Aghwoghwo 12 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Karohọ Omẹma wẹn vwẹ ọke re wọ vwọ eghene na, bẹsiẹ rẹ ẹdẹ umwemwu na che vwo te, rẹ ikpe na vwo te otọ, vwẹ ọke re wọ da cha tanẹ, Mi vwo omavwerhovwẹ vwẹ evun rẹ aye-en.

² Bẹsiẹ rẹ ọnre na vẹ uvo na, vẹ emeranvwe na, vẹ isio na che vwo mu ebri rẹ enu na de che bi rẹ osio da rhọ nu;

³ vwẹ ẹdẹ rẹ ihwo re sẹro rẹ uwevwi na da phariẹ, rẹ egba da cha suawurhun, rẹ ihwo ri wuye da cha fọ fikiridie ayen buru-u, kugbe ẹro rẹ ihwo re wan evakpo nughe de che muegho,

⁴ re de huhu ẹchẹ rẹ irhuvwu ejobi na, vwẹ ọke rẹ edo rẹ uwuye na de fuen kpoto, rẹ ọvo de vrẹn vwẹ ọke rẹ ọmọphran de kperẹ ra da vwẹ emetẹ na ejobi ri suine hwa otọ,

⁵ rẹ obo ri kpenu vwo mu ayen oshọ rẹ uguegue da he idjerhe; urhe rẹ orhomrẹ da kpa ipho, rẹ abaka na de kpono yanran rẹ ẹguọnọ de re, kidie ohwo yanran kpo uwevwi rọye ri bẹdẹ, yẹ otu rẹ uvweri na re beroma vwẹ irhuvwu.

⁶ Bẹsiẹ rẹ vwo vwrẹ ejọrọ rẹ idọnọ na eyẹ udjokpo rẹ oro na vwo ghwu, eyẹ ochẹ vwo ghwu vwẹ obo orhare, eyẹrẹ rẹ adjugẹn na vwọ guọghọ.

⁷ Rẹ iwurhie vwo rhivwi kpo ekpẹn kirobo rọ epha jovwo, erhi na de rhivwi bru Ọghẹnẹ ro vworo.

⁸ Odiodi rẹ idiodi, ọye Aghwoghwo na tare; ayen ejobi odiodi.

Iruo rẹ Ohwo rẹ akpọ Ejobi

⁹ Ra vwọ ba ẹghwanre na ro vwori na, Aghwoghwo na ji yono ihwo na erianriẹn E, o roro, ọ guọnọ phia, o de kpe ite buebu.

¹⁰ Aghwoghwo na da guọnọ eta rẹ avwerhe, ọ da vwẹ evun ọsoso si eta rẹ uyota na phihọ otọ.

¹¹ Eta rẹ ọvwaghwanre họhọ eto, kerẹ ibibẹn re hwemu eyẹ eta ra toro koko na epha rẹ Osuigegede ọvo na yonori.

¹² Ọmọ mẹ, kẹnoma ri emu kemu rọ vrẹn enana. Ẹbe buebu rẹ e se na vwo oba-a, eyono buebu na vwẹ oma eghwọrọ kẹ ohwo.

¹³ Oba rẹ ota na ejobi, re nyori na ọ na. Djẹ ọshọ rẹ Ọghẹnẹ, rere wọ yọnrọn irhi rọye; kidie ọnana ọye iruo ro te ohwo.

¹⁴ Kidie Ọghẹnẹ cha vwẹ uruemu kuruemu ejobi vwo guẹdjọ, emu kemu re ruru vwẹ odjahọ, oyovwiri eyẹ o miovwiri.