Aghwoghwo 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Me mrẹ umiovwo ọvo vwẹ otọ rẹ ọnre na, ro shenyẹ ihwo muotọ:

² ohwo rẹ Ọghẹnẹ vwẹ efe kẹ, vẹ eyenre buebu, kugbe ọghọ, rere emu ejobi rọ guọnọre vwo jẹ karọ, yẹ Ọghẹnẹ rha sa vwẹ ogangan kẹ rere ọ sa vwọ re avwerhe rẹ aye-en, ẹkẹvuọvo ọrhorha kọye vwẹ ayen ghọghọ; ọnana emu diodi, ọdjorho rode o ruẹ.

³ Ọ da dianẹ ohwo vwiẹ emọ ujọri, rọ da dia akpọ ikpe buebu, rẹ ikpe rọye da dia buebu, ẹkẹvuọvo ọ gbe mrẹ avwerhe rẹ omamọ rẹ akpọ eyere-e, e gbi rhe sho omamọ rẹ esho-o, me tare nẹ ọmọ rẹ evwiẹ chọra yovwi nọ ohwo yena.

⁴ Kidie ọ rhere odiodi ọ da yan no ra ro evun rẹ ebri, ebri na de rhurhu odẹ roye muotọ.

⁵ Ọ rọ marho ọ je mrẹ ọnre-e eyẹ ọ je riẹn emuovo-o; yẹ ọ mrẹ urovwoma nọ ohwo yena.

⁶ Owenẹ ọ dia akpọ na ikpe uriori ivẹ, yẹ o vwo avwerhe-e, ọ dianẹ asan ọvo ihwo na ejobi ra?

⁷ Unu ọye ohwo wian owian na ejobi kẹ, yẹ urhuru sivwe rọye se fue-e.

⁸ Didi erere ri te ọvwaghwanre nọ ẹkpa? Kidie ovwiogbere mrẹ reyọ rọ riẹn obo re mu oma rọye phihọ ọghọ vwẹ obaro rẹ ihwo?

⁹ Orẹmrẹ rẹ ẹro yovwi nọ iroro ro titighi; ọnana je hẹ odiodi vẹ odju re nene họnra.

¹⁰ Emu rọ herọ na, ọ herọ vẹrhe nu re ki ji mu odẹ kẹ, a da riẹn obo rẹ ohwo epha nu, o rhe fo rere ọ vẹ ohwo rọ goma nọ phro aphro-o.

¹¹ Eta de bu nọ, ke se ayen emu diodi, kidie ohwo rhe vwo yovwi nọ?

¹² Kono sa riẹn obo ri yovwi kẹ ohwo vwẹ uche ẹdẹ rẹ akpọ ọkrẹkrẹ re uhoho fefe nana? Yẹrẹ kono sa ta kẹ ohwo obo re cha phia kẹ vwẹ ukuko rẹ akpọ rọye vwẹ otọ rẹ ọnre na?