2 Samuẹl 9 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Devid ni Arodọvwẹ ri Mẹfiboshẹt

¹ Devid da ta, a rha sa mrẹ ohwo ọvo ro chekọ vwẹ uwevwi ri Sọl, re mi ru ẹse kẹ fiki ri Jonatan?

² Asakiephana odibo ọvo ọ hẹ uwevwi ri Sọl re se Ziba. Ọke re vwo se rhe Devid, ovie da nọ, Wẹ Ziba? Etiyin ọ da ta, Etiọye ese odibo wẹn.

³ Etiyin ovie da ta, a rha sa mrẹ ohwo ọvo vwẹ uwevwi ri Sọl re mi ru ẹse rẹ Ọghẹnẹ kẹ? Ziba da ta kẹ ovie, Jonatan vwo ọmọ ọvo, ukpono oruẹ.

⁴ Ovie da ta kẹ, Kọ rhọ? Etiyin ọ da ta kẹ ovie, ọ hẹ uwevwi ri Machir, ọmọ ri Ammiel vwi Lodehar.

⁵ Ọye ovie Devid de ji ohwo ra reyọ nẹ uwevwi ri Machir rhe, rẹ ọmọ ri Ammiel nẹ Lodebar rhe.

⁶ Mefiboshet rẹ ọmọ ri Jonatan, rẹ ọmọ ri Sọl, de bru Devid rhe, o de she bọvwọn opharo rhuotọ vwẹ ọghọ kẹ ovie. Devid da ta, Mefiboshet, ọ da kpahe, Odibo wẹn na.

⁷ Devid da ta kẹ, Wọ djẹ oshọ-ọ; kidie mi dje aruẹdọn kẹ wẹ fiki ri Jonatan rẹ ọsẹ wẹn, ke me vwẹ etọ ri Sọl ọsẹ wẹn ejobi kẹ wẹ, ku wọ re emu vwẹ imẹjẹ mẹ kọke kọke.

⁸ Ọ da nuẹ uyovwi kpotọ kẹ, ọ da ta, Ono odibo wẹn, ri wo niso ọtiọye, mẹvwẹ rọ pha kerẹ orivwi rẹ eranko na.

⁹ Etiyin ovie de se Ziba odibo ri Sọl, ọ da ta kẹ, Obo ri rhe Sọl ejobi kugbe uwevwi rọye ejobi Me vwẹ ayen kẹ ọmọ rẹ onini wẹn.

¹⁰ Wẹ vẹ emọ wẹn kugbe idibo wẹn ki voro otọ na vwọ kẹ, ku wọ ghwẹ emu rẹ otọ na vwọ rhe, rere ọmọ rẹ onini wẹn vwọ mrẹ emu re; ẹkẹvuọvo Mefiboshet rẹ ọmọ rẹ onini wẹn kọ re emu kọke kọke vwẹ imẹjẹ mẹ. Asakiephana Ziba vwo emọ ihwiori kugbe idibo uje.

¹¹ Etiyin Ziba da ta kẹ ovie, Kirobo rẹ ọrovwovwe ovie ji odibo wẹn ejobi, ọye odibo wẹn ru. Ọye Mefiboshet da re emu vwẹ imẹjẹ ri Devid, kerẹ ọvo vwẹ usun rẹ emọ rẹ ovie na.

¹² Mefihoshẹt vwo ọmọshare orere ọvo re se Mika. Ihwo re dia uwevwi ri Ziba ejobi de hirhe idibo ri Mefiboshẹt.

¹³ Etiyin Mefiboshẹt da dia Jerusalẹm; kidie ọ re emu kọke kọke vwẹ imẹjẹ rẹ ovie. Fikiridie ukpono o ruẹ.