Aizaya 14 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ehwẹ ra vwẹ Ovie ri Babilọn jẹ

¹ Ọrovwohwo ko ni ehrọre ri Jekọp kọ rhoma jẹn Izrẹl reyọ, kọ rhoma vwẹ ayen kpo otọ rẹ obọ rayen, erhorha ki kuomagbe ayen, kẹ ayen churu oma mu uwevwi ri Jekọp.

² Ihwo na ke reyọ ayen vwọ rhe adia rayen, uwevwi rẹ Izrẹl ko vwo ayen vwẹ otọ rẹ Ọrovwohwo na; kẹ ayen dia eviẹn rẹ eshare vẹ e rẹ eya, ihwo ri ke mu ayen jovwo na ka rhoma mu ayen ighuvwu, kẹ ayen rhoma sun ihwo ri ke shenyẹ ayen jovwo na.

³ Ọke rẹ Ọrovwohwo da vwẹ omaerovwo vwọ kẹ ovwan nẹ odjadja vẹ edo kugbe owian ọgangan ra vwọ kẹ ovwan wian nure,

⁴ ke wa so une rẹ ehwẹjẹ nana kpahe ovie ri Babilọn. Mavọ ọ ro shenyẹ ihwo na vwọ fọ, ọharhe eka na vwo fotovwi!

⁵ Ọrovwohwo vwirhi ọkpọ rẹ oruimwemwu nure, ọkpọ rẹ isuesun rẹ ivie,

⁶ rọ vwẹ ophu ghwiẹ ihwo she vwẹ ubiedje ro je fue na, rọ vwẹ ophu suẹn irere na vẹ omukpahe ro je fue.

⁷ Akpọ na ejobi kọ fọfọ riẹi, ayen ejobi va ro ine ẹsuọ.

⁸ Owangha na ejobi ke ghọghọ owẹ, igedu ri Lebanọn, ke tanẹ, Rhabae ra vwọ ghwọrọ owẹ nu na, ohwo ọvuọvo ji rhe she avwanre.

⁹ Erivwi ejobi vrẹn mudia gharaghara re ayen cha vwọ vwa ọke wọ da rhe, irivwi ejobi ki che yere uwe; ihwo ri je sun akpọ na jovwo ro mu nẹ ekete rayen ihwo ri je dia ivie rẹ irere na vẹrhe.

¹⁰ Ayen ejobi ke cha ta ayen me ta kẹ wẹ. Ekpuyovwi wẹ rhoma hirhe ọvwiẹrẹ kirobo rẹ avwanre epha! wọ rhe họhọ avwanre re!

¹¹ A vwẹ eyan wẹn gbotọ kpo erivwi, edo rẹ owanre wẹn, ihori keye wọ cha vwọ hwa ehwa, ididẹn kọye wo vwo phopho.

¹² Mavọ wo vwo she nẹ odjuvwu rhe, Isio rẹ Uvo, ọmọ rẹ Irhiọke! Mavọ a nyavwe owẹ ghwiẹ otọ, wẹ rọ vwẹ irere na ejobi hwa otọ!

¹³ Wọ da ta vwẹ udu wẹn. Mi yeri kpo odjuvwu; vrẹn isio rẹ Ọghẹnẹ. Ke me bọn ekete mẹ phihọ obenu, Ki mi tidia vwẹ enu rẹ ugbenu rẹ ọghwẹgbe rọ he obenu shesheri,

¹⁴ Mi yeri vrẹn enu rẹ irharheghe na, Ki mi ru oma mẹ kerẹ Ọ ro Me kpenu na.

¹⁵ Ẹkẹvuọvo a vwọ wẹ kpo otọ re, vwo kpo obo okokodo rẹ Ukpotọ na.

¹⁶ Ihwo re mrẹ wẹ ki che rhie unu phihọ kẹ wẹ, ki che roro iroro kokodo kpahe owẹ. Ọnana ohwo ro mu akpọ na kpogho na, ro kpogho ivie na.

