Aizaya 38 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Hẹzikaya mwa Oga

¹ Vwẹ ọke yena Hẹzikaya kọ mwọga ko muegbe re ughwu. Aizaya rẹ ọmraro na ọmọ ri Amọz de bro rhe, ọ da ta kẹ, Enẹ Ọrovwohwo tare: Rhuẹrẹ uwevwi wẹn phihọ, kidie wo che ghwu, wọ cha sa rhọ-ọ?

² Etiyin Hẹzikaya de hirhe opharo rọye ku igbẹhẹ, ọ da nẹ ẹrhovwo kẹ Ọrovwohwo,

³ ọ da ta, Asakiephana karophihọ, E Ọrovwohwo, me re wẹ, obo me nabọ vwẹ oma kpotọ ncne uwe vẹ udu mẹ ejobi, mi de ru obo ri yoma vwẹ obaro wẹn Hẹzikaya da viẹ gangan.

⁴ Etiyin ota rẹ Ọrovwohwo de bru Aizaya rhe.

⁵ Yanran wọ ra ta kẹ Hẹzikaya, Enẹ Ọrovwohwo tare, Ọghẹnẹ ri Devid rẹ ọsẹ wẹn, Mi nyo ẹrhovwo wẹn. me je mrẹ oviẹ wẹn, nighere, me vwẹ ikpe ihwiori vwọ ba ikpe wẹn.

⁶ Mi sivwi uwe vẹ orere nana nẹ obọ rẹ ovie rẹ Asiria, ke me chochọ rẹ orere nana.

⁷ Ọnana kẹ oka rẹ Ọrovwohwo cha vwọ kẹ wẹ, nẹ Ọrovwohwo che ru emu nana rọ vwẹ unu rọye ve na.

⁸ Nighe, ki mi ru uhoho rẹ ọnre na hirhe kpo obuko o mi re she phihọ ugheghẹ rẹ Ehaz ichiyi ihwe kpo uko. Ọtiọye na ọnre na de rhivwi kpo uko ichiyi ihwe.

⁹ Ọnana obo ri Hẹzikaya ovie ri Juda siri, ọke ro vwo mwọga ro vwo vrẹn nẹ emiavwe na nu.

¹⁰ Me da ta, Vwẹ uvo gbalaka rẹ ẹdẹ mẹ, ọye mi vwo muoyan, A vwo vwẹ kẹ anurhoro rẹ ushi vwẹ ikpe mẹ ri chekọ.

¹¹ Me da ta, Me gbe cha mrẹ Ọrovwohwo ọfa-a vwe evun re otọ rẹ ihwo ekpokpọ, Mi gbi che ni ohwo ọfa-a vwe usun rẹ ihwo re dia akpọ na.

¹² A kọrọ edia mẹ nu o de si nẹ uvwe oma kerẹ aphiana rẹ osuigode, kere ọ ro rhuo amwa, ọtiọye mi kpirhi akpọ mẹ koko, o de bru vwe kufia nẹ usioruru, ne uvo re te ason wo vwo si vwe kere oba rẹ akpọ mẹ.

¹³ Mi de kperi se ọchuko bẹsiẹ rẹ ọke vwo rhie, kere okpohrokpo ọtiọye o vwirhi ibeku mẹ ejobi, nẹ uvo re te ason yu wo si vwe te oba rẹ akpọ mẹ.

¹⁴ Kerẹ ọmọphrorise eyẹ obo ọtiọye me pharha, Mi ro brenu kerẹ inekuku. Oma rhọ ẹro mẹ ri mi vwo nẹ enu na. E Ọrovwohwo, e shenyẹ vwẹ, gba re esarobọ mẹ!

¹⁵ Ẹkẹvuọvo kidie me ta? Kidie ota ọ ta kẹ vwẹ, ekpuyovwi rọye ọvo ji ruo. Ovwerhẹ mẹ ejobi rhanre fiki rẹ ivuemiovwo rẹ erhi mẹ.

¹⁶ E Ọrovwohwo, vwẹ oma rẹ imu na ọye ohwo vwọ rhọ vwẹ evun rẹ enana ọye arhọ rẹ erhi mẹ epha. E vwẹ omakpokpọ mẹ rhivwi rhe vwe rere me vwọ sa rhọ!

¹⁷ Nighe, fiki rẹ erhuvwu mẹ ọye mi vwo vwẹ ivuemiovwo rode na, ẹkẹvuọvo we re da erhi mẹ ji ro vwo jẹ ọgọdọ rẹ ughwu e sheruọ, kidie wẹ ri geri umwemwu ejobi phihọ obuko.

¹⁸ Kidie ushi sa kpẹvwẹ owẹ-ẹ, orivwi se jiri uwe-e, ihwo ri kpo obo ukpotọ nure se vwẹ iphiẹrohọ vwẹ esegbuyota wẹ-ẹn.

¹⁹ Ohwo ọkpokpọ, ohwo ọkpokpọ, ọ kpẹvwẹ owẹ, kirobo ri mi ruẹ nonẹ na, o se dje ke emọ rọye obo re esegbuyota wẹn epha.

²⁰ Ọrovwohwo se sivwi uvwe, Ke mẹ vwẹ akpata so ine vwe ẹdẹ rẹ akpọ mẹ ejobi, vwe uwevwi rẹ Ọrovwohwo.

²¹ Asakiephana Aizaya tare jovwo nẹ, Jẹn ayen reyọ ikara ri fig, re ayen vwo te iribe na, rere oma rọye kpo.

²² Hẹzikaya je ta vẹrhe ne, Didi oka me vwọ riẹn nẹ mi se kpo uwevwi rẹ Ọrovwohwo?