Aizaya 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹgborho umwemwu

¹ Aroẹmre rẹ Aizaya ọmọ ri Amọz, rọ mrẹre kpahe Juda vi Jerusalẹm vwe ọke re Uzaya, Jotam, Ehaz kugbe Hẹzikaya, ivie ri Juda.

² Nyo, E Idjuvwu, kerhọn, E akpọ, fikiridie Ọrovwohwo tanure, Mi vwiẹ emọ me da yọnrọn ayen ghwẹro, ẹkẹvuọvo ayen de rhi mu kpahe ovwẹ.

³ Erhuẹn riẹn ọrovworo, ekẹtẹkẹtẹ riẹn utughẹ rẹ onini rọye ihwo mẹ se vughee

⁴ E, orere umwemwu ihwo ri kru orukuruku ghwa, uvwiẹ re iruimwemwu na, emọ re omwumwerhe na! Ayen sen Ọrovwohwo, ayen jẹn Ọfuanfon Ọvuọvo re Izrẹl na fia, a riẹriẹ ayen ghwru tototo.

⁵ Die re je ghwiẹ wẹ, ri wo ji vwo kpokpo? Uyovwi na ejobi rọ mwọga, udu na ejobi oma rọ rhọ.

⁶ Kẹ eherhowọ rhiri re te uyovwi, ghwodirhẹn kpimẹ, ẹkẹvuọvo e ghwiẹ ki ibru era kugbe era ri hwẹ, e mi aye-en eyẹ ke ẹgbaa eyẹ a vwẹ evwri rhuọrhọọ.

⁷ Orere wẹn kua fiotọ, orho wẹn erhanre torhẹ ayen, vwẹ irharo wẹn kokoko na erhorha ra kua otọ wẹn reyọ, ọ kuare, erhọrha guọgherọ totọ.

⁸ Ọmọtẹ ri Zayọn kọye ri chekọ kerẹ utughẹ vwe evun rẹ udju ri vain, kerẹ ohẹrhẹ vwẹ udju rẹ oyaọ, kere orere rọ hẹ imu

⁹ Odiane kẹ Ọrovwohwo rẹ ofovwi je imi ihwo ẹvo vwo kẹ avwanre vwonẹ, mane kẹ avwanre a dia kerẹ Sodọm, ke avwanre a họhọ Gomora.

Use kẹ Ekuorhẹriẹ rẹ Uyata

¹⁰ Nyo ota rẹ Ọrovwohwo, wẹ isun ri Sodọm! Kerhọn rẹ uyono rẹ Ọghẹnẹ rẹ avwanre we ihwo ri Gomora!

¹¹ Die izobo obuebu rẹ ovwan na fi ke vwe? ọtiọye Ọrovwohwo tare, Izobo re egbo ra torhẹre bunọ kẹ vwẹ kugbe ivwri re eranvwe ra ghẹre, Oma rẹ ọbara re erhuẹn vwerha ovwẹ-ẹ eyẹ erẹ omogodẹ eyẹ ọrẹ ẹkpro dede.

¹² Ọke wọ da cha vwẹ oma phia kẹ vwẹ, kono guọnọ ọnana mie we egbe nana ru wo gbe ẹguan mẹ na?

¹³ Wo gbi ze izobo gheghe na ọfa-a ugboduma ẹgua kẹ vwẹ. Ọtuphro rẹ emeranvwe kugbe ẹdidjala kugbe ọghwẹgbe re se. Mi se chiri orukuruku vẹ ọghwẹgbe ofuefu na-a.

¹⁴ Otuphro rẹ emeranvwe rẹ ovwan kugbe ẹdẹ rẹ erẹ re ovwan bruru i tu erhi mẹ oma; ayen rhoma rhe dia oghwa kẹ vwẹ, ofu rẹ ayen dje vwe.

¹⁵ Ọke ri wọ da bẹre abọ wẹn, Ki mi si ẹro mẹ nu kẹ wẹ ọ da dianẹ wọ nẹ ẹrhovwo buebu dede, Me kerhọ-ọn; abọ wẹn vọnre vẹ ọbara.

¹⁶ Hworhẹ oma wẹn, ru oma wẹn fon; si uruemu ọbrabra wẹn nu oma sio ne obaro mẹ; siobọ nẹ umwemwu,

¹⁷ yono emu esiri ru; guọnọ ọsoso, siobọ nẹ oshenyẹ, chochọ rẹ ọmọphrorivwi re wọ rẹ kẹ ayeuku.

¹⁸ Mọ vwo ọke na re avwanre jẹn iroro kugbe; ọtiọye Ọrovwohwo tare ọ da dianẹ imwemwu wẹn họhọ isene, e cha họhọ ẹton rẹ ogegede owenẹ evwanre kerẹ ododo e cha họhọ ukpọyibo.

¹⁹ Wọ da rhọvwe wo de mu ọghọ, ku wọ re emu esiri rẹ otọ na,

²⁰ Ẹkẹvuọvo wọ da sen wọ de mu kpahọ oda kọye a vwọ ghwọro owẹ, fikiridie unu rẹ Ọrovwohwo re tarọ.

Ẹdjọeguo kugbe Etanhirhe ri Zayọn

²¹ Mavọ orere esiri na rhe rhi hirhe oma phihọ igberadja; ọ rọ vọnre vẹ uyota! Ọvwata rhuẹn phihọ jovwo ẹkẹvuọvo ọke nana kẹ izighẹ.

²² Idọnọ wẹn hirhe oma phihọ isọn rẹ igho a vwẹ ame gua wain wẹn.

²³ Isun wẹn ihwo rẹ okpetu ayen igbeyan rẹ iji. ọvuọvo guọnọ udi ẹriọ ayen mia djẹ nene ẹse? Ayen chochọ rẹ emephrorivwi e karohọ oviẹ rẹ ayeukuu.

²⁴ Fiki re ọtiọye na Ọrovwohwo tare, Ọrovwohwo rẹ ofovwi na, Ọgba Ọvuọvo rẹ Izrẹl na E, Mi che won ophu mẹ ku ivwighrẹ mẹ, Me cha vwẹ ivwighrẹ mẹ re ihri

²⁵ Mi che hirhe obọ mẹ ku we Me wran esiso re igho wẹn kerẹ siẹ ra mrẹ odja re mi si isọnrẹ na no.

²⁶ Ki mi rhoma vwẹ iguẹdjọ wẹn mu kerẹ ọke rẹ ẹsosuọ ediẹguare wẹn kirobo re epha notọrhe. Ukuko rọye ke che se we orere re ọvwata, orere re esiri na.

²⁷ Uyota kọye a vwọ tan Zayọn hirhe, ihwo re herọ ri kurhertiẹ, Ọvwata kọye avwọ ta ayen.

²⁸ Ẹkẹvuọvo jihwo okpetu kugbe iruimwemwu ka guọghọ ayen kugbe, ihwo re sen Ọrovwohwo ka gbọrọ ayen.

²⁹ Fikiridie oma re ọhahe ro je we na kọ cha vọ we, opharo wẹn kọ dia ghwọkpọ fiki re ogba ru wọ jẹre.

³⁰ Kidie wọ cha dia kerẹ ọhahe rọ faẹbe, kerẹ ogba ro je ame vwo.

³¹ Ọgba kọ cha dia kerẹ oma, iruo rọye kọ sa unwe, ayen ivẹ ke cha tọn kugbe, o gbi vwo ohwo ro fuẹ aye-en.