Aizaya 20 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Asiria che phi Ijipt ve Itiopia kua

¹ Vwẹ ukpe yena rẹ onotu rẹ ofovwi rode, ri Sargọn ovie rẹ Asiria jiri, da rhe Ashdọd rhe họnrọ, ọ da reyọ,

² vwẹ ọke yena Ọrovwohwo da wan unu rẹ Aizaya ọmọ rẹ Amoz ta ota, tanẹ, Yanran, ra rhan esiso na nẹ ehun wẹn re wo ku isabato wẹn nẹ awọ wẹn, o de ru ọtiọye, kọ yan ebẹba vẹ awọ ofefe.

³ Ọrovwohwo da ta, Kirobo rẹ odibo mẹ Aizaya vwọ yan ẹbẹba vẹ awọ ofefe vwẹ ikpe erha rọ dia oka vẹ echa kẹ Ijipt vẹ Itiopia,

⁴ Eriyin ovie rẹ Asiria che mu ihwo rẹ Ijipt ighuvwu ihwo rẹ Itiopia ke mu ayen kpo imu te imitete te ekpako. Ẹbẹba vẹ awọ ofefe, vẹ ikebe ri rhie phihọ, rọ dia omaẹvuọ kẹ Ijipt.

⁵ Etiyin ofu ko dje ayen vẹ ozighi fiki rẹ Itiopia re ayen vwẹ ẹro so kugbe ljipt rẹ ayen vwọ yeyan.

⁶ Ihwo re dia erhuru nana ejobi ke cha ta vwẹ ẹdẹ yena, Nighere, Ọnana obo re phiare kẹ ihwo rẹ avwanre vwẹ ẹro so rẹ avwanre djẹ bru nẹ e cha avwanre uko sivwi avwanre nẹ obọ rẹ ovie rẹ Asiria. Avwanre, komavọ avwanre vwọ sa vabọ?