2 Timoti 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uruemu rẹ Ihwo vwẹ Edẹ rẹ ha oba na

¹ Ẹkẹvuọvo jẹ ọnana ro owẹ nẹ, vwẹ oba rẹ ẹdẹ na ẹdẹ ehrahra cha rhe.

² Kidie ihwo cha guọnọ omaobọ rẹ ayen nọ, e cha guọnọ igho nọ, i che phuoma nọ, i che ni oma rhuarho nọ, e cha harhe ekan nọ, i gbi che mu ọghọ kẹ esẹ vẹ ini-i, e gbe cha riẹn ẹse-e, e gbe cha guọnọ ẹfuọ-ọn,

³ i gbi vwo omaeririo-o, e gbi se fue ọhọre rẹ aye-en, ri miọvwi odẹ rẹ ihwo, ke vẹn ro umwemwu, ke djoma, ki tuoma rẹ emu esiri,

⁴ ke shẹ ihwo, zighi zighi, ke vọn vẹ ophiẹvwe, ke guọnọ omavwerhe jẹ ẹguọnọ rẹ Ọghẹnẹ vwo,

⁵ ri muẹ ofian rẹ ẹga haroma ẹkẹvuọvo yẹ ayen sian ogangan rọ herọ. Kẹnoma kẹ ihwo ọtiọye na.

⁶ Kidie ihwo evo hẹ ohri rẹ ayen na re rhẹrẹ ruẹ evwruwevwi rẹ ihwo i mi mu eya re epha huehuẹ, re kru oghwa rẹ imwemwu nyẹ rẹ urhuru sivwe phiegbe kpenẹ phiegbe kpenẹ,

⁷ re kerhọn ri kohwo kohwo yi vwo ẹruọ rẹ uyota na-a.

⁸ Kirobo ri Jens kugbe Jambris vwọ so Mosis, ọtiọye eshare nana vwọ so uyota na, ihwo rẹ udu rayen miovwiri rẹ esegbuyota rayen vọnre vẹ ophiẹvwe;

⁹ ẹkẹvuọvo ayen cha yan sheri nọ, kidie ughẹghẹ rayen cha phia kẹ ihwo ejobi mrẹ, kirobo rọ epha kẹ eshare ivẹ yena.

Uche rẹ obo ri Pọl bru Timoti

¹⁰ Asakiephana wọ nabọ ni uyono mẹ so, uruemu mẹ, obo ri mi nẹ vwẹ akpọ eyere mẹ, esegbuyota mẹ, odiri mẹ, ẹguọnọ mẹ, emuẹdiagan mẹ,

¹¹ Enu mẹ, oja mẹ, obo re phia kẹ vwẹ vwẹ Antiọk, vwẹ Aikoniọm, kugbe vwi Listra, emuemu ri mi chirako rọye; yẹ Ọrovwohwo si vwe nẹ ayen ejobi.

¹² Uyota ihwo ejobi re guọnọ yere akpọ ọfuanfon rọ herọ vwi Kristi Jesu ke kpokpo,

¹³ yẹ ihwo umwemwu kugbe otu ri muẹ odẹ kẹ oma re miovwẹ phihọ, e phiẹn yẹ a je ghwa phiẹn ayen.

¹⁴ Ẹkẹvuọvo vwọ kẹ wẹ, phi obọ phihọ obo ri wo nyori ru wọ nabọ segbuyota na, kirobo re wọ je riẹn ohwo rọ vwẹ ayen yono nwe na

¹⁵ nẹ ọke emọ wẹn rhe ọye wọ vwọ riẹn ọhe ọfuanfon na rọ sa kẹ aghwanre vẹ esivwo fiki rẹ esegbuyota kpahe Kristi Jesu.

¹⁶ Ọbe ọfuanfon na ejobi rẹ Ọghẹnẹ kpare erhi rẹ ihwo vwo si ọ vọnre vẹ erere kẹ uyono, ẹghwọkuo, ẹrhnẹrẹ phihọ, kugbe eyouo phihọ ọvwata,

¹⁷ rere ohwo rẹ Ọghẹnẹ vwọ gba, ra vwọ rhuẹrẹ kpahe kẹ iruo esiri.