Aizaya 26 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Une rẹ Ẹroẹvwọsuọ kẹ Ochọ rẹ Ọrovwohwo

¹ Vwẹ ẹdẹ yena ka so une nana vwẹ otọ ri Juda. Avwanre vwo orere ọvo rọ ganre ọ vwẹ esivwo vwo vi kerẹ igbẹhẹ ra vwẹ ogben vi.

² Rhie inurhoro na, rere orere rẹ ọvwata rọ yọnrọn urhi na vwọ ro uwevwi.

³ Wọ sa sẹro rọye vwẹ omamọ rẹ ufuoma, ohwo rọ vwẹ udu rọye kpahe owẹ fikiridie ọ vwẹ ẹro so owẹ.

⁴ Vwẹ ẹro so Ọrovwohwo bẹdẹ, kidie Ọrovwohwo Ọghẹnẹ, ọye oragha ri bẹdẹ na.

⁵ Ihwo re rhoro vẹ orere rode ọ vwẹ ayen kpo otọ, O da ghwọrọ te otọ, ọ ghwọerọ te otọ riẹriẹriẹ, o de muo teye iwurhie.

⁶ Owọ chiyiro muotọ, awọ rẹ ivwiogbere, kugbe ichiyi rẹ ihwo rẹ akpọ bẹn.

⁷ Idjerhe rẹ ọvwata nabọ ghọriẹ, wẹ yi ru idjerhe rẹ ọvwata riẹriẹriẹ.

⁸ Vwẹ obẹnẹ rọ orhiebro wẹ E Ọrovwohwo, avwanre da hẹrhẹ owẹ; ekarọphihọ rẹ odẹ wẹn ọye ẹguọnọ rẹ erhi rẹ avwanre.

⁹ Urhuru wẹn re si ẹnwẹn mẹ vwẹ ason, ẹnwẹn mẹ nabọ vwẹ oma kpotọ guọnọ owẹ Kidie ọke rẹ ọrhiebro da hẹ evun rẹ akpọ na re, ihwo rẹ akpọ na ki yono ọvwata.

¹⁰ Ọ da dianẹ e ru emu esiri kẹ oruimwemwu, o se yono phihọ ohwo esiri-i; vwẹ evun re otọ re evwata na, o ji ruẹ igburuku, ọ sa mrẹ ogangan rẹ Ọrovwohwo vughe-e.

¹¹ E Ọrovwohwo, a kpare obọ wẹn kpenu, ẹkẹvuọvo ayen sa mrẹ-ẹ. Gbe jẹn ayen mrẹ ọdavwẹ wo vwo kẹ ihwo wẹn, rere oma vo ayen. gbe jẹn erhanre rẹ ivwighrẹ wẹn torhẹ ayen

¹² E Ọrovwohwo, wẹ re vwẹ ufuoma mu vwọ kẹ avwanre, wẹ ri ru iruo na ejobi phihọ avwanre obọ.

¹³ E Ọrovwohwo Ọghẹnẹ rẹ avwanre, eghẹnẹ efa re dia owẹ-ẹ sun avwanre jovwo re, ẹkẹvuọvo odẹ wẹn ọvo avwanre rhọvwe phihọ.

¹⁴ Ayen ghwuru, ayen sa rhọ-ọ, uhoho ayen ruẹ, ayen che se vrẹ-ẹn, ki fiki rọye na wọ rhe vwọ ghwọrọ ayen wo de phoro odẹ rẹ ayen ejobi rere evwo jẹ ayen ẹkarophihọ..

¹⁵ Ẹkẹvuọvo wẹ ri ru irere na bu, E Ọrovwohwo, wẹ ri ru irere na bu, wẹ ọye e jiri, wẹ re hẹre ughwru rẹ otọ na.

¹⁶ E Ọrovwohwo, vwẹ evun rẹ ọdjarhe kẹ ayen guọnọ owẹ kẹ ayen shẹ ẹrhovwo ẹnẹ vwe ọke wọ vwọ ghwe obo re efafa wẹn kpahe ayen.

¹⁷ Kerẹ aye rọ chuẹ uvwiẹ ro phre ro ghunle bunu vwẹ odjadja rọye, vwẹ ọke rẹ uvwiẹ rọye de te, ọtiọye avwanre epha fiki wẹn. E Ọrovwohwo;

¹⁸ avwanre chuẹ uvwiẹ, avwanre phreri ohwo rẹ avwanre vwiẹri na kẹ aphopho. Avwanre ru iruo rẹ esivwo ọvuọvo vwẹ akpọ na-a, ye ihwo re dia akpọ na ji she-e.

¹⁹ Irivwi wẹn ri ghwuru cha rhọ, ugboma rayen che vrẹn. E ihwo re dia iwurhie na, we vrẹn wa so ine wa ghọghọ! Kidie evwru wẹn ọye evwru rẹ urhukpẹ vwẹ otọ rẹ uhoho kọye ọ cha la mu.

²⁰ Mọ, ihwo mẹ, ro ivun wẹn, re wo bi ẹchẹ gbe oma, Si oma wẹn nu emerha bẹsiẹ rẹ ophu rọye vwo fue.

²¹ Kidie nighere, Ọrovwohwo na re nẹ ẹdia rọye cha ro che vwo hwe ihwo rẹ akpọ na fiki rẹ umwemwu rayen, akpọ na kọ cha vwẹ ọbara re hweri vwẹ evun rọye phia, o gbi che rhurhu ihwo re hweri na ọfa-a.