Aghwoghwo 11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uruemu rẹ Ohwo rọ Ghwanre

¹ Kpare ikara wẹn phihọ ame, kidie ẹdẹ buebu da wan nu ku wọ cha mrẹ.

² Ghare ẹkẹn kẹ ihwo ighwrẹ, eyẹ ẹrenre, kidie wọ riẹn umiovwo rọ cha rhe akpọ na-a.

³ Aruọke na da vọn vẹ osio, kọ rhọ ayen phihọ otọ; urhe de she kpo obọrhe ọnre eyẹ obọhwẹre ọnre, asan rẹ urhe na she teye na, etiyin ọ dia.

⁴ Ohwo rọ rhẹrẹ odju sa kọ-ọn; kugbe ohwo ro nẹ aruọke se vuẹ-ẹ.

⁵ Ọtiobo rẹ wọ riẹn obo rẹ erhi na wan ruẹ ibeku rẹ akpẹn rẹ evun rẹ aye vevu-un na, ọtiọye na wọ je sa riẹn kemu kemu rẹ Ọghẹnẹ ruẹ-ẹ.

⁶ Kọn ekankọn vwẹ irhiọke, kugbe ọke rẹ ovwọnvwọn wọ kẹkẹ obọ-ọ; kidie wọ riẹn ọ ro che yovwẹ-ẹ, se ọnana eyẹ ọyena, eyẹrẹ ivẹ na ri che yovwẹ kuẹgbe.

⁷ Orẹmrẹ miẹmiẹ, o ji fo kẹ ẹro ro nughe re ọnre na.

⁸ Kidie ohwo da dia akpọ ikpe buebu, gbe jẹ ọ ghọghọ vwẹ evun rẹ ayen ejobi; ẹkẹvuọvo gbe jẹ ọ karohọ nẹ ẹdẹ rẹ ebri na cha dia buebu. E re rhere ejobi na idiodi i ruẹ.

Uchebro kẹ Emeghene

⁹ Ghọghọ, E, emeghene, vwẹ ọke rẹ ọmoha wẹn, jẹn oma vwerhe udu wẹn vwẹ ọke rẹ ọmọha wẹn; yan vwẹ idjerhe rẹ udu wẹn vẹ orẹmrẹ rẹ ẹro wẹn na. Ẹkẹvuọvo wọ me riẹn nẹ vwẹ evun rẹ emu nana ejobi na Ọghẹnẹ cha reyọ owẹ vwo guẹdjọ.

¹⁰ Si ophu nẹ iroro wẹn, rere wo si odjadja nẹ oma wẹn, kidie ọmọha vẹ ẹsosuọ rẹ akpọ na idiodi i ruẹ.