Aghwoghwo 7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Erhuvwu rẹ Aghwanre

¹ Odẹ esiri yovwi nọ udẹ rọ ghare; ẹdẹ rẹ ughwu rhonọ ẹdẹ rẹ evwiẹ.

² Ofori re vwo kpo uwevwi rẹ uvweri nọ uwevwi rẹ ọriotu; kidie ọnana oba rẹ ihwo ejobi, rere ihwo rẹ akpọ na vwọ vwẹ udu kpahọ.

³ Uvweri yovwi nẹ ehwẹ, kidie opharoemuohọ nẹrhẹ udu ghọghọ.

⁴ Ẹnwẹn rẹ ọvwaghwanre ọ hẹ evun rẹ uwevwi rẹ uvweri, ẹkẹvuọvo ẹnwẹn rẹ ẹkpa ọ hẹ evun rẹ uwevwi rẹ aghọghọ.

⁵ Ofori re vwo nyo ẹghwọ kuo rẹ ọvwaghwanre nọ une rẹ ẹkpa.

⁶ Kirobo rẹ iwe duvwu otọ rẹ ochẹ fiẹ na, ọtiọye ehwẹ rẹ ẹkpa epha, ọnana je hẹ odiodi rhe.

⁷ Omuẹro oshenyẹ re nẹrhẹ ọvwaghwanre ruẹ kerẹ ẹkpa, udi ẹriọ miovwo udu.

⁸ Oba rẹ emu yovwi nọ ẹtuọhọ rọye, odiri vwẹ erhi yovwi nọ erhi rọ kparoma kpenu.

⁹ Wọ fobọ mu ophu-u kidie udu rẹ ẹkpa ọye ophu dia.

¹⁰ Wọ tanẹ, Die ọke rẹ awanre vwo yovwi nọ ọke nana? kidie ọ dia nẹ aghwanre wọ vwori wọ vwọ nọ enanọ nana-a.

¹¹ Aghwanre fo obo ra vwọ reuku, ọ vẹ erere kẹ otu re mrẹ ọnre na.

¹² Kidie ekpọfia rẹ aghwunre họhọ ekpọfia rẹ Igho, erere rẹ erianriẹn ọ na nẹ aghwanre sa sẹro rẹ akpọ rẹ ohwo ro vworo.

¹³ Roro iruo rẹ Ọghẹnẹ; ono re sa phiọn emu rọ ma gẹre nu?

¹⁴ Ghọghọ vwẹ ẹdẹ ro de yovwo uwe, roro vwẹ ọke rẹ ọbẹvwẹ. Ọghẹnẹ rọ ma ọvo na ye je ma ọrivẹ na, rere ohwo vwo jẹ obo re cha phia vwẹ obuko roye ẹ mrẹ.

¹⁵ Me mrẹ emu ejobi vwẹ akpọ odiodi mẹ na, o vwo ọvwata ro ghwu phihọ evun rẹ ọvwata rọye, kugbe ohwo umwemwu rọ tọnre vwẹ evun rẹ umwemwu rọye.

¹⁶ Wọ ghwa dia ọvwata nọ-ọ, wọ je ghwanra nọ kẹ ọma wẹ-ẹn; die sorọ wọ vwọ ghwọrọ oma wẹn kuẹfia?

¹⁷ Wo ghwe ru umwemwu nọ-ọ, eyẹ wọ ghwa dia ẹkpa-a; die sorọ wo vwo ghwu jẹ ọke wẹn vwo?

¹⁸ Ofori ru wọ vwọ yonrọn ọnana, wọ ji ghwe siobọ nẹ ọyena-a, kidie ohwo rọ djẹ oshọ rẹ Ọghẹnẹ kọ vabọ rẹ enana ejobi.

¹⁹ Aghwanre vwẹ ẹgba kẹ ọvwaghwanre nọ isun ihwe re hẹ evun rẹ orere.

²⁰ Omuẹro o vwo ọvwata ọvuọvo vwẹ akpọ na ro jẹ imwemwu e ruo-o.

²¹ Wọ kerhọn rẹ emu ejobi rẹ ihwo ta-a, wo de rhe nyo ekan rẹ odibo wẹn harhe owẹ,

²² wọ riẹnre vwẹ udu wẹn nẹ ọke buebu re wo je harhẹ ihwo efa.

Guọnọ otọ rẹ Aghwanre mrẹ

²³ Me vwẹ aghwanre davwẹ enana ejobi re, me da ta, me ghwanre, ẹkẹvuọvo o de sheri kẹ vwẹ.

²⁴ Ọyena rọ herọ na, ọ shesheri, kokodo, o kodori gangan, kono sa guonọ phia?

²⁵ Mi de brevun kpiroro rere me riẹn otọ rẹ emu ejobi, rere me riẹn umwemwu vẹ ugheghẹ vẹ uruemu rẹ ẹkpa ro rhi fi orhue.

²⁶ Me da rhe mrẹ obo rọ yare nọ ughwu aye rẹ udu rọye ọvo dia ufi vẹ obriki rẹ abọ rọye ọvọ je hẹ igoni, ohwo ro ru obo ri jẹ Ọghẹnẹ kọ djẹ vabọ ẹkẹvuọvọ aye na ko reyọ oruimwemwu vwọ boma.

²⁷ Nighe, ọnana obo re me mrẹre, eriyin Aghwoghwo na tare, ọ da reyọ emu ọvo vwọ ba ọrivẹ rere ọ vwọ mrẹ obo re emu ejobi bute,

²⁸ rẹ udu mẹ guọnọ cha guọnọ kpo, ẹkẹvuọvo me je mrẹ-ẹ. Ohwo ọvuọvo me mrẹre vwẹ usun rẹ uriori re me mrẹre na, me je mrẹ aye ọvuọvo vwẹ usun rẹ enana ejobi na-a.

²⁹ Nighe, ọnana ọvo me mrẹre, nẹ Ọghẹnẹ ma ohwo ọsoso, ẹkẹvuọvo ayen rhe guọnọ egbẹlẹkẹ buebu mrẹ.