Aghwoghwo 8 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ono re họhọ ọvwaghwanre? Ono re sa riẹn otọ rẹ emu na? Aghwanre rẹ ohwo nẹrhẹ opharo rọye lo, ọ rhẹriẹ ogangan rọ hẹ opharo rọye.

Mu ọghọ kẹ Ovie

² Yọnrọn urhi rẹ ovie, fiki rẹ iyori wo duvwu kẹ oma na, wo rhe jẹ ofu dje we-e,

³ yan nẹ obaro rọye, wo rha ghwọrọ ọke vwẹ ẹsiẹ rẹ ota rọye de miovwo uwe ivu-un, kidie obo ri jere ọ ruẹ.

⁴ Kidie ota rẹ ovie vọre vẹ ẹgba, kono ta kẹ nẹ, Die wo ruẹ?

⁵ Ohwo rọ yọnrọn urhi rha sa mrẹ odjadja-a, udu re ọvwaghwanre riẹn ọke vẹ idjerhe

Idjerhe rẹ Ọghẹnẹ rhonọ Erianriẹn rẹ Ohwo rẹ akpọ

⁶ Kidie ota kota vwo ọke vẹ idjerhe rọye, owenẹ ukpokpogho rẹ ohwo na epha họhọ vwẹ oma rọye.

⁷ Kidie ọ riẹn obo rọ cha dia-a, kono ri che dje obo rọ cha dia kẹ?

⁸ Ohwo ọvuọvọ se vwo ogangan rọ vwọ yọnrọn erhi rọye-e, eyẹ vwo vwo ogangan vwẹ enu rẹ ẹdẹ rẹ ughwu-u; o vwẹ obo ri se si ofovwi no-o, eyẹ umwemwu se sivwi ihwo ri ruo rhọ-ọ

⁹ Enana ejobi me mrẹ vughe re me vwọ vwẹ udu mẹ roro obo re ruẹ vwẹ otọ rẹ ọnre na, vwẹ ọkc rẹ ohwo da tua ohwo muotọ vwọ kẹ umiovwo rọye.

¹⁰ Me mrẹ oruimwemu re shiri; ayen da yancha yan kpo vwẹ asan ọfuanfon na, e di jiri ayen vwẹ orere na re ayen de ru oghẹre rẹ emu ọtiọye na. Ọnana ji odiodi rhe.

¹¹ Fikiridie a fobo brorhiẹ rẹ emu omiomio-vwi-i, kidie udu rẹ emọ rẹ ihwo vọnre vẹ umwemwu eruo.

¹² Owenẹ, oruimwemwu ru umwemwu abọ ujori yo ghwẹ-ẹ, dede na me riẹnre nẹ o che yovwi kẹ ihwo re djẹ oshọ rẹ Ọghẹnẹ fikiridie ayen djẹ oshọ vwẹ obaro rọye;

¹³ ẹkẹvuọvo o che yovwi kẹ oruimwemwu-u, eyẹrẹ ọ cha sa tọn kerẹ uhoho-o, fikiridie ọ djẹ oshọ vwẹ obaro rẹ Ọghẹnẹ-ẹ.

¹⁴ Emu diodi ọvo herọ vwẹ akpọ na, nẹ evwata evo herọ re reoja kerẹ oruimwemwu, yẹ ihwo umwemwu evo herọ ro rhe yovwẹ kẹ kerẹ ọvwata. Me tare nẹ ọnana je hẹ odiodi rhe.

¹⁵ Mi de jiri omavwerhovwẹ, kidie ohwo rhe vwo emu esiri vwẹ otọ rẹ ọnre na-a, ẹkẹvuọvo e jọ re, rere ọ da, rere oma vwerhọ, kidie ọna obo ri tere vwẹ owian rọye vwẹ ẹdẹ ejobi rẹ Ọghẹnẹ vwọ kẹ vwẹ otọ rẹ ọnre na.

¹⁶ Ọke me vwọ vwẹ udu mẹ kẹ ẹriẹn rẹ aghwanre, re me rhe vwọ mrẹ iruo re ruru vwẹ otọ rẹ ọnre na, nẹ vwẹ ason eyẹ uvo ohwo sa vwerhẹ-ẹ;

¹⁷ etiyin me da mrẹ iruo rẹ Ọghẹnẹ ejobi, nẹ ohwo sa riẹn otọ rẹ iruo re ruru vwẹ otọ rẹ ọnre na-a. O vwo obo rẹ ohwo wian te, eyẹ guọnọ te, rọ da sa riẹ-ẹn; dede na ọvwaghwanre tare nẹ ọyen riẹnrẹ, yẹ ọ sa guọnọ mrẹ.