Aizaya 41 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọghẹnẹ rẹ Izrẹl na Muẹro

¹ Fo riẹi re wọ kerhọn mẹ, E etọ rẹ erhuru na, jẹn ihwo na rhiọ ogangan rayen, jẹn ayen bi kẹrẹ, jẹn ayen ta ota, jẹn avwanre ejobi si kerẹ vwe ẹdjọeguo.

² Ọ rọ kparẹ ọvo vrẹn nẹ obaro ọnre rhe ro phiẹ kparobọ vwẹ ichiyi kichiyi? O siobọ nẹ ẹgborho na kẹ, rere ọ vwọ mrasan chiyi ivie na muotọ, ọ me vwẹ ọlọkọ rọye ru ayen kerẹ iwurhie, ọ me vwẹ umurhabọ rọye sa ayen kerẹ iphopho

³ Ọ vwọ tua ayen ọ me djẹ vrẹn ayen gbẹrhẹnẹdẹ vwẹ idjerhe rọ je nene dẹvo-o

⁴ Kono vwẹ ona vwo ru ọnana, ro se orua na nẹ ẹtuọho rhe? Mẹvwẹ, Ọrovwohwo na, ọye ẹsosuọ, kugbe ọ rọ ka oba, Mẹvwẹ ọye.

⁵ Erhuru na ejobi mrẹre oshọ de mu ayen, oba rẹ akpọ na ki muẹ phariẹ, ayen si kerẹ ayen da rhe.

⁶ Kohwo kohwo cha ọrivẹ rọye ukọ, ọ me ta kẹ oniọvo rọye nẹ, je udu wẹn gan.

⁷ Ọwena na phi udu phihọ oduvwiro awọ, ohwo rọ vwẹ ubrogba teyan ọye sa riẹriẹ ọ ta kẹ ohwo ro gbe orhọnrhe nẹ, o yoma, a me vwẹ ubibe hwe re o je phieghe.

⁸ Ẹkẹvuọvo we, Izrẹl. odibo mẹ, Jekọp, re me jẹreyọ na, uvwiẹ rẹ Ebraham, ugbeyan mẹ.

⁹ Wẹ re me reyọ nẹ oba rẹ akpọ na rhe, ri mi se nẹ ibienyẹ oshesheri na rhe, ta kẹ owẹ nẹ, wẹ odibo mẹ, me jẹ wẹ reyọ nure mi rhe se ku we kufia-a,

¹⁰ wọ dje oshọ-ọ, kidie me vẹ owẹ herọ, wo jẹ ofu dje we-e, kidie Mẹvwẹ Ọghẹnẹ wẹn, Me kẹ wẹ ogangan, Me cha wẹ uko, Me vwẹ obọrhe mẹ rẹ ephiokparobọ na vwọ yọnrọn owẹ.

¹¹ Nighere, ihwo re vwọ so wẹ ejobi oma cha vo ayen rẹ ayen de beghe, ihwo ri nene uwe họnra ejobi gbi fi emuọvo-o, kẹ ayen ghwọrọ kufia.

¹² Ku wọ cha guọnọ ihwo re vwọ so wẹ na, ẹkẹvuọvo wọ cha mrẹ aye-en, ihwo ri nene uwe phi ofovwi na gbe cha dia emuọvo kaka-a.

¹³ Kidie Mẹvwẹ, rẹ Ọrovwohwo Ọghẹnẹ wẹn, yọnrọn obọrhe wẹn, Mẹvwẹ re ta kẹ wẹ, Wọ djẹ oshọ-ọ Me sa cha wẹ ukọ.

¹⁴ Wọ djẹ oshọ-ọ, we ri Jekọp re ohori, ovwan ihwo rẹ Izrẹl! Me sa cha we uko, eriyin Ọrovwohwo tare, Ọtan wẹn ọye Ọfuanfon Ọvuọvo rẹ Izrẹl na.

