẹn, ekpẹn kọ dia emu rẹ ọrọdekọ, ayen gbe woma-a eye ghwọrọ-ọ vwẹ enu rẹ ugbenu ọfuanfon Mẹ ọfa-a, eriyin Ọrovwohwo tare.