¹⁷ ro hirhe akpọ na vwọ aton rọ guọghọ irere rọye, rọ rhọvwe siobọ nẹ i re muru kpo-o?

¹⁸ Ivie rẹ ẹgborho na sherhẹ vwẹ urinrin, dohwo dushi rọye

¹⁹ ẹkẹvuọvo a djẹ wẹn kufia, shesheri nẹ ushi wẹn, kere ọmọ re vwiẹ chọra ro tuoma, ihwo ra vwẹ ọlọkọ duvwu hwe, ra vwẹ irivwi phopho, re yanran bru ibieragha re he obo Ukpotọ, kerẹ orivwi re chiyẹ wan.

²⁰ E gbi se shi we vọye kugbe-e, fikiridie wọ guọghọ otọ wẹn nure, wo hwe ihwo wẹn ejobi re. Uvwiẹ rẹ iruimwemwu na e gbi se odẹ wẹn bẹdẹ-ẹ!

²¹ Rhuẹrẹ ehwe phihọ kẹ emọ rọye fiki rẹ abe rẹ esẹ rayen, ayen da rhoma vrẹn rhe re reuku rẹ akpọ na, ayen da rhe fan irere vọn akpọ na.

²² Ki mi che vrẹn vwọ so ayen, eriyin Ọrovwohwo rẹ otuofovwi na tare, ke me nyavwe nẹ Babilọn te odẹ te umuku, emọ kugbe uvwiẹ eriyin Ọrovwohwo tare.

²³ Ki mi che vwo ru asan re isorhuẹn dia, kugbe ẹtẹrhe rẹ ame, ke me vwẹ uhwerhe rẹ ughwu vwo hwerhe, eriyin Ọrovwohwo re otuofovwi tare.

A cha Ghworo Asiria

²⁴ Ọrovwohwo rẹ otuofovwi kpokpa nure Obo ri mi roro phihọ, eriyin ọ cha dia, obo me tanẹ ọ dia ọtiọye o mudia phihọ,

²⁵ ke me guọghọ ihwo rẹ Asiria re hẹ otọ mẹ, vwẹ enu rẹ ugbenu mi de chiyi ayen muotọ, urhekpe rọye kọ che bioma nẹ ayen, oghwa na ko phre she nẹ igabọ rayen.

²⁶ Ọnana kọye iroro ra jẹre vwọ kpahe akpọ na ejobi; Ọnana kọye obọ rọ riẹn phia vwọ kpahe irere na ejobi.

²⁷ Kidie Ọrovwohwo rẹ otuofovwi na jẹn iroro nure, kono re sa pha? Obọ rọye riẹn phiare, kono se kpirho kpuko?

Epha ra bọ kpahe Filistia

²⁸ Ukpe rẹ Ovie Ehaz ghwuru ọye a mraro nana:

²⁹ Wa ghọghọ-ọ E Filistia, ovwan ejobi, nẹ evwirhi ọkpọ ra vwọ ghwiẹ wẹ, kidie nẹ owọ rẹ ọrọdekọ rhe, Etiyin ọrobiebi che nurhe, emamọ rọye ke cha dia ọrọdekọ rọ rhan.

³⁰ Emekpako rẹ ivwiogbere ke re emu, e ra akpọ bẹn ki sherhẹ vwẹ egbemọphẹ, ẹkẹvuọvo ke me vwẹ owẹvwe hwe esiri wẹn umuku wẹn ri chekọ ki mi hwe ayen.

³¹ Beroma, E anurhoro, viẹ, E orere, wran vẹ oshọ, E Filistia, ovwan ejobi! Kidie ivwirhi nẹ obọrhe ọnre cha, ọ ro churu ihwo siẹ hẹ usun rọye-e.

³² Kidie ohwo ọvo kpahe kẹ iyinkọn rẹ irere na? Ọrovwohwo re vwe obọ rọye fan Zayọn ihwo rọye re mu kpahe kẹ evun rọye e da djẹrhọ.