Aizaya 16 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ayen vwẹ imigodẹ phare ọko vwo rhe isun rẹ otọ na, nẹ Sela rhe, vwọ wan idjerhe rẹ aton, vwo kpo ugbenu rẹ ọmọtẹ ri Zayọn.

² Kerẹ ọmọphran rọ teyọ ibekpe, kerẹ emephran boba ra zaghare, eriyin emetẹ ri Moab epha vwẹ ushuame rẹ Arnọn.

³ Gba jẹn iroro, ru ọsoso; gbe ru ophie wẹn kerẹ ason vwẹ ọke rẹ ọnre dẹ vi gun; si ihwo ra djẹ kufia nu, wọ vwẹ ighuvwu riodọvwe-e;

⁴ jẹn erẹ a djẹ kufia vwi Moab kua bru ovwan rhe dia asan odjahọ kẹ ayen nẹ obọ rẹ oghwọrọ na. Ọke rẹ oshenyẹ ihwo na gbe herọ-ọ, re oghwọrọ na da da obọ ji, rẹ ọ ro chiyi ihwo muotọ na da ravwiẹn nẹ otọ na.

⁵ Etiyin ka cha bọn ekete phihọ vwẹ ẹguọnọ ro jẹrhẹriẹ ro jephieghe ko che tidia enu rọye vwẹ ọ rẹ uyota vwẹ utughẹ ri Devid ohwo ro che guẹdjọ rọ je guọnọ ọsoso kpata kpata ọye ọ ru ọvwata.

⁶ Avwanre nyo eheri ri Moab, obo ro herẹ te; eyan rọye, eheri rọye, vẹ arueyivwo rọye– eyan rọye ejobi ofefe.

⁷ Fiki rẹ ọtiọye na gbe jẹn Moab beroma, e ji kohwo kohwo beroma kẹ Moab. Muomahọ a ghwiẹ wẹn tototo, fiki rẹ ikara ri rasin ri Kirhaeseth.

⁸ Kidie ikoghe ri Hẹshbọn herọ laghoma; kugbe vain ri Sibmah, isun rẹ irere na nyavwe eghọn rọye she ghwiotọ ri gro te Jazer ri ghwru kpo obo aton; awọ rọye tan ro isi e da wan abadi vrẹn.

⁹ Eriyin na oviẹ ri Jazer kọ nẹrhẹ ovwẹ viẹ fiki ri vain ri Sibmah, Me vwẹ oviẹ mẹ kpọrhọ owẹ, E Hẹshbọn kugbe Elealeh; kidie vwẹ enu rẹ emamọ wẹn kugbe orhọ wẹn ọye unuebo rẹ ofovwi na she phihọ.

¹⁰ Ye aghọghọ te omavwerhe a reyọ ayen yanran vwo nẹ udju esiri na; vwẹ evun rẹ ogba ri vain na o rhe vwo une ra so-o, o vwo ohwo ro kuvwieri-i; o vwo ohwo ro chiyi vain vwẹ asan umi na-a; edo ra vwọ kọrọ vain fueri.

¹¹ Fiki rẹ eriyin na erhi mẹ ro brenu kerẹ owanre fiki ri Moab, eriyin udu mẹ je epha kẹ vwọ Kir-heres.

¹² Vwẹ ọke ri Moab da vwẹ oma rọye phia, rọ da laghoma rọye bẹn vwẹ enu rẹ asan ro kpenu, rọ da rhe ẹshẹ rọye re nẹ ẹrhovwo, ọ gbe sa kparobọ-ọ.

¹³ Ọnana ota rẹ Ọrovwohwo tare kpahe Moab rhabae rhe.

¹⁴ Ẹkẹvuọvo Asakiephana Ọrovwohwo tare nẹ, Vwẹ ikpe erha, kerẹ ikpe rẹ ohwo re durhieri, urinrin ri Moab ka cha vwọ jehwẹ, vwẹ obo rẹ ihwo rọye bu te na, imihwo re cha rhọ ke dia hahavwe guọguọ