Aizaya 29 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ariẹl vẹ Ivwighrẹ Rọye

¹ E Ariẹl, Ariẹl, wẹ orere ri Devid muerhọn phihọ na! vwẹ ukpe ba ukpe; jẹn orẹ na rhe vwẹ ọke rọye.

² Dede na oma cha rhọ Ariẹl, e che beroma a cha viẹ vwọ, kọ cha họhọ Ariẹl kẹ vwẹ.

³ Ki mi che mu ohẹrhẹ riariẹ owẹ phihọ ke me cha kpare imu vwọ so owẹ vẹ uwevwi rẹ ohẹrhẹ wẹn ke me gba ogba rẹ ohẹrhẹ vwọ so igbẹhẹ wẹn.

⁴ Etiyin nẹ obo okokodo rẹ akpọ na wọ da ta ota phia, vwe ọbo otọ rẹ iwurhie ota wẹn che nurhe; urhuru wẹn cha mra nẹ evun rẹ otọ rhe kerẹ urhuru rẹ orivwi, ota wẹn kọ họhọ ophiọrọ re gbe nẹ iwurhie na rhe.

⁵ Ẹkẹvuọvo ivwighrẹ re pha gbidi na họhọ iwurhie vworo vworo, ihwo gbidiki ri siaro na ke họhọ iphopho ri nene odju yanran. Erọẹbrẹ na, kpregede.

⁶ Ọrovwohwo rẹ otuofovwi na kọ vwẹriẹ akuọrha wẹn vẹ agbrara te otọ ro kpogho kugbe edo rode, vẹ ogiribo kugbe odju vẹ erhanre rọ la rọ ghwọrọ.

⁷ Egborho na ejobi ri nene Ariẹl họnra na, ihwo ejobi re họnrọ na re guọghọ ogba ọgangan rọye re ghwọrọ oma na, ke cha họhọ evwerhẹ vwẹ ọke rẹ ason.

⁸ Kerẹsiẹ rẹ ohwo rẹ owẹvwe hwe a da rẹ emu vwẹ ẹvwerhẹ ọ rhọvwọ rhe kẹsiẹye owẹvwe ke gan, eyẹ kerẹsiẹ rẹ ohwo re urhuru rẹ ame siẹ da da ame vwẹ evwerhẹ ọ rhọvwọ rhe kẹsiẹye urhuru rẹ ame ke gan, eriyin ẹgborho nana ejobi ri nene Ugbenu ri Zayọn họnra na cha dia.

Eroẹrhuọ vẹ Omeru rẹ Izrẹl

⁹ Ru oma wẹn phihọ ẹkpa ru wọ dia mimi, rhu ẹro wẹn ru wo rhuẹro. Jẹn oma mu we, ẹkẹvuọvo ọ dia udi-i, gele, ẹkẹvuọvo ọ dia ọ rẹ udi ọganga-an.

¹⁰ Kidie Ọrovwohwo ku erhi rẹ okpovwerhẹ ku we, o ki rhe rhurhu ẹro rẹ ovwan rẹ emraro na, o rhurhu iyovwi rẹ ovwan rẹ ọmrẹ na.

¹¹ Eta ra arọẹmrẹ nana ejobi rhi hirhe phihọ ota rẹ obe ra tangbe. Ọke ra da vwọ kẹ ọvo no gbe se re, ne, Se ọnana, ọ da ta, Mi se se-e, kidie a tanrọ gbe.

¹² Ọke ra da rha reyọ ọbe na kẹ ohwo ro se se-e, tanẹ, Se ọbe nana, o da ta, Mi se se-e.

¹³ Ọrovwohwo na da ta: Fikiridie ihwo nana vwẹ ugbunu rayen si kẹre ovwẹ ayen da vwẹ ẹbẹrunu rayen mu ọghọ kẹ vwẹ, yẹ udu rayen sheri kẹ vwẹ, oshọ mẹ rayen djẹ da dia urhi rẹ ihwo rẹ akpọ re erianriẹ rẹ ayen yono phihọ uyovwi;

¹⁴ fiki rẹ ọtiọye na, nighe, me cha rhoma vwẹ ihwo nana ru emu rẹ igbunu, emu rẹ igbunu rode, aghwanre rẹ ọvwaghwanre rayen na ejobi ke guọghọ, evughe rẹ ihwo re mrẹ emu vughe ejobi ke che sionu.

¹⁵ Ekan kẹ otu ri si aghwanre rayen nẹ kokodo kẹ Ọrovwohwo, ri ruẹ uruemu rayen vwẹ evun rẹ ebri, re tanẹ, Kono mrẹ avwanre? Kono riẹn avwanre?

¹⁶ Wa gare erọvwọ vi otọ! Ke se ọmema na nẹ ọphie o ruẹ, re obo ra mare da ta kẹ ọ rọ marọ nẹ; O ma vwẹ-ẹ eyẹ obo ra mare da ta kẹ ọ rọ marọ nẹ, wo vwo obọ-ọ?

Ẹtanhirhe rẹ Izrẹl

¹⁷ O gbe dianẹ ọmọke krẹ ri chekọ-ọ ri Lebanọn vwọ rhoma hirhe phihọ udju esiri, ra da vwẹ udju esiri na vwo roro egbo?

¹⁸ Vwẹ ẹdẹ yena idierhọn ki che nyo eta rẹ ọbe, vwẹ evun rẹ oma emuophihọ kugbe ebri rayen ẹro rẹ orhuẹro cha mrẹ.

¹⁹ Ihwo dẹndẹn cha mrẹ aghọghọ ọkpokpọ vwẹ evun rẹ Ọrovwohwo, ovwiogbere vwẹ usun rẹ ihwo na cha ghọghọ vwẹ Oma rẹ Ọfuanfon Ọvuọvo rẹ Izrẹl na.

²⁰ Kidie ihwo zizighi ejobi che hirhe phihọ emu diodi, otu rẹ e jehwẹ cha fọ, otu re rhẹrẹ re ivwo ru umiovwo e che bru ayen kufia,

²¹ ohwo rọ vwi fiki rẹ ota sanọ oma phia phihọ ogbeku, rọ kpahe ufi kẹ ohwo rọ ghwọ kuo vwẹ anurhoro, vwi fiki orẹ ofefe djẹ ohwo rọ re ase kufia.

²² Vwẹ ọtiọye na enẹ Ọrovwohwo tare, ọ rọ tan Ebraham rhivwi, kpahe uwevwi ri Jekọp: Oma gbe vọ Jekọp bẹdẹ-ẹ, opharo rọye gbe fon mune mune ọfa-a

²³ Kidie ọke rọ vwọ mrẹ emọ rọye, iruo re obọ mẹ, vwẹ uherevie rọye, kẹ ayen ru odẹ mẹ fon; ke ayen ru Ọfuanfon Ọvuọvo ri Jekọp na fon, ke ayen mudia vẹ udidi vwẹ obaro rẹ Ọghẹnẹ rẹ Izrẹl na.

²⁴ Otu ri ghwruru vwẹ erhi ki che vwo eruọ, otu ri guẹ huhuhu ke cha rhọvwe uyono.