Aizaya 10 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ekan kẹ ihwo ri ji urhi re orukuruku, kugbe ihwo ri siẹ isiesi rẹ oshenyẹ,

² ri kue orhiẹ rẹ uyota rhẹriẹ kẹ ọ rẹ akpọ bẹn ayen mi mie ihwo mẹ ri vwiogbere ẹkẹn ute rayen, rere eyauku vwọ dia emuọre rayen, ayen mi rhe ru ọmọphrorivwi phihọ eranvwe rayen!

³ Kidie we ru vwẹ ẹdẹ rẹ ẹlaghọ na, vwẹ evun rẹ ogiribo ro che dju ne ogboko rhe na? Kono wa djẹ bru rọ cha ovwan uko, ki tivọ we de si efe re ovwan nu?

⁴ Emuọvo rhe chekọ-ọ jokpa rẹ ighuvwu ra cha ghwọrọ eyẹ eye she vwẹ ohri rẹ ihwo re hweri. Kidie vwẹ enana ejoi na ophu rọye fueri-i yen obọ rọye je riẹn phia.

Obo rẹ Ọrovwohwo vwẹ Asiria Ru

⁵ E, Asiria, ophiaphien rẹ ophu mẹ, ọkpọ rẹ omẹdja mẹ!

⁶ Orere ro jẹ Ọghẹnẹ ẹriẹn mi ji ro ra ihwo rẹ ophu rẹ ayen mu vwe me vuẹ rẹ na rọ reyọ emuọre re gborho ekuakua, re chiyi ayen pẹtẹ pẹtẹ kerẹ ibehre rẹ irhuvwu.

⁷ Ẹkẹvuọvo ọ reyẹrọ phihọ ọtiọye-e udu rọye ji roro ọtiọye-e; ẹkẹvuọvo o rori vwẹ udu roye nẹ ọye ghwọrọ rere ọ nyavwe irere buebu kufia,

⁸ kidie ọ tare nẹ Inotu rẹ ofovwi mẹ ejobi dia ivie-e?

⁹ O dianẹ Kalno họhọ Kikamishi-i? O dianẹ Ramat họhọ Apadi-i? Ọ dianẹ Sameria họhọ Damaskọ-ọ?

¹⁰ Kirobo rẹ obọ mẹ te ivie rẹ ẹdjọ na re ema rayen rho nọ iri Jerusalẹm vẹ Sameria na,

¹¹ Mi gbi rhe ru kẹ Jerusalẹm vẹ ẹdjọ rọye kirobo Mi ru kẹ Sameria vẹ ema rọye na te?

¹² Ọke rẹ Ọrovwohwo de ru iruo rọye ejobi vwẹ Ugbenu ri Zayọn kugbe Jerusalẹm nu, ko che hwe Asiria vẹ eyan ofefe rọye kugbe eheri ọbrabra rọye.

¹³ Kidie ọ tare nẹ: Ogangan rẹ obọ mẹ mi vwo ruo, kugbe iroro mẹ, kidie mi vwo obọ, mẹ kpare ughwru rẹ ihwo efa, Me da ghwẹ efe rayen reyọ; kerẹ erhuẹn ọshare mi de dje ihwo ri tidia ekete she,

¹⁴ Obọ mẹ mrẹ efe rẹ ihwo na kerẹ ẹho rẹ ọphran, kerẹ ọke rẹ ihwo da ghwẹ ikẹn ra djẹ jovwo kẹ ọtiọye me ghwẹ akpọ na ejobi koko; o rhe vwo ọvuọvo rọ kpare ibekpe-e eyẹ rhie unu vwo kperi-i.

¹⁵ Kẹ ushurhe yan eyan kẹ ọro vwo she urhe, eye isara rhe mu oma kpenu kẹ oro yọnherọ? Kerẹ ẹsiẹ rẹ ophiaphiẹ da fa ohwo rọ yọnherọ, eyẹ kerẹ ẹsiẹ rẹ ọkpọ da rhoma mu ohwo rọ yọnherọ nẹ otọ!

¹⁶ Fiki rẹ ọtiọye na Ọrovwohwo, Ọrovwohwo rẹ otuofovwi na, kọ cha vwẹ emiavwe rẹ ẹdọn mu egba rẹ ofovwi na, ke che koko erhanre rọ tua phihọ otọ rẹ urinrin rọye, kerẹ ogidi erhanre.

