Aizaya 15 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Epha ra bọ kpahe Moab

¹ Aroẹmrẹ ra mrẹ kpahe Moab. Kidie a guọghọ Ar tototo vwe ason ọvuọvo na, Moab wo ghwru nure; kidie a guọghọ Kir te otọ vwẹ ason ọvuọvo na, Moab wo ghwru nure.

² Ọmọtẹ ri Dibọn yanran kpo obenu ọ yanran kpo enu rẹ igbenu ra viẹ; vwẹ enu ri Nebo vẹ enu ri Medeba Moab re beroma. Kuyovwi kuyovwi gba akpan re, a wanre kẹtuegba kẹtuegba,

³ ayen vwẹ isiso rhuo vwẹ evun rẹ irhuvwu, vwẹ enu rẹ uwevwi kugbe evun rẹ ọsuere kohwo kohwo beroma ayen wran vwẹ ovie.

⁴ Họshbọn kugbe Elealeh viẹ phia, e de nyo urhuru rayen vwẹ asan kerẹ ọtiẹ Jahaz; eriyin na egba ofovwi ri Moab kperi phia, erhi rọye rọ kpogho.

⁵ Udu mẹ rọ viẹ kẹ Moab; ighuvwu rọye djẹ kpọ obi Zọar, kpo obi Eglat-shelishiyah. Kidie vwẹ asan ugbenu ri Luhit ayen viẹ bẹn ayen yere kpenu, vwe idjerhe ra wan kpọ Họrọnaim ayen teyọ unuebo rẹ ẹghwọrọ,

⁶ ame ri Nimrim ayen djẹ fiotọ re kakare; odi vwiori, ekpokpọ gbe djẹ cha-a, odi djidji na gbe herọ-ọ

⁷ Eriyin na eghughu rẹ erere rẹ ayen mrẹre na vẹ efe rẹ ayen koko vwẹ oboyi na ka ayen cha kua ayen yanran vwọ wan Ẹtẹrhe rẹ Urihi.

⁸ Kidie unuebo tọnre o nene otọ ri Moab ejobi re; omebere na te Eglaim re, omebere na ji te Eẹẹrẹlim.

⁹ Kidie ame ri Dibọn na vọnre vẹ ọbara; ye me je cha vwẹ ọfa rọ rhonọ ọna kẹ Dibọn, okpohrokpo vwọ kẹ ihwo ri Moab re djẹre, vwọ kẹ umuku rẹ ihwo ri chekọ vwẹ otọ na.