Aizaya 63 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹdẹ rẹ Ihri-ẹrio rẹ Ọrovwohwo

¹ Ona ono ro ne Idọm cha na, rọ vẹ iwun rẹ ododo gbe nẹ Bozrah cha, ro muẹ urinrin vwe evun rẹ irhuo rọye, ro chiyẹ cha vwe evun rẹ ogangan rọye rode? Mẹvwẹ, ri ghwoghwo ase ẹriọ, kugbe ẹgba rẹ esivwo.

² Die nẹrhẹ iwun wẹn vwara, rẹ iwun wẹn da họhọ ohwo ro chiyẹ wain vwẹ okọ?

³ Mẹvwẹ ọvo kpoi ri chiyi okọ ri wain na, vwẹ usun rẹ ihwo na ohwo ọvuọvo vwọ ba vwẹ-ẹ, Mi chiyi ayen vwe evun rẹ ophu Mẹ mi de mi ayen vwẹ evun rẹ ivuemiovwo mẹ, ọbara re arhọ rọye na da sare ku iwun Mẹ, Me vwẹ ayen mu iwun Mẹ ejobi.

⁴ Kidie ẹdẹ re irhi ẹriọ ọ hẹ udu mẹ, ikpe mẹ rẹ ẹtan hirhe o te nure,

⁵ Mi niri, ẹkẹvuọvo ọchuko herọ-ọ, ofu dje vwe, ẹkẹvuọvo o vwo ohwo rọ rhe yọnre ovwẹ-ẹ, Etiyin igbabọ mẹ ọvo keye kẹ vwẹ ọbọẹkparọ, ophu Mẹ kọye re yọnrọn ovwẹ.

⁶ Mi chiyi ihwo na muotọ vwẹ ophu Mẹ, Me da vwẹ udi hwe ayen vwẹ ophu Mẹ, Mi de ku ọbara rẹ arhọ rayen ku otọ.

Uyoyovwi rẹ Ọrovwohwo kẹ Izrẹl

⁷ Me Vwẹ obo te otọ kerẹ ẹguọnọ ro jerhẹriẹ rẹ Ọrovwohwo, ejiro rẹ Ọrovwohwo na, kirobo rẹ Ọrovwohwo rhọvwe kẹ avwanre ejobi, kugbe erhuvwu rode rọ vwọ kẹ uwevwi rẹ Izrel rọ vwọ kẹ ayen kirobo rẹ ehrọre rọye epha, kirobo rẹ ẹguọnọ esiri rọye teri.

⁸ Kidie ọ tare, Uyota ihwo mẹ ayen ruẹ, emọ ri jẹ ogbarogba eruo, ke ọye rhe dia Osivwi rayen.

⁹ Vwẹ evun rẹ ukpokpogho rayen ejobi ọye e kpokpori, amakashe rẹ opharo rọye ri sivwi ayen, vwẹ evun rẹ ẹguọnọ kugbe ehrọre rọye ọ da tan ayen, Ọ kpare ayen kpenu ọ de mu ayen vwẹ ọke rẹ awanre ejobi.

¹⁰ Ẹkẹvuọvo ayen gbe ozighi ayen da nẹrhẹ ophu mu Erhi ọfuanfon na, fiki rẹ ọtiọye na ọ da rhoma rhe dia ọvweghre rayen, ekpuyovwi rọye da họnre ayen.

¹¹ Etiyin ọ da karophihọ ọke re awanre, ọke ri Mosis odibo rọye. Tivọ ọ re mu nẹ ame rhe na epha osuigodẹ re ihwo rọye na? Tivọ ọ re phihọ uherevie rayen na epha Erhi ọfuanfon rọye na,

¹² ono ri ru igbabọ rẹ urinrin na nẹ o kpo oborhe ri Mosis, rọ hẹriẹ ame na kẹ ayen wan rọ vwọ re odẹ re rara kẹ oma rọye,

¹³ ono ri sun ayen wan evun re okokodo na? Kere iyesi vwẹ evun rẹ aton, ayen sheri-i.

¹⁴ Kere uchuru re djẹ rọ iyara, Erhi rẹ Ọrovwohwo da ke ayen urovwoma Ke ọtiọye wo sun ihwo wẹn, re wọ vwọ re odẹ re urinrin kẹ oma wẹn.

Ẹrhovwo kẹ Arodọvwẹ kugbe Ọchuko

¹⁵ Ki ni otọ nẹ obo odjuvwu rhe re wọ mrẹ, nẹ ẹdia ọfuanfon rẹ urinrin wẹn. Tivọ oruru wẹn vẹ ẹgba wẹn epha? Ẹrọerhe re udu wẹn kugbe ehrọre wẹn e si ayen nu kẹ vwẹ.

¹⁶ Kidie we he Ọsẹ rẹ avwanre, dede na nẹ Ebraham riẹn avwanre-e , Izrẹl je mrẹ avwanre vughe-e, we, E Ọrovwohwo, ọye Ọsẹ rẹ avwanre, Ọtan rẹ avwanre nẹ ọke rẹ awanre rhe ọye odẹ wẹn.

¹⁷ E Ọrovwohwo, die wọ vwọ nẹrhẹ avwanre ghwru nẹ idjerhe wẹn, wo vwo ru udu re avwanre gan, me vwo je oshọ wẹn edje? Rhoma fiki rẹ idibo wẹn, uvwiẹ rẹ uku wẹn.

¹⁸ Ihwo efuanfon wẹn vwo ẹshẹ wẹn na ọmọke, ivwighrẹ rẹ avwanre de chiyo wan.

¹⁹ Avwanre da rhe họhọ ihwo ri wo ji sun dẹvo-o, kerẹ ihwo ra vwẹ odẹ wẹn se-e.