Aizaya 44 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọrovwohwo ọvo ọye hẹ Ọghẹnẹ

¹ Ẹkẹvuọvo Asakiephana nyo, E Jekọp odibo mẹ, Izrẹl re me jẹreyọ na.

² Enẹ Ọrovwohwo rọ ma wẹ na tare, rọ mama owẹ nẹ evun rhe na kọ cha wẹ uko. Wọ djẹ oshọ-ọ, E Jekọp odibọ mẹ Jeshurun re me jẹreyọ.

³ Kidie mi ku ame phihọ otọ rẹ ọsha, ito ke dje nẹ otọ ọyaya rhe, Ki mi ku Erhi mẹ ku uvwiẹ wẹn erhọvwo mẹ vwọ kẹ emọ wẹn.

⁴ Ayen ki che yoro phia kerẹ odi vwẹ evun rẹ ame, kerẹ odi vwẹ enu rẹ ame rọ djẹ ọkẹre,

⁵ Ọnana me tanẹ, Mẹvwẹ ọ rẹ Ọrovwohwo, ọfa me vwẹ odẹ ri Jekọp fa oma, ọfa mi si phihọ obọ rọye nẹ, Ọ rẹ Ọrovwohwo, o mi mu odẹ rivẹ kẹ oma rọye nẹ Izrẹl,

⁶ Enẹ Ọrovwohwo tare nẹ, Ovie rẹ Izrẹl vẹ Ọtan rọye Ọrovwohwo rẹ otuofovwi na: Mẹvwẹ ọ rẹ ẹsosuọ Mẹvwẹ ọ rọ ka oba Ọghẹnẹ ọfa gbe herọ vrẹn vwẹ-ẹ.

⁷ Ono re họhọ ovwẹ? E jẹn ọ rhọvwọ, e jọ ta ro dje phia kẹ vwẹ mrẹ Onọ ri ghwoghwo obo re cha phia nẹ awanre rhe? Gbe jẹn ayen ta kẹ avwanre obo ri che ru vwẹ obọ.

⁸ Wọ djẹ oshọ-ọ, eyẹ wo bru udu-u, Me rha vuẹ wẹ jovwo nẹ awanre rhe-e? Ovwan ọye iseri mẹ! Ọghẹnẹ ọfa je herọ nọ vwẹ? O vwo Oragha ọfa-a, Me je riẹn ọfa-a.

Edjọẹgọ Ugheghẹ Diodi

⁹ Ihwo re kare oma ejobi emu diodi, kugbe obo ri je ayen ejobi na fi erere ọvuọvo-o; iseri rayen mrorẹ-ẹ eye e je riẹ-ẹn, Me cha vwe omaẹvuọ kẹ ayen.

¹⁰ Ono re kare ẹdjọ eyẹ ono ri duvwu oma, ro vwo erere ọvuọvo-o na?

¹¹ Nighere, a cha vwẹ omaẹvuọ kẹ ihwo rọye ejobi ghwẹ koko, jẹn ayen mudia phia, oshọ che mu ayen, oma cha vọ ayen ejobi kugbe.

¹² Odjogun ri duvwuro, vwẹ erhanre rẹ esia, ọ da vwẹ umomo rọye vwọ ghwiẹ, ọ da vwẹ owanvwe djuo, owẹvwe de rhi hwe oma da rhọ, ọ mrẹ ame da-a oma ko ro.

¹³ Oruona da vwẹ ufi ma, ọ da vwẹ ubi sio, ọ da vwẹ ughugha phia ọ da vwi kompas vwọ ma, ọ da rhe karọ phihọ ohwo, vẹ erhuvwu rẹ ohwo, rọ dia uwevwi.

¹⁴ O de she igẹdu teye otọ, ọ da sanọ omamọ rẹ ọhahe eyẹ owangha ọ da fọ kẹ rere ọ rho kpo omamọ rẹ urhe vwẹ evun rẹ egbo na, ọ da kọn igẹdu osio da nabọ ghẹrẹ.

