Aizaya 37 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

E sivwi Juda ne Obọ ri Senakerib

¹ Rẹ Ovie Hẹzikaya vwo nyo, ọ da bẹre emwa rọye, ọ da vwẹ esiso rhuo, ọ da yanran kpo uwevwi rẹ Ọrovwohwo na.

² O de ji Eliakim rẹ onotu rẹ evwruwevwi na, kugbe Shebna rẹ osiebe kugbe irherẹn rẹ ekpako na, re vwẹ esiso rhuo, kpo bru ọmraro Aizaya rẹ ọmọ rẹ Amọz.

³ Ayen da ta kẹ, Enẹ Hẹzikaya tare, Nonẹ na ẹdẹ rẹ ivuemiovwo rode, ọ rẹ ekan, kugbe ophọphọvwe; unwe rẹ ọmọ o phire, ẹkẹvuọvo ogangan ra vwọ chuẹ uvwiẹ herọ-ọ.

⁴ Okeọvo ọ me dianẹ Ọrovwohwo rẹ Ọghẹnẹ wẹn nyo eta ri Rabshekeh, re onini rọye ovie rẹ Asiria ji rhe rhe vwẹ Ọghẹnẹ ri bẹdẹ na jehwẹ, rọ da ghwọ fiki rẹ eta na rẹ Ọrovwohwo rẹ Ọghẹnẹ wẹn nyori na; fiki rẹ ọtiọye na gbe jẹn ẹrhovwo ovwan guvwie kpenu vwọ kẹ umuche ihwo ri chekọ.

⁵ Ọke rẹ idibo rẹ Ovie Hẹzikaya vwo bru Aizaya rhe,

⁶ Aizaya da ta kẹ ayen, Ta kẹ onini rẹ ovwan, Enẹ Ọrovwohwo tare Wọ djẹ oshọ vwi fiki rẹ eta nana ru wo nyori na-a, rẹ idibo rẹ ovie rẹ Asiria rhe vwọ bọphiẹ ovwẹ-e.

⁷ Nighere mi che phi erhi phihọ evun, vwẹ ọtiọye na ko che nyo ikun, ko che rhivwi kpo otọ rẹ obọ rọye, ki mi che ruo ro she phihọ obọ rẹ ọlọkọ vwẹ otọ rẹ obọ rọye.

⁸ Rabshekeh de rhivwi rhe, ọ da mrẹ ovie rẹ Asiria rọ họnra Libnah kidie o nyori nẹ ovie na vrẹn nẹ Lashishi

⁹ Asakiephana ovie na de nyo kpahe Tirhakah ovie rẹ Itiopia, nẹ, O rhi nene uwe họnre. Ọke ro vwo nyo, ọ da vuẹ ovuẹ rhe Hẹzikaya, tanẹ,

¹⁰ Enẹ wọ ta kẹ Hẹzikaya ovie ri Juda Wo jẹn Ọghẹnẹ wẹn ro wọ vwẹ ẹro so na phiẹn wẹ vẹ ive rọye nẹ e che se phi Jerusalẹm phihọ obọ rẹ ovie rẹ Asiria-a.

¹¹ Nighere, wo nyo obo rẹ ivie rẹ Asiria ru ke etọ ejobi na, rọ vwọ ghwọrọ ayen tototo. Ko wẹ ọye e ehe sivwi?

¹² Kẹ ẹdjọ rẹ ẹgborho yena sivwi ayen re, ẹgborho rẹ esẹ mẹ ghwọre na, Gozin, Haran, Rezeph, kugbe ihwo rẹ Edẹn ejobi ri Telassar?

¹³ Kẹ ivie ri Hamat, ovie rẹ Arpad, ovie rẹ orere ri Sepharvaim, ovie ri Hena, eyẹ ovie re Ivvah?

¹⁴ Hẹzikaya da reyọ ọbe na mie iyinkọn na, o de se, etiyin Hẹzikaya da yanran kpo uwevwi rẹ Ọrovwohwo, ọ da riẹn ọbe na phihọ obaro rẹ Ọrovwohwo.

¹⁵ Etiyin Hẹzikaya da nẹ ẹrhovwo kẹ Ọrovwohwo.

¹⁶ E Ọrovwohwo rẹ otuofovwi na, Ọghẹnẹ rẹ Izrẹl, wẹ ro tidia ekete vwẹ obenu ri chẹrobim, wọwẹ Ọghẹnẹ na; wẹ ọvo sogono, vwẹ usun rẹ ivie rẹ akpọ na; wẹ re ma odjuvwu vẹ akpọ.

¹⁷ Rhie erhọn wẹn, E Ọrovwohwo, re wo nyo; rhie ẹro wẹn, E Ọrovwohwo, re wọ mrẹ, re wo nyo eta ri Senakerib, rọ vuẹ rhe rhe vwọ jẹ Ọghẹnẹ ri bẹdẹ ehwẹ.

¹⁸ Vwẹ ọ rẹ uyota, E Ọrovwohwo ivie rẹ Asiria ghine vwẹ obọ rayen ghwọrọ irere na ejobi vẹ etọ rayen.

¹⁹ ayen da kpare ẹdjọ rayen phihọ erhanre; kidie ayen dia edjọ-ọ, ẹkẹvuọvo iruo rẹ obọ re ohwo, urhe vẹ oragha, kọye ọ vwọ ghwọrọ ayen.

²⁰ Eriyin Asakiephana, E Ọrovwohwo Ọghẹnẹ rẹ avwanre, sivwi avwanre nẹ obọ rọye, rere uvie rẹ akpọ na ejobi vwọ riẹn nẹ wọwẹ ọvo kpoi re hẹ Ọrovwohwo.

