Aizaya 34 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ophu re Ọrovwohwo kpahe Ẹgborho na kugbe Idọm

¹ Bi te ohone, E ẹgborho na, re we nyo, kerhọn, E ihwo na. Jẹn akpọ na kerhon, kugbe obo re vọnrọ ejobi; akpọ na, kugbe obo ri nuro rhe ejobi

² Kidie ophu mu Ọrovwohwo kpahe ẹgborho na ejobi, ophu djọghọ djogho kpahe usun re otu rayen, ọ vwe ughwu ke ayen nure, o siobọ ne ayen ke ehwe

³ Irivwi rayen re hweri ka kpare ayen kufia, ọnrhe re irivwi rayen na che gbo rhe, igbenu na ke cha dje ọkẹre ve oham rayen

⁴ Usun re otu re obo odjuvwu ejobi che gbo kufia, obenu na ko che kpirhi kere eni. Otu rayen ejobi ki che she, kere obo re che kpara ne vain, kere che ri fig rọ kpara she ne urhe rọye

⁵ Kidie ọlọkọ Me da evun vọn vwẹ obo Idjuvwu, nighere, o wotọ rhe ri gu ẹdjọ kpahe Idọm, vwọ kpahe ihwo ri mi brorhiẹ re ughwu hwe nure

⁶ Ọrovwohwo na vwo ọlọko ọvo, ọbara ghwoiri yanka, ivwri ranmuo koi, ve ọbara rẹ imigodẹ kugbe ẹvwe, vẹ ivwri re ibiehun re egbo. Kidie Ọrovwohwo vwo izobo vwi Bozra, ihwehwe rode vwe otọ re Idọm

⁷ Irhuẹn re aghwa re ayen che She, emọ re irhuẹn ra ghwanre kugbe irhuẹn re eshare ride. Otọ rayen cha kpọrhọ ve ọbara, ivwri rayen kọ nẹrhẹ otọ na yovwi,

⁸ Kidie Ọrovwohwo bru ẹdẹ re ihri rọye nure, ukpe re ọsa ehwa fiki re ọbo re ru ke Zayọn.

⁹ Ito re Idọm na ejobi cha kpọ hirhe phihọ ọrhorhe, ibiekpen rọye ki hirhe phihọ ibiekpen re erhanre, otọ rọye kọ hirhe phihọ orhọrhe rọ tuan.

¹⁰ Ason kugbe uvo dede e se fue-e, ivwirhi rọye ko bru kpenu bẹdẹ. Ne edje re te edje erhurhu kọye ọ dia bẹdẹ, ohwo ọvuọvo gbe sa wanvrẹn rhiri bẹdẹ-ẹ

¹¹ Ẹkẹvuọvo ọvo ve osorhue keye re cha dia, okpurhukpurhu ve okpemu keye cha dia. Ko che si usi re ozighi phihọ duvwu, kọ savwe iphọrọ re ozighi rhurhu ikpihwo rọye.

¹² Ke ayen mu odẹ ke ne Uvie he Etiyi-in, isun rọye ke dia emu diodi

¹³ Inwe ke tanrhe vwe ogba ọgangan rọye, ekpia ve idjighe vwe asan odjahọ rọye. Erha ke cha kọghọ Etiyin, edia vwọ ke ogomugọ

¹⁴ Eranvwe re djoma ve uhido ke cha vwa oma, okrohọghowọvo ko che kperi se irivẹ rọye, uyota, ọnye re ason ko che pho rhe, kọ guọnọ asan re omaerovwo ke oma rọye

¹⁵ Ke Etiyin okpurhukpurhu de rovwoma rọ da rhọghọ ọ da sa rọ da vwẹ ibekpe rhurhu emọ rọye; uyota, igodi ke cha ghwe oma koko, dohwo dotu rọye,

¹⁶ Guọnọ ru wọ se ne evun re ọbe re Ọrovwohwo rhe: Ovuọvo re enana se deghe ero-o; ọvuọvo ro je otu evwo gbe sa dia-a Kidie unu re Ọrovwohwo ji urhi nana nure, ye erhi rọye ghwe ayen koko nure.

¹⁷ O vwi fiki rayen vwo mu itẹ, o vwe usi re obọ rọye vwo gharo ke ayen nure, ke ayen vwo bẹdẹ, ne edje ra rọ edje ayen ke cha dia Etiyin.