¹⁵ Etiyin o de rhi hirhe phihọ urhe re vwo mu erhanre ọ reyọ abọvo rọye ọ de vwo koko erhanre kẹ oma rọye rere ọ dia, ọ vwi ro koko erhanre ọ da kaka ikara vwọ, o vrẹn ọ da vwẹ abọ ro chekọ kare oma ọ da gọ, ọ da vwọ kare oma re bru ona phihọ o de she diguẹ kẹ.

¹⁶ Abọvo rọye ọ torherẹ vwẹ erhanre; abọvo ro chekọ kọye ọ vwọ re eranvwe, ọ da vwẹ eranvwe tọn evun da vọn, ọ da je dia erhanre rọye, tanẹ, Eghwo, Oma mẹ tuabọre, me mrẹ erhanre re.

¹⁷ Abọvo ro chekọ ọ da vwọ kare ẹdjọ, kẹ oma rọye; o shiguẹ kẹ ọ da gọ, ọ da nẹ ẹrhovwo kẹ tanẹ, sivwi vwe, kidie wọwẹ ọye Ọghẹnẹ mẹ.

¹⁸ Ayen riẹnre-c, eyẹ ayen vughe-e, kidie o rhurhu ẹro rayen, o gbi jẹn ayen mrorẹ-ẹ, o rhurhu udu rayen, o gbi jẹn ayen riẹn otọ rọye-e.

¹⁹ O vwo ohwo ro roro-o, eyẹ o vwo erianriẹn eyẹ evughe rọ vwọ tanẹ, Ubro rọye me torhẹre vwẹ erhanre nure, me da vwẹ esia rọye kake ikara, Me vwe eranvwe tọn me je riọ nure, kẹ ephraphrẹ ri chekọ na me rhoma vwo gbe ẹgua? Ki mi shiguẹ kẹ ubro rẹ urhe?

²⁰ Ọ ria iwurhie; udu ra phienre sunro ghwru nure, o gbi se sivwi oma rọye-e tanẹ. O gbi rhe vwo efian vwẹ obọrhe mẹ na-a?

Ọrovwohwo he Ọtan rẹ Izrẹl

²¹ Karophihọ imu nana, E Jekọp, kugbe Izrẹl, kidie wẹ odibo mẹ, Mẹvwẹ re ma wẹ, wẹ ke odibo mẹ, E Izrẹl wọ sa chọro ovwẹ ẹro-o.

²² Mi hwerhe orukuruku wẹn kerẹ ikoro, umwemwu wẹn kerẹ evwru, rhivwi rhe, kidie me tan wẹ nure.

²³ So ine, E idjuvwu, kidie Ọrovwohwo ruro nure; kperi, E ovwan ikokodo rẹ akpọ na, van so ine, E igbenu na, E egbo, kugbe urhe kurhe rọ herọ! Kidie Ọrovwohwo tan Jekọp nure, ka vwẹ urinrin kẹ vwẹ Izrẹl.

²⁴ Enẹ Ọrovwohwo tare, Ọtan wẹn, rọ mama owẹ nẹ evun rhe: Mẹvwẹ Ọrovwohwo, rọ ma emu ejobi rẹ ọye ọvo vwẹ idjuvwu na tan, rọ riẹn akpọ na phihọ–Kono vẹ ovwẹ gba herọ

²⁵ ono re ta echa re evwọrọn efian na na, ro vwẹ otu re bọ epha na ru ẹkpa, rọ rhan ẹvwaghwanre rẹ ẹkpa kpo uko kugbe erianriẹn rayen ẹkpa.

²⁶ Ono ri ru ota rẹ odibo rọye gan, ro ru iroro rẹ iyinkọn rọye, ono re ta kpahe Jerusalẹm, nẹ, A cha rhoma dia kugbe irere ri Juda nẹ, A cha rhoma bọn ayen, ke me kpare igbẹhẹ ri sheri na vrẹn mudia;

²⁷ onọ re ta kẹ ikokodo na nẹ, Kpọ, yamu, ki mi ru irhie wẹn na kpọ fiotọ,

²⁸ rọ ta kpahe Sairọs, Ọye osuigegede mẹ, ko che ru iroro mẹ ejobi gba; kọ ta kpahe Jerusalẹm, nẹ, Ka cha bọn wẹ, vwọ kpahe uwevwi na nẹ, Ka cha tọn uchivwo wẹn phihọ otọ.