2 Timoti 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Omamẹ rẹ Isodjẹ ri Kristi Jesu

¹ Wẹ, ọmọ mẹ, gba gan oma vwẹ ẹserọphẹ rọ herọ vwẹ evun ri Kristi Jesu,

² obo ru wo nyo mie vwe vwẹ irharo rẹ iseri buebu gba vwẹ ayen yono ihwo ri vwo esegbuyota re je sa vwẹ ayen yono ihwo efa rhe.

³ Re ẹkẹn oja wẹn kerẹ omamọ rẹ isodje ri Kristi Jesu.

⁴ Ọ vwo isodje ro phiẹ ofovwi ro de phi oma phihọ ọghrọrọn rẹ ihwo diodi-i, obo ro nẹ kẹ rere o vwo rn obo ri je ohwo ro reyerọ phihọ iruo.

⁵ A sa vwẹ erhu tughẹ ohwo rọ djonẹ-ẹ jokpa nẹ ọ yọnre urhi rẹ onẹ na.

⁶ Ọghwẹrẹ rọ dia ọgha ọwian re ka re orhọ rẹ ekankọn rọye.

⁷ Roro obo re me ta na, kidie Ọrovwohwo re sa kẹ wẹ ẹruọ vwi kemu kemu.

⁸ Karohọ Jesu Kristi, ro vrẹn nẹ ughwu, ro nẹ uvwiẹ ri Devid rhe, kirobo re ghwoghwori vwẹ iyẹnrẹ esiri mẹ,

⁹ iyẹnrẹ esiri ri nu vwi fiki rọye reoja na ra vwọ vwẹ igoni kanre ovwẹ kerẹ ozighẹ. Ẹkẹvuọvo a sa vwẹ igoni kanre ota rẹ Ọghẹnẹ-ẹ.

¹⁰ Fiki rẹ ọtiọye na ki mi chiri kemu kemu fiki rẹ ihwo ra sano reyọ na, rere ayen se vwo esivwo rọ herọ vwẹ evun ri Kristi Jesu rọ vẹ urinrin ri bẹdẹ na gba yan usun.

¹¹ Ọta na muẹro; Ọ da dianẹ avwanre vẹ ọye gbe ghwu kugbe, avwanre vẹ ọye ke je rhọ kugbe,

¹² ọ da dianẹ avwanre vẹ ọye chiri, avwanre vẹ ọye ke je reuvie kugbe; avwanre da siọn, ko je sen avwanre;

¹³ ọ da dianẹ avwanre vwo esegbuyota-a dede, yo vwo esegbuyota kidie ọ sa sen omaobọ rọye-e.

Oruiruo rẹ jirẹ

¹⁴ Karohọ ayen kpahe ọnana, rere wo ji urhi kẹ ayen vwẹ obaro rẹ Ọrovwohwo nẹ ayen vwẹ eta na phra aphro-o, aphro ro fi emuọvo-o, ẹkẹvuọvo yọ de guọghọ udu rẹ ihworinyoro.

¹⁵ Ru obo rẹ udu wẹn ghare re wọ vwẹ oma wẹn kẹ Ọghẹnẹ kerẹ ohwo ọvo ra jẹreyọ, ọwena rẹ oma jẹvuọ, rọ nabọ yọnre ota rẹ uyota na.

¹⁶ Kẹnoma ke ọpata, kidie ọ cha nẹrhẹ ihwo dje oghighiru eruo,

¹⁷ ota rayen hrẹ kerẹ ora rọ vwọre. Himneọs kugbe Filetọs je hẹ ohri rẹ ihwo na,

¹⁸ ri ghwru nẹ uyora na ri yono nẹ evrenushi na wan vrẹn nure. Ayen re miovwẹ esegbuyota rẹ otu evo.

¹⁹ Ẹkẹvuọvo uchivwo rẹ ota rẹ Ọghẹnẹ na mudia kokoroko, oka nana ri nene. Ọrovwohwo riẹn otu re dia ọrọye, E jẹn ohwo kohwo ro se odẹ rẹ Ọrovwohwo siohọ nẹ orukuruku.

²⁰ Vwẹ evun rẹ uwevwi rode ọ dia ekuakua rẹ oro eyẹ idọnọ ọfuanfon ọvo re dia-a ẹkẹvuọvo irhe je dia rhe kugbe ekpẹn, evo ra vwẹ obọ tete evo i re vwo gbe otọ.

²¹ Ọ da dianẹ ohwo vwẹ obọ tete oma rọye, kọ dia omamọ rẹ ekuaka re mu ọghọ kẹ, re ruru fuanfon rẹ ọnini rẹ uwevwi na vwo ruẹ emu, ra vwọ choma hẹrhẹ iruo esiri.

²² Vwẹ ọtiọye na gbe siobọ nẹ unuavwerhe rẹ ọkeemọ rere wo nene ovwata, esegbuyota, ẹguọnọ, kugbe ufuoma, re wọ vwọ ba ayen otu ri se odẹ rẹ Ọrovwohwo nẹ otọ rẹ udu rhe.

²³ Wo nene ẹkpa, rhurhu phra aphro-o; wọ riẹnre nẹ i fi ẹghwọ.

²⁴ Ọdibo rẹ Ọrovwohwo dia ohwo rẹ ẹghwọ-ọ ẹkẹvuọvo o nẹ aruẹdọn kẹ ohwo kohwo, oyono vẹ aghẹghẹ, ro vwo odiri,

²⁵ rọ vwẹ aghwanre bru otu re ghwọ uche. Ọke ọvo Ọghẹnẹ me sa kẹ ayen ekuorhẹriẹ re da rhe mrẹ uyota na vughe,

²⁶ rẹ ayen da rhe vabọ rẹ ufi rẹ idẹbono, vwẹ ọke ro de muo vwo ru ọhọre rọye nu.