Aizaya 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọrovwohwo cha vwi Juda vi Jerusalẹm Guẹdjọ

¹ Gbe nighe, Ọrovwohwo na, Ọrovwohwo rẹ ofovwi na, o cha reyọ echoma kugbe ọkpọ nẹ Jerusalẹm kugbe Juda rhe echoma rẹ ikara ejobi, echoma rẹ ame ejobi,

² ọgba kugbe isodje, oguẹdjọ kugbe ọmraro, ọboepha kugbe ọkpako,

³ onotu rẹ ujuvẹ gbe ihwe kugbe ohwo ro fo edje, ọboiroro kugbe ọgba re ewawavwiẹ ohwo rọ hworo ebọ.

⁴ Ke me vwẹ imitete ru ivie kẹ ayen, emọboba ki che sun ayen.

⁵ Ihwo na ki che shenyẹ ohwo ohwo ku ohwo ku otu rọye ku ohwo ku ọrivẹ rọye, omotete ko che yivwaro kpahe ọkpako, orharhe ohwo che yivwaro kpahe omiragua.

⁶ Ọke yena ohwo ko shabọ phihọ oniọvo rọye vwẹ uwevwi rẹ ọsẹ rọye, tanẹ. Wo vwo iwun, ku wọ dia osun kẹ avwanre, erhuihu nana re iwevwi ri sheri na ke dia otọ re isuesun wẹn,

⁷ Vwe ẹdẹ yena kọ ta phia, tanẹ. Me sa dia osivwi-i, vwẹ uwevwi mẹ ikara eyẹ ewun herọ-ọ wọ vwẹ ovwẹ mu osun vwọ kẹ ihwo na-a.

⁸ Kidie Jerusalẹm rọ yẹghrẹ, Juda she nure; fikiridie ota rayen kugbe uruemu rayen vwọ so Ọrovwohwo ayen da phọphọ asan urinrin rọye.

⁹ Ẹbẹbẹrọvo rẹ ayen nẹ na ko se oseri hwe ayen; ayen ghwoghwo umwemwu rayen kerẹ Sodọm, ayen sionẹ-ẹ. Ekan kẹ ayen! Fikiridie ayen ọvo so okpetu nana kẹ oma rayen.

¹⁰ Ta kẹ evwata nẹ oyovwi kẹ ayen, fikiridie ayen cha re emamọ rẹ uruemu rayen

¹¹ Ekan kẹ oruimwemwu! kọ cha bra kẹ, kidie obo rẹ abọ rọye ruru ke eriyin e ji ru kẹ.

¹² Ihwo mẹ imitete ki shenyẹ ayen, eya ki che sun ayen. E ihwo mẹ, isun rẹ ovwanvwan sun ovwan ghwru, ayen de phi ozighi phihọ ada rẹ ovwan.

¹³ Ọrovwohwo mudia ẹdia rọye ro che vwo nene ayen ghwọre, o mudia ro che vwo brorhiẹ rẹ ihwo rọye re.

¹⁴ Ọrovwohwo o mu ẹdjọ phihọ eguo re, ọ vẹ ekpako na kugbe isun rẹ ihwo rọye. We re ghwọrọ ogba ri vain na, ekuakua re ivwiogbere na hẹ uwevwi wẹn.

¹⁵ Die wo rori ru wọ vwọ guọghọ ihwo mẹ ru we vwo wuye opharo rẹ ovwiogbere? eriyin Ọrovwohwo rẹ ofovwi tare

Ẹdjọeguo kpahe Emetẹ ri Zayọn

¹⁶ Ọrovwohwo tare: Fikiridie emetẹ ri Zayọn vwo ọnko ayen riẹn ọhọre kerẹ obo re yan frẹfrẹ vwiovwio ẹro rayen, re erọvwọ rẹ awọ rayen tue,

¹⁷ Ọrovwohwo cha vwẹ ogbẹn ghwiẹ uyovwi emetẹ ri Zayọn, kọ cha ba odjahọ rayen phihọ.

¹⁸ Vwẹ ẹdẹ yena Ọrovwohwo ko che si erhuvwu rẹ erọvwọ re abọ no te umuyovwi, te osunsun;

¹⁹ te ibi rẹ ejọrọn ri phieghe, to shẹshẹghẹ, te adja,

²⁰ te omerho te umuabọ te emekpo, te emekpeti rẹ ishani, te igbabọ,

²¹ te isa rẹ obọ, te isa rẹ unwe,

²² te ewun rẹ orẹ, ukpo, adagba kugbe ekpo ra vwọ yọnrọn obọ,

²³ ewun re ọga, ewun rẹ ikoti, emerhu kugbe oga rẹ igheoghro.

²⁴ Kpe rẹ ishani ọnrhe kọye che gbo phia; vwe asan rẹ umuehu, ke ufi; kpe re ẹton ra riẹn me kẹ akpan, kpe rẹ omamọ rẹ adagba, kẹ erharhimi; kpe rẹ erhuvwu, kẹ omaẹvuọ.

²⁵ Eshare wẹn kẹ oda e wan kpo, egba rẹ eshare na kẹ ofovwi e wan kpo.

²⁶ Inurhoro rọye ke cha viẹ ki muomahọ, a da ghwọrọ nure kọ broma phihọ otọ.