Aizaya 48 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Aroẹmre kpahe Emu Ekpokpo

¹ Nyo Ọnana, E uwevwi ri Jekọp, ra vwe odẹ re Izrẹl se, ri nẹ agada ri Juda rhe, re vwẹ odẹ rẹ Ọrovwohwo duvwu iyori, re rhọvwe odẹ rẹ Ọghẹnẹ re Izrẹl, ẹkẹvuọvo o dia uyota vẹ ọsoso-o.

² Kidie ayen vwẹ odẹ rẹ orere ọfuanfon na se oma, ayen da vwẹ ẹro so Ọghẹnẹ rẹ lzrel na, Ọrovwohwo rẹ otuofovwi na ọye he odẹ rọye.

³ Emu ri jovwo na Me tare rhabae rhe, i nẹ unu mẹ rhe Me da vwẹ ayen phia, kpregede na Mi de ru ayen i de ghine rhi ru.

⁴ Fikiridie Me rlenre nẹ wo vwo udu, ohọre wẹn irien rẹ utehru arhanre wẹn kẹ ẹronvwo,

⁵ Mi dje ayen kẹ wẹ nẹ awanre rhe, tavwe re ke phia yi Mi ghwoghwo ayen keẹ wẹ nure, eyẹ wo da rha tanẹ, Oma mẹ ri ru ayen, oma re bru ona phihọ kugbe oma ra wranre ri ji urhi na kẹ ayen.

⁶ Wo nyori; Asakiephana gba mrẹ enana ejobi; wo gbi se dje phia-a? Ne ọke nana yanran Mi ru we vwo nyo imu ekpokpọ, imu re djahere ru wọ je riẹ-ẹn.

⁷ A ma ayen vwẹ Asakiephana, i ji kri nọ-ọ, rhi te nonẹ na wo ji nyo aye-en, wọ da rha tanẹ, Nighere, Me riẹn ayen jovwo-o .

⁸ Wo ji nyo dẹvo-o wo je riẹn devo-o, ne awanre rhe erhọn wẹn ji rhie-e. Kidie Me riẹnre nẹ wo se ru emu ogbarogba, ne nẹ ọke evwiẹ we rhe we onogbozighi.

⁹ Fiki rẹ odẹ mẹ ke Me nyẹ ophu mẹ, fiki re ejiro rẹ odẹ Mẹ Me vwọ daji kẹ wẹ, rere Mi vwo ju we ẹnyavwọ kuefia.

¹⁰ Nighere, Me fa weẹ, ẹkẹvuọvo ọ dianẹ kerẹ idọnọ-ọ. Me davwe owẹ vwe ogidi erhanre rẹ ukpokpogho

¹¹ Fiki rẹ odẹ Mẹ, fiki rẹ odẹ mẹ, Mi ruo. kidie e vwo gbe odẹ mẹ ẹgua? Urinrin mẹ Me sa vwọ kẹ ohwo ọfa-a.

Ọrovwohwo re ra Tan Izrẹl

¹² Kerhọn mẹ, E Jekọp, kugbe Izrẹl, ri mi seri! Mẹvwẹ Ọye, Mẹvwẹ ọ rọ ẹsosuọ je Mẹvwẹ re cha ka oba.

¹³ Obọ Mẹ Me vwọ tọn uchivwo rẹ otọ na, obọrhe Mẹ re riẹn idjuvwu na phihọ ọke Mi vwọ sa ayen ayen de mudia kugbe.

¹⁴ Ghwẹ oma koko, ovwan ejobi, re we nyo! Ono vwẹ usun rayen ri dje imu nana? Ọrovwohwo na guọnọ, o che ru obo ro rori na gba vwẹ oma ri Babilọn, igbabọ rọye cha riẹn kpahe ihwo ri Kaldia.

¹⁵ Mẹvwẹ, Mẹvwẹ vẹ ekpuyovwi Mẹ ta nure mi ji se nure, Mẹvwẹ re reyerọ rhe, ko yovwi kẹ vwẹ idjerhe rọye,

¹⁶ Si kẹre ovwẹ, nyo ọnana; nẹ otọ rhe Me je ta ota vwẹ odjahọ-ọ, nẹ ọke rọ vwọ herọ rhe ye Me herọ nure. Asakiephana Ọrovwohwo Ọghẹnẹ ri ji vwe kugbe Erhi rọye.

¹⁷ Enẹ Ọrovwohwo tare, Ọtan wẹn, Ọfuanfon Ọvuọvo rẹ Izrẹl na. Mẹvwẹ Ọrovwohwo Ọghẹnẹ wẹn, ro yono uwe vwọ mrẹ erere, ro sun we vwẹ idjerhe ru wọ cha wan na.

¹⁸ E ọ dianẹ ke wọ kerhọn rẹ irhi Mẹ! Mane ufuoma wẹn ka dia kerẹ urhie, ọvwata wẹn ka dia kerẹ omimi rẹ urhie,

¹⁹ uvwiẹ wẹn ka dia kerẹ ibiekpẹn rẹ otọ orua wẹn kọ họhọ ibieka rọye, a gbe sa nyavwe odẹ rayen kufia-a eyẹ vwọ ghwọrọ ayen nẹ obaro mẹ-ẹ.

²⁰ Yanran nẹ Babilọn, dje nẹ Kaldia, dje ọna phia vẹ aghọghọ, ghwoghwo, jọ yanran kpo oba re akpọ na; tanẹ, Ọrovwohwo na tan odibo rọye Jekọp nure!

²¹ Ro vwo sun ayen wan aton na urhuru rẹ ame si aye-en; ọ da vwẹ ame nẹ oragha kẹ ayen da; ọ bẹre oragha na ame da mwavwe no rhe.

²² O vwo ufuoma-a, eriyin Ọrovwohwo tare, vwọ kẹ ọruimwemwu-u.