Aghwoghwo 10 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Die hẹ oba rẹ Ugheghẹ

¹ Iyẹn ri ghwu phihọ evun rẹ ude nẹrhẹ ọnrhe rọye gbo brabra; ọtiọye umugheghẹ gbẹ ọghọ vẹ aghwanre phihọ otọ.

² Obọrhe ọvo ọye udu rẹ ọvwaghwanre hirharo kuẹ, ẹkẹvuọvo obọhwẹre ọye udu rẹ ẹkpa hirharo kuẹ.

³ Ọ da tobọ dianẹ ẹkpa na yan vwẹ idjerhe ghevweghe, iroro ji rhe-e, ọ me ta kẹ ohwo kohwo nẹ ọye ẹkpa.

⁴ Ophu rẹ osun da tua kpahe owẹ, wo vrẹn nẹ asan wọ epha-a, kidie oma wo hwemu kpare ophu rode kuẹfia.

⁵ Umiovwo ọvo herọ re me mrẹre vwẹ otọ rẹ ọnre na, rọ họhọ oruchọ ọvo ro nẹ obọ rẹ osun na rhe:

⁶ e de mu ẹkpa na phihọ asan ro kpenu, edafe na de tidia phihọ asan ro kpotọ.

⁷ Me mrẹ eviẹn re guan vwẹ enu rẹ iyesi, yẹ isun ra vwẹ awọ yan otọ kerẹ eviẹn.

⁸ Ọ rọ tọn ọgọdọ ọvo ọye ri she phihọ evun rọye. Ọ rọ guọghọ ogba wan ọye ọrọdekọ rhovwa.

⁹ Ọ rọ kporo eragha ọye eragha woma; ọ rọ bẹrẹ irhe ọye irhe fa.

¹⁰ Utehru da epha moromoro ra nọrọ-ọ, ẹgba ọgangan kọye a reyọ vwo ruiruo; ẹkẹvuọvo aghwanre kọye nẹrhẹ ohwo kparobọ.

¹¹ Ọrọdekọ da rhọvwọ ohwo nu ra ke shua, ohwo rọ shuarọ na vwo erere-e.

¹² Eta rẹ unu rẹ ọvwaghwanre nẹrhẹ a vwẹ ọghọ kẹ, ẹkẹvuọvo ẹbẹrunu rẹ ẹkpa ọye ri hwe.

¹³ Etuọhọ rẹ eta rẹ unu rọye pha gheghẹ, oba rẹ ota rọye kẹ ọrhuẹ vẹ uvumwemwu.

¹⁴ Ẹkpa ta eta buebu, dede na ohwo sa riẹn obo rọ epha-a, kono re sa ta kẹ obo rọ cha dia vwẹ ukuko rọye?

¹⁵ Owian rẹ ẹkpa vwẹ oma ẹghwọrọ kẹ, ọtiọye na o rhe vughe idjerhe ra wan kpo orere-e.

¹⁶ Ekan kẹ wẹ, E otọ, vwọ ọke rẹ ovie wẹn da hẹ omotete, ọke rẹ isun wẹn da re orẹ rẹ irhiọke!

¹⁷ Aghọghọ kẹ wẹ, E otọ, vwẹ ọke rẹ ovie wẹn da dia omuvwiẹ rẹ ihwo, rẹ isun wẹn da re orẹ vwẹ omamọ rẹ ọke, vwẹ ọ rẹ ogangan, ọ dianẹ kẹ ọ rẹ udiẹda-a!

¹⁸ Uvwerhi re nẹrhẹ ebọn rhirẹ, kugbe uvwerhi re nẹrhẹ uwevwi fiẹ.

¹⁹ Ikara herọ vwọ kẹ ehwẹ, udi nẹrhẹ oma sasa, igho ri furhiẹ eta ejobi.

²⁰ Wọ vwẹ iroro evun wẹn harha ovie-e, eyẹrẹ wọ harha odafe vwẹ uvun wẹ-ẹn, kidie ọmọphran rẹ obenu na cha ghwa urhuru wẹn yan, eyẹ eranvwe vẹ ibekpe che gbeje uwe.