2 Timoti 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Mi ji urhi nana kẹ wẹ vwẹ obaro rẹ Ọghẹnẹ kugbe obaro ri Kristi Jesu ohwo ro che guẹdjọ rẹ ihwo ekpokpọ kugbe i ri ghwuru, vwẹ ọke rẹ ẹcha rọye kugbe uvie rọye.

² Ghwoghwo ota na, kpata kpata vwẹ evwru eyẹ vwẹ oghẹre rẹ ọke ejobi, vwẹ erhiori wo jọ bẹn wẹ-ẹ, ta rọ ro ohwo ghwo, bru uche,

³ Kidie ọke cha rẹ ihwo de jẹ davwerhọ rẹ omamọ rẹ uyono, ẹkẹvuọvo ọke rẹ erhọn rẹ ayen da rhe dia gede gede re ke cha ghwẹ iyono huehn gidoma ri yọno ayen obo ri je ayen,

⁴ ki che chuko ku e gbe daywerhọ rẹ uyota na-a ki ho nene esia ẹrhọghọ.

⁵ Vwọ kẹ wẹ, choma kọke kọke, ehiri oja, ru iruo rẹ aghwoghwo gbe odibo wẹn gba.

⁶ Kidie kẹ emerha ra cha vwọ vwo ovwẹ ze izobo; ọke rẹ ukpo mẹ o rere.

⁷ Me họnre omamọ rẹ ohọnre na nure, me djẹ onẹ na nure, me yọnre esegbuyota na nure.

⁸ Kẹ etinẹ arare a vwẹ erhu rẹ uvie rẹ ọvwata na kpahe oboyin hẹrhẹ ovwẹ, rẹ Ọrovwohwo na, oguẹdjọ rẹ esiri na, cha vwọ kẹ vwẹ vwẹ Ẹdẹ yena, ọ dianẹ kẹ omẹvwẹ ọvo-o ẹkẹvuọvo vwọ kẹ ayen ejobi re guọnọ ẹcha rọye.

Uyouo hẹ omoma rẹ ohwo

⁹ Ru rere wo bru uvwe rhe phẹrẹkpẹ.

¹⁰ Kidie Dimas, rẹ urhuru rẹ akpọ shi, djẹ jẹ uvwe vwo kpo Tẹsalonaika; Krẹsẹns dje kpo Gaiesha, Taetọs kpo Daimesha.

¹¹ Luk ọvo kọye ri ehekọ. Reyọ Mak re wọ vẹ ọye rhe; kidie ọ ga vwẹ gangan.

¹² Mi ji Taekikọs kpọ Ẹfesọs.

¹³ Wọ da cha, reyọ adagba mẹ re me yan jovwo vwẹ asan ri Kapọs vwẹ obi Traos ye, ji te ẹhe na, marho kẹ ọ ra vwẹ obọ si na.

¹⁴ Alẹkzanda rẹ odjogu na ru vwe emu ọbrabra gangan; Ọrovwohwo ọvo re sa hwa osa rẹ uruemu rọye kẹ.

¹⁵ Ekpuyovwi wẹn me je kenoma kẹ, kidie ọ vwọ so ovuẹ rẹ avwanre na gangan.

¹⁶ Vwẹ ẹsosuọ ri mi vwo gu ẹkẹn unu mẹ ohwo ọvuọvo vẹ ovwẹ dia obọ-ọ; ayen ejobi mrẹ vwẹ djẹ. E je kere ba kẹ aye-en!

¹⁷ Ẹkẹvuọvo Ọrovwohwo de mudia cha vwẹ ọ da kẹ ogangan mi vwo ghwoghwo ota na gbagba, rere ihwo ri Keferi na ejobi vwo nyo. Vwẹ ọtiọye na e vwo sivwi uvwe nẹ unu rẹ okpohrokpo na.

¹⁸ Ọrovwohwo ko se sivwi uvwe nẹ emu obrabra ejobi, ko ji sivwi uvwe ra ro uvie rọye vwẹ obo odjuvwu. Ọye a vwẹ urinrin kẹ bẹdẹ bẹdẹ Isẹ.

Uyota rẹ ha oba

¹⁹ Vere Priska kugbe Akuaila, kugbe evwruwevwi rẹ Ọnisforọs.

²⁰ Erastọs daji bhi Kọrẹnt; me yan ji Trofimos vwo vwẹ obi Mailitọs.

²¹ Fobọ rhe re ohwahwa ki she. Yubulọs nẹ eyere uwe, ọtiọye je hẹ Pudins kugbe Lainus kugbe Klọdia kugbe imoni na ejobi.

²² Ọrovwohwo nene erhi wẹn dia. Ẹserọphẹ nene nwe dia.