¹⁷ Urhukpẹ rẹ Izrẹl ko hirhe phihọ erhanre, Ọfuanfon Ọvuọvo rọye na kẹ ogidi erhanre; kọ torhẹ ọ me ghwọrọ idjigbẹ vẹ ekpia rọye na vwẹ ẹdẹ ọvo.

¹⁸ Urinrin rẹ egbo rọye kugbe otọ rọye re yovwẹ emu Ọrovwohwo cha ghwọrọ te ẹnwẹn kugbe oma, kọ dia kẹrẹ ẹsiẹ rẹ ohwo ro mwọga e de hrẹn mu.

¹⁹ Irhe ri che chekọ vwẹ evun rẹ egbo na ke hanvwe gangan omotete ko se si ayen phihọ otọ.

Umuku rẹ Izrẹl ri chekọ

²⁰ Vwẹ ẹdẹ yena umuku ri chekọ vwẹ Izrẹl kugbe iri ghwu chekọ vwẹ uwevwi ri Jekọp gbe cha vwẹ oma rere ohwo rọ ghwiẹ ayen na-a, ẹkẹvuọvo kẹ ayen vwẹ oma rẹrẹ Ọrovwohwo, Ọfuanfon Ọvuọvo re Izrẹl na, vwẹ ọ re uyota.

²¹ Umuku che rhivwi, umuku ri Jekọp, bru Ọghẹnẹ rẹ ọgba na.

²² Owene ihwo wẹn Izrẹl mi bun kerẹ ehavwo re urhie, umuku rayen ọvo ri che rhivwi. E bru ẹdẹ rẹ ẹghwọrọ nure, rọ mwavwa hwẹ vẹ ọvwata.

²³ Kidie Ọrovwohwo, Ọrovwohwo rẹ otuofovwi na, kọ cha vwe emu na ejobi te oba, kirobo ro jurhi, vwe uherevie rẹ akpọ na.

²⁴ Ọtiọye na enẹ Ọrovwohwo tare, Ọrovwohwo rẹ otuofovwi E ihwo mẹ, re dia Zayọn, wa dje oshọ rẹ ihwo re Asiria-a vwẹ ọke rayen da vwẹ ọkpọ ghwiẹ ovwan eyẹ ugbọphogho fa ovwan kirobo re Ijipt ruru.

²⁵ Vwẹ ọmọke krẹn emerha ivuemiovwo mẹ ko vwo oba, ophu mẹ kọ cha garọ vi ẹghwọrọ rayen ọvo.

²⁶ Ọrovwohwo rẹ ofovwi na kọ cha vwẹ ugbudia vwọ fa ayen, kirobo rọ vwerọ fa Midian vwẹ asan oragha rẹ Orẹb, kọ cha riẹn ọkpọ ku urhie, kọ kparọ kirobo ro ru vwẹ Ijipt.

²⁷ Vwẹ ẹdẹ yena oghwa rọye ko she nẹ igabọ wẹn, ka ka guọghọ urhekpe rọye nẹ ohọre wẹn. O vrẹn nẹ Rimmọn re,

Ihwo rẹ Asiria mu oyan

²⁸ o rhi te Aiat rẹ; ọ wan Migrọn vrẹn, o de si eghwa rọye nu vwi Mikmash;

²⁹ ayen wan imidjẹrhe na vrẹn, ayen de muerhọn vwẹ Geba vwẹ ason; Ramah ko kpogho, Gibeah ri Sọl djẹre.

³⁰ Bunu, Ovwan emetẹ ri Gallim! Kerhọn, E Laishah! Nyo kẹ ayen E Anatọt!

³¹ Madmnah fru ugbonẹ, ihwo ri Gebim dje re si oma nu.

³² Nonẹ re ọke na ọ daji vwi Nọb, ko rhurhu ọche rọye vwẹ asan ugbenu rẹ ọmọtẹ ri Zayọn, ugbenu ri Jerusalẹm.

³³ Nigherẹ, Ọrovwohwo, Ọrovwohwo rẹ ofovwi na cha fian eghọn na vẹ ogangan ro mu oshọ; ọ ro gro kpenu ke che shẹ teye otọ, ọ ro mu oma kpenu ka ghwọrọ te otọ

³⁴ Kọ vwẹ ushurhe bẹnẹ itu rẹ eghọn na te otọ, Lebanọn vẹ ikpirhe ride na ki she.