²¹ Etiyin Aizaya rẹ ọmọ rẹ Amọz de ji ohwo bru Hẹzikaya, tanẹ, Enẹ Ọrovwohwo tare, Ọghẹnẹ rẹ Izrẹl. Fikiridie wọ nẹ ẹrhovwo kẹ vwẹ kpahe Senakerib ovie rẹ Asiria,

²² ọnana hẹ ota rẹ Ọrovwohwo ta kpahọ: Ọ jẹ wẹ fia, ọ vwẹ owẹ jehwẹ– ọmọtobẹ ri Zayọn, ọ ro kpogho uyovwi vwẹ obuko wẹ– ọmọtẹ ri Jerusalẹm.

²³ Kono wọ vwọ jehwẹ, ono wọ ghwọ ku? Kono wọ kpare urhuru wẹn vwọ so, re wọ vwẹ ẹro ọbrabra wẹn ni? Ọfuanfon Ọvuọvo rẹ Izrẹl na.

²⁴ Vwẹ oma rẹ idibo wẹn wọ wan phọphọ Ọrovwohwo, wọ da tanẹ, Vẹ ekpẹrẹ rẹ ofovwi mẹ buebu na Eye mi vwo yeri kpo enu rẹ igbenu na, re te obo ẹtan ri Lebanọn, Mi de she igẹdu ri me gro vwọ ejobi, omamọ re owangha re herọ, Mi de rhi te obọ shesheri rẹ ugbenu na, asan obiebi hwi vwẹ egho na.

²⁵ Me da tọn erhare ọ da da ame, Me da vwẹ ẹhẹrhowọ mẹ ru ame na kpọ ame rẹ ito rẹ Ijipt ejobi.

²⁶ Wo ji nyo-o, obo ri mi rori rhabae rhe? Nẹ ọke rẹ awanre rhe me vwọ vwanvwọn phihọ otọ obo re cha phia vwẹ ọke nana, nẹ wa gba ogba riariẹ irere rẹ ovwan ri che kporo hirhe phihọ erhurhu,

²⁷ yẹ ihwo re dia irere rayen, awanre ogangan nẹ ayen oma, ofu dje ayen hwe ayen ki gbiẹi, ayen da họhọ irhe re hẹ evun rẹ aghwa e da họhọ ẹbe ọboba, kerẹ ẹbe rẹ dje phihọ enu rẹ uwevwi, ro vwiori tavwe rọ ke dje phia.

²⁸ Me riẹn etidia otọ wẹn ẹyanran rọye kugbe erhivwi cha rọye, kugbe ẹhọnrọ ru wọ họnre kpahe ovwẹ.

²⁹ Fikiridie wọ rọ họnrọ ovwẹ ri mi de nyo usi rẹ eyan ru wọ yan, ke me vwẹ oghọre mẹ sa unwe rọye ke me vwẹ uwe mẹ vwo we unu wẹn, ke me cha rhan wẹn rhivwi vwẹ idjerhe ru wọ wan rhe.

³⁰ Ọnana kọ cha dia oka vwọ kẹ wẹ, vwẹ enukpe nana, re obo ri mu djẹ, vwẹ ukpe rive, obo re van nẹ otọ ọvuọvo na rhe, ọtiọye na vwẹ ukpe rerha, kọn re wọ vun, kọn ogba ri vain, re wọ re ubi rayen.

³¹ Yẹ ihwo ri ghwu chekọ vwẹ uwevwi ri Juda cha rhoma tan awọ kpotọ, e me rha mọ emamọ vwẹ obenu,

³² kidie otọ ri Jerusalẹm na ọye umuku che nurhe, vwe Ugbenu ri Zayọn usun rẹ ihwo ri ghwu chekọ che nurhe. Oruru rẹ Ọrovwohwo ọvo ri che ru emu nana.

³³ Vwẹ ọtiọye na enẹ Ọrovwohwo na ta kpahe ovie rẹ Asiria, Ọ cha sa rhe orere nana-a, eyẹ ọ cha sa sa odada phihọ-ọ, eyẹ ọ cha vwẹ ubiri rhe-e, yẹ o cha sa ma ibi igbenu riariẹ igbẹhẹ rẹ orere na-a.

³⁴ Idjerhe rọ wan rhe, idjerhe yena ọvo ọ je wan rhivwi, ọ cha sa vwẹriẹ orere na-a, eriyin Ọrovwohwo tare.

³⁵ Kidie mẹvwẹ ọvo re cha chochọ rẹ orere na vwo sivwo, fiki rẹ odẹ mẹ kugbe fiki re odibo mẹ Devid.

³⁶ Etiyin amakashe re Ọrovwohwo da yan phia, ọ da ghwiẹ ihwo odu gbe ujọne gbe iyori vwẹ evun rẹ erhọn rẹ Asiria na, rẹ ihwo vwọ rhọvwọ rhe vwẹ irhiọke re, asan ejobi vọnre vẹ irivwi.

³⁷ Etiyin Senakerib da rhoma, ọ da yanran kpo ra dia Ninivẹh.

³⁸ Ọke rọ vwọ gọ ẹdjọ rọye Nishrọk vwẹ uwevwi rẹ ẹdjọ na re, Adrammelẹk kugbe Sharezar re emọ rọye, da vwẹ ọlọkọ nyavwọ hwe, ayen da djẹ kpo otọ rẹ Ararat Esarha-dọn da re vwẹ ẹdia rọye.