Aghwoghwo 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Me da ta kẹ omamẹ nẹ, Yanrhe, Me vwẹ avwerhe davwe owẹ ni; gba ghọghọ kẹ oma wẹn. Ẹkẹvuọvo nighe, ọnana dede na je hẹ odiodi.

² Me da ta kẹ ọhwehwẹ nẹ, Wọ mworhuẹ, oma rọ vwerhe owẹ na kidie ofiri

³ Me da vwẹ iroro mẹ vwo kpahe udi re me da, re oma mẹ vwọ sasa yẹ iroro vẹ aghwanre mẹ re sun uvwe ra ruẹ ughẹghẹ, bẹsiẹ me vwọ mrẹ obo ri yovwiri kẹ emọ rẹ ihwo ri ru vwẹ akpọ na vwẹ ọmọkẹ krẹ rẹ ayen dia akpọ na.

⁴ Mi de ru iruo ride buebu; me da bọn iwevwi mẹ, me da kọn ogba ri vain kẹ oma mẹ buebu.

⁵ Mi de ru egbo rode kẹ oma mẹ, me da kọn okoka rẹ emamọ rẹ irhe na ejobi phihọ ayen.

⁶ Me da vwẹ obọ mẹ tọn ẹtẹrhe ame rọye kọye a vwọ kpọrhọ egbo rẹ irhe buebu re djẹ na.

⁷ Me dẹ eviẹn rẹ eshare vẹ e rẹ eya, kugbe eviẹn buebu re vwiẹri vwẹ uwevwi mẹ; mi ji vwo uchuru rẹ irhuẹn kugbe igegede buebu, nọ ihwo re karo kẹ vwẹ vwi Jerusalẹm na.

⁸ Me je ghwẹ koko kẹ oma mẹ efe rẹ idọnọ efuanfọn vẹ oro kugbe efe rẹ ivie vẹ ibrotọ kẹ oma mẹ buebu, Mi vwo ibune buebu, te eshare te eya, kugbe ense buebu, obo rẹ ọshare guọnọ.

⁹ Ọtiọye na me da rhe dia okpohwo, me da rho nọ ihwo ejobi re karo kẹ vwẹ ejobi vwi Jerusalẹm; ye aghwanre mẹ na vo vwẹ je herọ rhe.

¹⁰ Kemu kemu re me guọnọre ejobi mi si ẹro mẹ nẹ aye-en; mi si ẹnwẹn mẹ nẹ avwerhe-e, kidie me vwẹ iroro mẹ kpahe avwerhe vwẹ evun rẹ owian mẹ ejobi, ọnana kọye osa rẹ owian mẹ ejobi.

¹¹ Etiyin mi de rhi roro emu ejobi re me vwẹ abọ mẹ ru kugbe owian re me ghwọrọ ọke mẹ phihọ, nighe, ayen ejobi odju mi nene họnra, emu ọvuọvo vwẹ erere vwẹ otọ rẹ ọnre na-a.

¹² Ọtiọye na mi de kuoma rhẹriẹ rhi roro aghwanre kugbe orhuẹ vẹ ughẹghẹ; kidie ọshare rọ vwọ kpahe ovie na se ru? Emu ro ruru vẹrhe nure na ọye ọ ji se ru.

¹³ Etiyin me da rhe mrẹ vughe nẹ aghwanre yovwi nọ ughẹghẹ kirobo rẹ orẹmrẹ yovwi nọ ebri.

¹⁴ Ẹro rẹ ọvwaghwanre ọ hẹ uyovwi rọye, ẹkẹvuọvo ẹkpa evun rẹ ebri na ọ da yan; dede na me rhe mrẹ vughe nẹ urhiẹvwe ọvuọvo na ri nene ayen ejobi duvwu.

¹⁵ Etiyin me da ta kẹ oma mẹ nẹ, obo ri ru ẹkpa ọye ji ru vwe rhe; kidie me rha vwọ tobọ dia ohwo rọ ghwanre gangan na? Me da ta kẹ oma mẹ nẹ ọnana je hẹ emu diodi rhe.

¹⁶ Kidie owenẹ ọ dia ọvwaghwanre eyẹ ẹkpa ekarohọ rayen se krẹ-ẹ, kidie vwẹ oba rọye vwẹ obo ayen ejobi cha chọrọ ẹro. Obo rẹ ọvwaghwanre ghwẹ eriyin ẹkpa ji ghwẹ!

¹⁷ Ọtiọye na akpọ na de tu vwe oma, fikiridie obo re ruẹ vwẹ otọ rẹ ọnre na miovwo uvwe ivun; ọnana ejobi na odiodi kugbe odju re nene họnra.

¹⁸ Oma rẹ owian re me wianre vwẹ otọ rẹ ọnre na ejobi de tu vwe oma, kidie me mrẹre nẹ me cha yan jovwo kẹ ohwo rọ cha vwẹ obuko mẹ.

¹⁹ Kono riẹn obo rẹ ohwo yena cha dia, ọvwaghwanre gbenẹ ẹkpa? Dede na kọ dia olori rẹ owian re me reyọ aghwanre mẹ vwọ wian vwẹ otọ rẹ ọnre na. Ọnana je hẹ odiodi.

²⁰ Ọtiọye na mi de kuoma rhẹriẹ ofu de dje vwe me da kpare iroro mẹ vrẹn owian kugbe iruo mẹ ejobi vwẹ otọ rẹ ọnre na.

²¹ Fikiridie ọke ọvo herọ rẹ ohwo ro vwẹ aghwanre vẹ erianriẹn kugbe ona vwọ wian owian nu me yan jẹ ayen ejobi vwo vwọ kẹ ohwo ọfa rọ wian phihọ-ọ vwo yovwerhi. Ọnana dede je hẹ odiodi kugbe emu ọbrabra rode.

²² Didi emu ohwo mrẹ reyọ vwẹ evun rẹ owian kugbe osọnọ rọ rere vwẹ owian na ejobi vwẹ otọ rẹ ọnre na?

²³ Kidie ẹdẹ rẹ akpọ rọye ejobi vọnre vẹ odjadja vẹ ophu rẹ iruo; ason dede na iroro rọye ji rovwoma-a. Ọnana je hẹ odiodi rhe.

²⁴ Emu ọfa rha herọ ro yovwi kẹ ohwo-o jokpa nẹ ọ gba re rere ọ da, rere ọ mrẹ avwerhe rẹ owian rọye. Ọnana dede na, me mrẹrẹ nure nẹ, obọ rẹ Ọghẹnẹ o ji nẹcha.

²⁵ Kidie o nẹ obọ rọye rhe-e, kono re sa re eyẹ kono ri se vwo omavwerhovwẹ?

²⁶ Kidie ohwo rẹ ivun rọye vwerhẹ Ọghẹnẹ ọye ọ vwẹ ẹghwanre vẹ erianriẹn kugbe aghọghọ kẹ; ẹkẹvuọvo Ọghẹnẹ reyọ okọn rẹ owian rẹ oruimwemwu ejobi, vwọ kẹ ohwo rẹ ivun rọye vwerherọ. Ọnana dede na je hẹ odiodi vẹ odju re nene họnra.