Aizaya 42 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Odibo rẹ Ọrovwohwo na

¹ Nighere, odibo mẹ, re me vwẹ obọ mẹ yọnre, ọ re me jereyọ, ọ re erhi mẹ guọnọre; Mi phi erhi mẹ phihọ oma, kọye che brorhiẹ rẹ ọsoso kẹ ẹgborho na.

² O che kperi-i, eyẹ o che rhie unu-u, e che nyo umri rẹ ekpere rọye vwẹ evun rẹ urhuvwu-u,

³ ugbẹn rẹ eyareya dede o se vwirho-o, urhukpẹ rẹ evwri yẹrẹyẹrẹ o se fuo-o, orhiẹ rẹ uyota vẹ ọsoso ọye o che bru.

⁴ Ọ cha bẹ-ẹn eyẹ ke ofu dje-e bẹsiẹ rọ vwẹ ọsoso vwo chivwi akpọ na, erhuru na ejobi ke cha hẹrhẹ urhi rọye.

⁵ Enẹ Ọghẹnẹ tare, Ọrovwohwo na, rọ ma idjuvwu rọ da nabọ riẹn phihọ na, rọ riẹn akpọ na phihọ vẹ obo re djẹ no rhe ejobi, rọ vwẹ ẹnwẹn kẹ ihwo re dia evun rọye kugbe erhi kẹ ihwo re yan vwẹ evun rọye.

⁶ Mẹvwẹ Ọrovwohwo, vwẹ evun rẹ ọvwata mẹ mi de se we, Me yọnrọn owẹ obọ mẹ da sẹro wẹ, Me da vwẹ owẹ kerẹ ọphọ vwọ kẹ ihwo na, urhukpẹ vwọ kẹ ẹgborho na,

⁷ rere o rhie ẹro ri rhuru, rọ reyọ ihwo re muru nẹ uwodi rhe, rọ reyọ ihwo re hẹ evun rẹ ebri rhe.

⁸ Mẹvwẹ Ọrovwohwo, ọye odẹ mẹ; urinrin mẹ me sa vwọ kẹ ohwo ọfa-a, eye ejiro me vwọ kẹ ema ra mare-e.

⁹ Nighere, imu rẹ awanre na e wanvrẹn nure, imu ekpokpọ keye me vwọ phia na, tavwe re ke re phia, ye me ta ayen kẹ ovwan nure.

Ejiro kẹ Ọrovwohwo fiki re Esivwo rọye Rode

¹⁰ So ine kẹ Ọrovwohwo une ọkpokpọ, ejiro rọye nẹ oba rẹ akpọ rhe! Jẹn urhie kperi kugbe obo re yọnrọn ejobi, erhuru na vẹ ihwo re dia ayen.

¹¹ Jẹn aton na kugbe ẹgborho re herọ kpare urhuru rayen, ẹko ri Kedar diare, jẹn ihwo re dia Sela so ine rẹ aghọghọ, jẹn ayen kperi nẹ enu rẹ igbenu na rhe.

¹² Jẹn ayen vwẹ urinrin kẹ Ọrovwohwo, wo ghwoghwo ejiro rọye vwẹ erhuru na ejobi.

¹³ Ọrovwohwo yan phia kerẹ ọgba, kerẹ ohwo rẹ ofovwi rẹ ophu kpare, ọ viẹ phia, o kperi phia, ọ vwẹ ẹgba rọye phia gangan kẹ ivwighrẹ rọye.

¹⁴ Kidie krekri re mi vwo rhurhu unu mẹ, Mi hwe oma mẹ mu me kpahe ota-a. Asakiephana ki mi kperi phia kerẹ aye rọ chuẹ uvwiẹ, Mi se ẹnwẹn reyọ re mi dje ofu.

¹⁵ Ke me guọghọ igbenu rẹ itete vẹ iride, ke me ya ẹbe rayen mu, ki mi hirhe irhie rayen phihọ ibrotọ, etẹrhe rayen ejobi ke yamu.

¹⁶ Ki mi sun irhuẹro wan idjerhe rẹ ayen je riẹn dẹvo-o, vwe ada rẹ ayen jẹ rie-ẹn ki Mi sun ayen. Me rhẹriẹ ebri rọ hẹ obaro rayen phihọ urhukpẹ, asan chochohri ki mi ruo riẹriẹriẹ Enana keye imu ri mi che ru, Me gba cha sen aye-en.

¹⁷ Ka djẹ ayen rhivwi oma kọ vo ayen, re vwẹ ẹro so oma ra mare, re ta ota kẹ oma ra wanre nẹ, Wẹ ẹdjọ rẹ avwanre.

Ehwe re Izrẹl na fi Erere kẹ-ẹ

¹⁸ Nyo, wẹ odierhọn, ni, wẹ orhuẹro, rere wọ mrorẹ,

¹⁹ Kono ri rhuẹro jokpa rẹ odibo Me, eyẹ ono ri dierhọn kere ọyinkọn Mẹ ri mi ji uwevwi? Ono ri rhuẹro kerẹ ohwo ri mi ru fon na, eye ọ ro rhuẹro kere odibo rẹ Ọrovwohwo?

²⁰ Ọ mrẹ imu buebu, ẹkẹvuọvo yo ni so-o, erhọn rọye rhieri, ẹkẹvuọvo jẹ o nyo ẹme-e

²¹ Ivun vwerhe Ọrovwohwo fiki rẹ ọvwata rọye, ro ru urhi rọye rho ro nu urinrin.

²² Ẹkẹvuọvo ọnana ihwo re chori re gborhori, ufi mu ayen ejobi vwẹ evun rẹ unu, ayen de si oma nu vwẹ uwodi; ayen hirhe phihọ emuọre ohwo ro sivwi ayen gbe herọ-ọ emuọre ra mrẹ ohwo ta kẹ nẹ, Rhivwi.

²³ Ono vwẹ usun rẹ ovwan na re sa kerhọn rẹ Ọnana, ro hwe oma mu vwọ kerhọn vwo ọke rọ cha?

²⁴ Ono ri siobọ nẹ Jekọp ke Ofurhie na, Izrẹl keẹ ogbọrhi gborho na? O dia Ọrovwohwo, rẹ ayen ru umwemwu kpahe na, rẹ ayen sa yan phihọ idjerhe rọye-e na rẹ urhi rọye ayen ji se mu ọghọ kẹ-ẹ na?

²⁵ Etiyin o de ku ọtotorhe rẹ ophu rọye kuo kugbe ẹgba rẹ ofovwi rọye, ọ da vwe erhanre riarie phihọ, ẹkẹvuọvo yo riẹnre-e, ọ torhẹre, ẹkẹvuọvo ayen se roro mrẹ-ẹ.