Aizaya 52 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọghẹnẹ se Sivwi Zayọn ne Imu rhe

¹ Vrẹn, vrẹn, ku ogangan wẹn phihọ, E Zayọn, ku iwun iyoyovwi wẹn na phihọ, E Jerusalẹm, orere ọfuanfon na; kidie ayen gbe cha vwẹriẹ owẹ ọfa-a otu re upheruphe na kugbe ihwo igbegbe na .

² Phorho iwurhie nẹ oma wẹn, vrẹn; E oghuvwu Jerusalẹm; rhan ọghrọrọ nẹ ohọre wẹn, E oghuvwu ọmọtẹ ri Zayọn.

³ Kidie e nẹ Ọrovwohwo tare. A she wẹ ghevweghe, ka je tan wẹn ọphọphẹ.

⁴ Kidie e nẹ Ọrovwohwo Ọghẹnẹ tare. Ihwo mẹ yanran kpo ljipt ọke rẹ ẹsosuọ ra dia oboyi, ihwo rẹ Asiria de shenyẹ ayen ekueku.

⁵ Asakiephana kidie Mi vwo vwẹ etinẹ, eriyin Ọrovwohwo tare, re di vwo mu ihwo Mẹ yanran ghevweghe? Isun rayen re beroma, eriyin Ọrovwohwo tare, kọke kọke ayen vwọ je odẹ Mẹ fia.

⁶ Fiki rẹ ọtiọye na ihwo mẹ ke riẹn odẹ Mẹ; vwẹ ẹdẹ yena kẹ ayen riẹn nẹ Mẹvwẹ re ta ota na, Mẹvwẹ na.

⁷ Mavọ awọ rayen yovwi te vwẹ enu rẹ igbenu na ayen ihwo re ghwa ikun esiri na rhe, ri ghwoghwo ufuoma, rọ ghwa ikun esiri oyoyovwi, ri ghwoghwo esivwo, rọ ta kẹ Zayọn, Ọghẹnẹ wẹn herọ ria uvie.

⁸ Kerhọn rẹ ọrherotọ wẹn re kpare urhuru rayen kpenu, ayen ejobi re koko so ine; kidie ayen ohwohwo cha mrẹ ohwo ọke re Ọrovwohwo de che rhivwi rhe Zayọn.

⁹ We koko va so ine, ovwan asan ifefe ri Jerusalẹm, kidie Ọrovwohwo bru ihwo rọye uche, ọ tan Jerusalẹm hirhe.

¹⁰ Ọrovwohwo ban igbabọ ọfuanfon rọye phihọ vwẹ irhanro rẹ egborho na ejobi; oba rẹ akpọ na ejobi ke cha mrẹ esivwo rẹ Ọghẹnẹ rẹ avwanre.

¹¹ Yanran, yanran, yanran nẹ etiyin, wọ vwẹ obọ te emu ogbegbe-e; yan ne uherevie rọye, ru oma wẹn fon, ovwan ihwo re ghwa ekuakua rẹ Ọrovwohwo.

¹² Kidie wo bru okpakpa ro otafe-e, ọ je dia ugbonẹ-ẹ, kidie Ọrovwohwo cha ka obaro kẹ wẹ, Ọghẹnẹ rẹ Izrẹl na ka obuko kẹ wẹ.

Ojaẹrio rẹ Odibo rẹ Ọrovwohwo

¹³ Nighe, odibo Mẹ ko che yovwi, ke muo kpenu phelephele, ko kpenu gangan.

¹⁴ Ihwo buebu da mrẹ ko gbe ayen unu– oma rọye mwumwerhe, ohwo gbi se vughe-e, ekroma rọye nọ ọ re emọ re ihwo–

¹⁵ eriyin ko gbe buebu unu; ivie ki rhurhu unu fiki rọye, kidie obo ra je ta kẹ aye-en kọye ayen cha mrẹ, obo rẹ ayen ji nyo jovwo-o, kẹ ayen cha mrẹ vughe.