Aizaya 23 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Epha ra bọ kẹ Taya kugbe Sidọn

¹ Arọẹmrẹ kpahe Taya, Berọma, E eko ri Tarshish, kidie a ghwọrọ Taya totọ, uwevwi chekọ vwo siẹvo kẹ erhuru-u! Kẹ otọ ri Saiprọs a da vwọ phia kẹ ayen.

² Fọ riei, ovwan ihwo rẹ obo erhuru, E ineki ri Sidọn, ikọn wẹn wan ọ rẹ urhie

³ ayen hẹ enu rẹ ame buebu; igho wẹn ọye hẹ eka ri Shihọr, orho ri Nile, wẹ ineki rẹ ẹgborho.

⁴ Jẹn oma vowẹ, E Sidọn, kidia abadi ta ota re, asan ọgangan rẹ urhie, tare nẹ Me je chuẹ uvwiẹ dẹvo vwo sievo kẹ uvwiẹ-ẹ, Me je ghẹrẹ imighene vwo siẹvo kẹ emetobẹ-ẹ.

⁵ Ọke rẹ iyẹnrẹ na de rhi te Ijipt kẹ ayen vweri uvweri fiki rẹ iyẹnrẹ ro nẹ Taya rhe.

⁶ Wan vrẹn kpo Tarshish, beroma, E ihwo rẹ obo erhuru!

⁷ Ọnana orere wẹn ro titiri na rọ herọ nẹ awanre rhe na, rọ vwẹ owọ rọye yan rọ isi na!

⁸ Ono jẹn iroro nana kpahe Taya, rọ vwẹ erhu rẹ ivie tughẹ ihwo na, rẹ ineki rọye dia isun, rẹ ineki rọye dia ihwo rẹ akpọ vwẹ ọghọ ke?

⁹ Ọrovwohwo rẹ otuofovwi na jẹn iroro na nure, rere o gbe urinrm ejobi ẹgua, rere o si ọghọ nẹ oma rẹ ihwo re mu ọghọ kẹ vwẹ akpọ na ejobi.

¹⁰ Jẹn otọ wẹn ku wan reghe reghe kerẹ Nile, E Ọmọtẹ ri Tarshish, a gbe sa daji ọfa-a

¹¹ Ọ riẹn obọ rọye kpahe abadi na, o kpogho uvie na ejobi; Ọrovwohwo ji urhi kpahe Kenan nure rọ cha vwọ guọghọ ogba egangan rọye.

¹² Ọ da ta. Wọ gbi mu oma kpenu ọfa-a E ọmọtobe ri Sidọn re shenyẹ, vrẹn wan vrẹn kpọ Saiprọs, oboyi dede na oma ji che fu vwe-e.

¹³ Nighere otọ rẹ ihwo ri Kaldia. Ọna hẹ ihwo na; o dia Asiria-a Akpọ-eyere ri Taya da họhọ akpọ-eyere rẹ eranvwe re djoma. Ayen bọn ẹgedẹge rẹ imu rayen nure, ayen kprọ ighẹn rayen ejobi te otọ, ayen ruru phihọ erhurhu.

¹⁴ Beroma, E ekpo rẹ erhanre ri Tarshish, kidie ogba ọgangan a guọgherọ te otọ.

¹⁵ Vwẹ ẹdẹ yena Taya kọ cha chọẹro ẹgbukpe ujorha gbe ihwe, kerẹ ọke rẹ ovie ọvo. Oba rẹ eghukpẹ ujorha gbẹ ihwe na, kọ cha phia ki Taya kerẹ une rẹ igberadja:

¹⁶ Reyọ akpata, ru wo gbe eha riariẹ orere na, E igberadja rọ chọẹro So ine vwevwerhe, So ine buebu, rere a vwọ karohọ owẹ.

¹⁷ Vwẹ oba rẹ ikpe ujorha gbẹ ihwe na, Ọrovwohwo ko che bru Taya rhe ko rhivwi kpo ẹdia rẹ uku rọye, kọ vẹ iviẹ rẹ akpọ na ejobi che gbe igberadja kugbe.

¹⁸ Oghwa rẹ ẹki rọye kugbe osa ra hwa kẹ ejobi ke ru ayen fon kẹ Ọrovwohwo; a gbe de ghwẹ ayen koko eyẹ mu ayen nyẹ-ẹ, ẹkẹvuọvo oghwa rẹ eki rọye kọ vwẹ emuọre kugbẹ emwa iyoyovwi vwọ kẹ ihwo re dia obaro rẹ Ọrovwohwo