2 Tẹsalonaika 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uyere

¹ Ọbe ri Pọl, Silvanọs, kugbe Timoti, si rhe ishọshi rẹ Ọghẹnẹ Ọsẹ rẹ avwanre kugbe Ọrovwohwo Jesu Kristi, rọ hẹ obi Tẹsalonaika:

² Ẹserọphẹ kẹ ovwan kugbe ufuoma ro nẹ obọ rẹ Ọghẹnẹ Ọsẹ na kugbe Ọrovwohwo Jesu Kristi.

Orhiebro vwẹ Echa ri Kristi

³ Ọ gba avwanre ohọre imoni, re a kpẹvwẹ Ọghẹnẹ kẹ ovwan kọke kọke, kirobo ro fori, fikiridie esegbuyota rẹ ovwan ra rhua phihọ, kugbe ẹguọnọ rẹ ovwan ohwohwo vwọ kẹ ohwo re buẹ phihọ rhe.

⁴ Vwẹ ọtiọye na ekpuyovwi rẹ avwanre ke vwẹ ovwan yan eyan vwẹ evun rẹ ishọshi rẹ Ọghẹnẹ obo rẹ ovwan mudia gan te kugbe esegbuyota rẹ ovwan vwẹ evun rẹ imu rẹ ovwan kugbe ukpokpogho rẹ ovwan chirako rọye.

⁵ Ọnana kẹ iseri rẹ ẹdjọ rẹ ọvwata rẹ Ọghẹnẹ, rere e vwo se ru ovwan fo kẹ uvie rẹ Ọghẹnẹ, rẹ ovwan vwi fiki rọye reoja na–

⁶ rẹ Ọghẹnẹ vwo roro nẹ o fori rere ọ vwẹ oja re ayen otu ri gbe oja kẹ ovwan ria na,

⁷ rere ọ rha vwẹ omaerovwo kẹ avwanre vẹ ovwan re hẹ ukpokpogho na, vwẹ ọke ra da cha vwẹ Ọrovwohwo Jesu vẹ emakashe rọye ride na re la kerẹ ẹkuerhanre phia nẹ odjuvwu rhe,

⁸ kọ cha vwẹ ayen otu re riẹn Ọghẹnẹ-ẹ reihri kugbe ayen otu ti jẹ ọghọ emuo kẹ iyẹnrẹ esiri rẹ Ọrovwavwanre Jesu.

⁹ Kẹ ayen cha reoja rẹ ehwe kugbe ẹghwọrọ ri bẹdẹ ka djẹ ayen nẹ obaro rẹ Ọrovwohwo kugbe urinrin rẹ ẹgba rọye.

¹⁰ Vwẹ ọke rẹ ihwo efuanfon rọye da cha vwẹ ejiro kẹ vwẹ ẹdẹ yena, ko gbe ayen unu siẹ rẹ ayen da mrẹ otu ri segbuyota na, fikiridie iseri rẹ avwanre se kẹ ovwan na we sere gbuyota.

¹¹ Fiki rẹ ọnana na avwanre vwọ rẹ kẹ ovwan kọke kọke, rere Ọghẹnẹ rẹ avwanre se ru ovwan fo kẹ use rọye, rere o vwo se ru iroro kiroro esiri rọ jẹ kpahe ovwan gba kugbe iruo rẹ esegbuyota vwẹ ogangan rọye,

¹² Rere e vwo se jiri odẹ rẹ Ọrovwavware Jesu vwẹ evun rẹ ovwan, ra rha wan oma rẹ ovwan jiro, kirobo rẹ ẹserọphẹ rẹ Ọghẹnẹ rẹ avwanre epha kugbe Ọrovwohwo Jesu Kristi.