¹⁵ Nighere, Me cha kare uwuye kẹ wẹ, ọkpokpọ, dandan, re bru ako phihọ, ku wọ kporo igbenu na wọ me ghwọrọ ayen, ku wo ru igbenu itete na kerẹ iphopho,

¹⁶ Ku wọ va ehọrọ nẹ ayen, odju ko mu ayen yanran, aphopho kọ hra ayen. Ku wọ ghọghọ vwẹ evun rẹ Ọrovwohwo vwẹ evun rẹ Ọfuanfon Ọvuọvo rẹ Izrẹl na wo de vwo urinrin.

¹⁷ Ọke rẹ ovwiogbere vẹ ọ re akpọ bẹn da guọnọ ame, ye ame herọ-ọ, re ẹrenvwe rọye da yamu vẹ urhuru rẹ ame, Mẹvwẹ rẹ Ọrovwohwo re sa kpahe kẹ ayen, Mẹvwẹ Ọrovwohwo rẹ Izrẹl na sa sen aye-en

¹⁸ Ki mi rhie urhie rẹ ame vwẹ ugbenu oyaya na, ogbugbu ke varhe vwẹ iyara na, ki mi hirhe aghwa na phihọ oku rẹ ame, otọ ọyaya na ko hirhe phihọ ogbugbu rẹ ame.

¹⁹ Ki mi phi igẹdu phihọ evun rẹ aghwa, te ighwẹrughẹ, te ihophe, kugbe oliv, ki Mi che phi owangha phihọ evun rẹ atọn, tẹ iriẹ te egọrọ.

²⁰ rere ihwo vwọ mrẹ vwẹ vughe, re ayen roro re ayen vwọ vughc kugbe, nẹ obọ rẹ Ọrovwohwo ri ru Ọnana, nẹ Ọfuanfon Ọvuọvo rẹ Izrẹl na pẹ marọ.

Ọrovwohwo gbogbọ se Eghẹnẹ rẹ Efian

²¹ Guẹdjọ wẹn phia, eriyin Ọrovwohwo na tare, vwẹ iseri wẹn rhe, eriyin ovie ri Jekọp na tare.

²² Jẹn ayen vwẹ ayen rhe, re ayen kẹ avwanre obo re cha phia. Dje emu rẹ awanre na kẹ avwanre, die ayen epha, rere avwanre roro ayen, rere avwanre roro obo ri che ru phia, eyẹ ta kẹ avwanre obo re cha phia.

²³ Ta kẹ avwanre obo re cha phia vwẹ ẹdẹfa, re avwanre riẹn nẹ wẹ ghinẹ ẹdjọ; ru ọresiri eyẹ ru ọromioma, rere ofu dje avwanre re oshọ mu avwanre.

²⁴ Nighere, wọ dia emuọvo-o, iruo wẹn je hẹ ofefe, Ẹgua kẹ ohwo rọ jẹn wẹ.

²⁵ Me kpare ophu rẹ ohwo ọvo nẹ obọhwẹrẹ ọnre rhe, Ọ ghine rhe nure, nẹ evacha rẹ ọnre rhe, ko se odẹ mẹ; ko che chiyi isun na muotọ kerẹ odo, kirobo rọ ọmẹma na chiyi ekpẹn.

²⁶ Ono ri djere nẹ otọ rhe, rere ma vwọ riẹn, vẹrhe, rere ma vvọ tanẹ, Ọye re gbare? O vwo ohwo ọvuọvo ro djere-e, o vwo ohwo ro ghwoghwiro-o, ohwo ọvuọvo nyo eta wẹ-ẹn.

²⁷ Mẹvwẹ re ka ta kẹ Zayọn, Me da vwẹ aghwoghwọ rẹ ikun esiri kẹ Jerusalẹm.

²⁸ Ẹkẹvuọvo Mi vwo nu Etiyin Me gbe mrẹ ohwo ọvuọvo-o, Vwẹ usun rayen Me mrẹ ọvwiroro-o, rere, Me da nọ ọ kpahe ke vwẹ-ẹ.

²⁹ Nighere, ayen ejobi ophiẹvwe, iruo rayen odiodi, oma ra wranre na odju ofefe.