Aghwoghwo 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ayen Ejobi Odiodi

¹ Eta rẹ Aghwoghwo, ọmọ rẹ Devid, ovie rọ hẹ Jerusalẹm.

² Odiodi rẹ idiodi, Aghwoghwo na tare, Odiodi rẹ idiodi! Ejobi odiodi.

³ Didi erere ri te ohwo vwẹ owian na ejobi rọ wian vwẹ otọ rẹ ọnre na?

⁴ Uvwiẹ kpo, uvwiẹ cha ẹkẹvuọvo akpọ na herọ bẹdẹ.

⁵ Ọnre na vacha ọnre na ji she kpotọ, o mi rhe broma kpasan rọ va nẹcha.

⁶ Odju na djuẹ kpo obọrhe ọnre, ọ me rha yan riariẹ obọhwẹre ọnre na, ekiekio yariẹ odju na vwọ yan, ohrohribo odju na vwo rhivwi kpo.

⁷ Irhie na ejobi djẹ ọkẹre kpo obo abadi ẹkẹvuọvo abadi na vọ-ọn, asan rẹ irhie na djẹ ra, oboyi ayen rhoma djẹ ra.

⁸ Emu ejobi vọnre vẹ omẹghwọrọ; ohwo sa ta-a, ẹro na sian ughe-e, eyẹrẹ ẹmienyo vọn erhọn chekọ-ọ.

⁹ Emu rọ herọ vẹrhe ọye je herọ, obo re ru nure ọye e ji che ru, emu ọvuọvo dia ọkpokpọ vwẹ otọ rẹ ọnre na-a.

¹⁰ Emu ọvo je herọ ra tare nẹ, Nighe, ọnana ọkpokpọ? Ọ herọ vẹrhe nure, vwẹ ikpe buebu tavwe rẹ avwanre ke rhe dia.

¹¹ O vwo ekarohọ rẹ obo re wanre-e, eyẹrẹ ekarohọ tobọ herọ kẹ emu re hẹ obuko re je phia-a vwẹ usun rẹ ayen re cha vwẹ obuko na.

Obo rẹ Aghwoghwo na mrẹre

¹² Mẹvwẹ Aghwoghwo na rẹ ovie rẹ Izrẹl vwi Jerusalẹm.

¹³ Me da vwẹ iroro mẹ ejobi vwọ kpahe ẹghwanre, vwọ guọnọ otọ rẹ emu ejobi re ruẹ vwẹ otọ rẹ odjuvwu na; iruo rẹ ivuemiovwo rẹ Ọghẹnẹ vwọ kẹ emọ rẹ ihwo rẹ akpọ rere ayen vwọ de laghẹ oma.

¹⁴ Me mrẹ emu ejobi re ruẹ vwẹ otọ rẹ ọnre na nure, nighere, emu na ejobi odiodi kugbe odju re nene họnra.

¹⁵ Emu ro gunuru nure asan phiọ-ọ, obo re karo ohwo epha buebu.

¹⁶ Me da ta kẹ oma mẹ, Mi vwo aghwanre rode rọ rhonọ ọ rẹ ihwo ri ke su vwi Jerusalẹm; iroro mẹ da mrẹ emu rẹ aghwanre buebu kugbe erianriẹn.

¹⁷ Me da vwẹ iroro vwọ kpahe erianriẹn rẹ aghwanre rere mi vwo vughe orhuẹ vẹ ugheghẹ. Ukuko rọye me da mrẹ vughe nẹ odju mi nene họnra.

¹⁸ Kidie aghwanre buebu nẹrhẹ ophu buẹ ohwo rẹ erianriẹn rọye buphihọ yẹ oja roye ji ghwe buẹ phihọ.