Aizaya 25 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Une re Ejiro fiki rẹ Ẹse rẹ Ọghẹnẹ

¹ E Ọrovwohwo, wẹ ọye Ọghẹnẹ mẹ, Me kpare owẹ kpenu, mi Jiri ode wẹn; kidie wo ru emu rẹ igbunu, iroro wọ jẹre awanre rhe, uyota gbagba.

² Kidie wẹ re ghwẹ orere koko, orere ra gba ogba riariẹ na kẹ erhurhu rode, ighẹn rẹ ovie rẹ erhorha na gbe dia orere ọfa-a, a gbe rhoma bọn bẹdẹ-ẹ.

³ Vwẹ ọtiọye na egba rẹ ihwo ke vwẹ urinrin kẹ wẹ, irere rẹ ihwo ogbarogba ke djẹ oshọ wẹ.

⁴ Kidie wẹ hẹ odjahọ ọgangan kẹ ivwiogbere, odjahọ ọgangan kẹ otu rọ bẹn re hẹ ukpokpogho, odjahọ nẹ ogiribo ophie nẹ oheri, kidie ovan rẹ ohwo ogbarogba họhọ ogiribo rọ teyọ igbẹhẹ,

⁵ kerẹ oheri vwẹ asan ọyaya Wo gbe edo rẹ erhorha na phihọ otọ, kerẹ oheri vwẹ oma r;e ophie rẹ enu ro biri, eriyin une rẹ ohwo ogbarogba cha fọ riei.

⁶ Vwẹ ugbenu nana Ọrovwohwo rẹ otuofovwi na kọ vwẹ emu kẹ ihwo na ejobi re emu rẹ ivwri, wain ro vwo ọgbodo, emu rẹ ivwri rọ vọnre vẹ otu rẹ esuanson, wain egangan ra nabọ rhẹ

⁷ Kọ cha guọghọ vwẹ enu rẹ ugbenu nana ukpo re vwo rhurhu ihwo nana, ogan ra riẹn rhurhu irere nana.

⁸ Ko mu ughwu rọ bẹdẹ, Ọrovwohwo rẹ Ọghẹnẹ kọ ririe oviẹ nẹ opharo rayen, ehwẹjẹ rẹ ihwo rọye ko sio nẹ akpọ na ejobi, kidie Ọrovwohwo tarọ nure.

⁹ Ka cha ta vwẹ ẹdẹ yena, nẹ, Nighe, Ọnana Ọghẹnẹ rẹ avwanre, avwanre hẹrherẹ, rere o rhi sivwi avwanre. Ọnana Ọrovwohwo na; avwanre hẹrherẹ, e gbe jẹn avwanre ghọghọ vwẹ esivwo rọye.

¹⁰ Kidie Ọrovwohwo cha ghwobọ kpahe ugbenu nana, ke che chiyi Moab phihọ otọ vwẹ asan rọ epha, kirobo re chiyi ẹbe eyaya muotọ vwẹ erhurhu

¹¹ Kọ hẹre abọ rọye vwẹ uherevie kerẹ ohwo ro rhẹrhẹ rọ riẹn abọ vwọ rhẹrhẹ; ẹkẹvuọvo Ọrovwohwo cha rhare eheri rọye kugbe ona re abọ rọye te otọ riẹriẹriẹ.

¹² Ogba rọ gba kpenu kokoroko na ejobi ka guọghọ igbẹhẹn rọye te otọ riẹriẹriẹ, guọghọ kporo phihọ otọ, ro hirhe phihọ iwurhie.