Aizaya 28 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ekpogho obọ phihọ Ifrem Ẹro

¹ Ekan kẹ erhu rẹ uvie rẹ eheri rẹ ọgbaudi rẹ Ifrem, kugbe ododo ro vwioro rẹ urinrin rẹ erhuvwu rọye, rọ he enu rẹ uyovwi rẹ iyara oyoyovwi rẹ ihwo rẹ udi muẹ.

² Nighe, Ọrovwohwo na vwo ọvo rọ dia ọgba rọ ganre; kerẹ ogiribo rẹ osio rẹ elalọ aphopho rọ ghwọrọ, kerẹ aphopho rode, ame ro kuẹ reghe reghe, gidi gidi na ọ cha vwọ ghwiotọ.

³ Erhu rẹ uvie rẹ eheri rẹ ọgba rẹ idi rẹ Ifrem ke che chiyo wan,

⁴ kugbe ododo ro vwioro rẹ urinrin rẹ erhuvwu rọye, rọ he enu rẹ uyovwi rẹ iyara oyoyovwi, kọ họhọ fig rọ ka vware rẹ uvo ki te, rẹ ohwo da mrẹ, ọ me ghwa riọ re siẹ obọ rọye de te.

⁵ Vwẹ ẹdẹ yena Ọrovwohwo rẹ otuofovwi na ko dia erhu rẹ uvie rẹ urinrin, kugbe irhu rẹ erhuvwu, kẹ umuku rẹ ihwo rọye;

⁶ kugbe erhi rẹ ọsoso kẹ ohwo ro tidia brorhiẹ, kugbe ogangan kẹ otu re rhan ofovwi rhivwi vwẹ ughere.

Obọekpogho kugbe Ivẹ re ve kẹ Jerusalẹm

⁷ Enana ejobi na re kpogho vẹ idi, idi egangan re mu ayen gele; te orherẹn vẹ ọmraro re gele vẹ idi gangan, ayen ghwruru vwi jẹn obaro enote, ayen beghe vwẹ orhiebro

⁸ Kidie imẹjẹ ejobi vọnre vẹ obo ra kpare, o vwo asan rẹ inuhu kanre-en.

⁹ Kono o yono aghwanre, kono ọ faotọ re ovuẹ na kẹ? Ke emọ re bru evie nure gbine e re mu je evie vwo?

¹⁰ Kidie urhi vwo kpahe urhi, urhi kpahe urhi, usi vwo kpahe usi, usi kpahe usi, etinẹ emerha, etiyin emerha.

¹¹ Ẹjo, ẹkẹvuọvo vwẹ ẹbẹrunu ọrhorha kugbe ẹrenvwe ọrhorha Ọrovwohwo cha vwọ ta ota kẹ ihwo nana,

¹² rọ cha ta kẹ nẹ, Ọnana urovwoma; vwẹ oma erọvwọ kẹ ọ rẹ oma rhọ. Ọnana kọye oma erọvwọ na, dede na ayen che nyo-o.

¹³ Vwẹ ọtiọye na kẹ enẹ ota rẹ Ọrovwohwo cha dia kẹ ayen urhi kpahe urhi, urhi kpahe urhi, usi vwọ kpahe usi, usi kpahe usi, etinẹ emerha, etiyin emerha, rere ayen vwọ yanran, re she kpuko, kẹ ayen vwirhi, ufi ko mu ayen, ke mu ayen reyọ.

¹⁴ Vwẹ ọtiọye na we nyo ota rẹ Ọrovwohwo na, ovwan ejehwẹ na, ri sun ihwo nana vwi Jerusalẹm!

¹⁵ Fikiridie wọ tare, nẹ, Avwanre vẹ ughwu re ọphọ, avwanre vẹ ushi churobọ, ọke rẹ ọtiekọ na da cha wan vrẹn na, o gbi che bru avwanre rhe-e, kidie avwanre vwẹ efian ru odjahọ rẹ avwanre, vwẹ otọ rẹ efian kẹ etiyin avwanre de si oma nu,

¹⁶ vwẹ ọtiọye na enẹ Ọrovwohwo Ọghẹnẹ tare, Nighere, me ra reyọ uchivwo vwo mu vwi Zayọn ubiọragha, ubiọragha ra nabọ davwini, uchivwo rẹ ubienye rọ ghanre, uchivwo kokoroko Ohwo ro sere gbuyota gbi se broma-a.

¹⁷ Ki mi ru usi na dia ọsoso ọvwata ke rha he ovwanvwọn na, ogiribo ko che hwerhe odjahọ rẹ efian na kufia, ame ko che phoro urhurho na.

¹⁸ Etiyin na ọphọ ro wọ vẹ ughwu rere na ya chọre, obọ echuro wẹn vẹ ushi na gbi mudia-a; vwẹ ọke rẹ ọtieko rode na da cha wan vrẹn kọ cha teyọ owẹ she.

¹⁹ Kọke kọke rọ vwọ wan vrẹn ejobi kọ vwẹ owẹ boma, kirhiọke kirhiọke ọ cha vwọ wan vrẹn, te ason te uvo, kọ dia oshọ rode ra vwọ riẹn otọ rẹ ovuẹ na.

²⁰ Kidie ehwa na krẹnọ, o rhe te riẹn oma phihọ-ọ, amwa na hwa nọ o rhe te vwo phopho-o.

²¹ Kidie Ọrovwohwo che vrẹn kerẹ ọke rẹ Ugbenu ri Parazim, ophu ko muo kerẹ ọke rẹ iyara ri Gibeọn, ro vwo ru uruemu rọye–uruemu ọrhorha na! ro vwo ru iruo rọye–iruo ọrhorha na!

²² Asakiephana wọ gbe jehwẹ-ẹ, e de rhe si ifi wẹn gan, kidie mi nyo urhi rẹ ẹguọghọ ro nẹ obọ rẹ Ọrovwohwo Ọghẹnẹ rẹ otuofovwi na bru otọ na ejobi cha.

²³ Kerhọn mẹ, wo nyo urhuru mẹ, kerhọn, wo nyo ota mẹ.

²⁴ Ohwo ro voro udju evevoro o ghwe voro bẹdẹ? ghine ọ ro hworo kẹ ehwehworo bẹdẹ?

²⁵ Ọke ro de voro nu, rọ da rhuẹrẹ otọ na nu, ọ rha hrahra ibi rọ da kọn ifọ-ọ ro da kọn irosu phihọ urhiẹ-e kugbe eka vwẹ asan ro fo kẹ aye-en, o mi gbere ughwru phihọ?

²⁶ Kidie eyoniro gba; Ọghẹnẹ rọye yoniro.

²⁷ A vwẹ uwuye vwo wuye ifọ-ọ eye a vwẹ akpẹrẹ kọrọ ẹbe ra ria-a, ẹkẹvuọvo ifọ ubiurhe a vwọ fa a me rha vwẹ ọkpọ ghwiẹ ọbe ra ria.

²⁸ Ka rha vwariẹn iwurhie rẹ ikara nọ? Ẹjo, edjẹnẹnọ bẹdẹ-ẹ vwẹ ọke ro de ghorie adjugẹn rẹ akpẹrẹ rọye wan vẹ iyesi rọye, ọ guọghọ-ọ.

²⁹ Ọnana obọ rẹ Ọrovwohwo rẹ otuofovwi na o nurhe, uchebro rọye gbunu aghwanre rọye kparobọ.