2 Samuẹl 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Devid ra reyọ Ekpeti na rhe

¹ Devid da rhuẹrẹ ihwo rẹ Izrẹl ra sanọre koko, ọ da dia uriori ọgban.

² Devid de vrẹn ọ vẹ ihwo na ejobi da yan kpo Baale-juda, ra reyọ ekpeti rẹ Ọghẹnẹ ra vwẹ odẹ rẹ Ọrovwohwo rẹ otuofovwi se ro tidia enu ri chẹrobim.

³ Ayen de mu ekpeti rẹ Ọghẹnẹ na phihọ enu rẹ akpẹrẹ rẹ awọ ẹne ọkpokpọ, e de muo nẹ uwevwi rẹ Abinadab rọ hẹ enu rẹ ugbenu; Uzza kugbe Ahio emeshare rẹ Abinadab, keye ghorie akpẹrẹ ọkpokpọ na,

⁴ ro mu ekpeti rẹ Ọghẹnẹ na; Ahio da ka obaro kẹ ekpeti na.

⁵ Devid vẹ uwevwi rẹ Izrẹl ejobi, ki gbe eha vwẹ obaro rẹ Ọrovwohwo vẹ egba rayen ejobi, vẹ ine isorogun vẹ ekpata vẹ ewanre vẹ igogo vẹ ekuakua.

⁶ Ọke rẹ ayen rhi vwo te uwevwi re ewuye ri Nakọn, Uzza da riẹn obọ vwọ yọnrọn ekpeti rẹ Ọghẹnẹ na kidie irhuẹn na sheri.

⁷ Ophu de mu Ọrovwohwo kpahe Uzza; Ọghẹnẹ da ghwiẹ etiyin kidie ọ vwẹ obọ rọye te ekpeti na; o de ghwu vwẹ etiyin vwẹ oma rẹ ekpeti rẹ Ọghẹnẹ na.

⁸ Ivun de miovwo Devid fikiridie Ọrovwohwo ghwiẹ Uzza; e de se asan na Pẹrẹzuzza rhi te nonẹ na.

⁹ Oshọ rẹ Ọrovwohwo de rhi mu Devid vwẹ ẹdẹ yena, ọ da ta, Mavọ ekpeti rẹ Ọrovwohwo na se vwo bru vwe rhe?

¹⁰ Devid gbe ghwa rhọvwe nẹ ekpeti rẹ Ọrovwohwo na rhe orere ri Devid na-a; ẹkẹvuọvo Devid de muo kpo uwevwi rẹ Obededọm ohwo ri Git.

¹¹ Ekpeti rẹ Ọrovwohwo na da dia uwevwi rẹ Obededọm ohwo ri Git emeranvwe erha; Ọrovwohwo da vwẹ ẹrhovwo kẹ Obededọm vẹ evwruwevwi rọye.

A reyọ Ekpeti na rhe Jerusalẹm

¹² A da rhe vuẹ ovie Devid nẹ, Ọrovwohwo bruphihọ kẹ evwrnwevwi rẹ Obededọm kugbe emu ro vwori ejobi, fiki rẹ ekpeti rẹ Ọghẹnẹ na. Devid da yanran re mu ekpeti rẹ Ọghẹnẹ na nẹ uwevwi rẹ Obededọm kpo otorho rọye vẹ omavwerhe.

¹³ Ọke rẹ ihwo ri mu ekpeti rẹ Ọrovwohwo na da jẹn owọ esan kpo obaro, ọ me vwẹ erhuẹn rẹ ọshare tubie tubie ze izobo.

¹⁴ Devid de gbe eha vwẹ obaro rẹ Ọrovwohwo vẹ egba rọye ejobi; Devid de ku ibuluku rẹ esada phihọ.

¹⁵ Etiyin Devid vẹ ihwo rẹ Izrẹl ejobi da reyọ ekpeti rẹ Ọrovwohwo na rhe vẹ edo vẹ ihwohworo rẹ ọgban.

¹⁶ Eriyin ekpeti rẹ Ọrovwohwo de rhi te otorho ri Devid, Mikal rẹ ọmọtẹ ri Sọl da wan ovakpo ni ovie Devid ro vwo gbe eha vwẹ obaro rẹ Ọrovwohwo vẹ ọjẹfia vwẹ udu rọye.

¹⁷ Ayen de mu ekpeti rẹ Ọrovwohwo na a da nabọ rhuẹrẹ phihọ ẹdia rọye, vwẹ evun rẹ utughẹ ri Devid rhuẹrẹ kẹ. Devid de ze izobo rẹ ẹtorhẹ o de ze izobo rẹ ufuoma kẹ Ọrovwohwo.

¹⁸ Ri Devid vwọ torhẹ izobo nu kugbe izobo rẹ ufuoma na nu, ọ da nẹ ẹrhovwo kẹ ihwo na ejobi vwẹ odẹ rẹ Ọrovwohwo rẹ ofovwi na.

¹⁹ Etiyin ọ da vwẹ ikara vẹ eranvwe vwọ kẹ ohwo ọvuọvo, te aye te ọshare, ọtiọye ọ je vwẹ udi kẹ ayen, ayen ki rhi kpo dohwo duwevwi rọye.

²⁰ Devid vwo rhivwi te uwevwi ọ da vwẹ ẹrhovwo kẹ ihwo rọye. Ẹkẹvuọvo Mikal rẹ ọmọtẹ ri Sọl da rhe vwa Devid ọ da ta, Mavọ ovie rẹ Izrẹl vwo ọghọ kẹ oma rọye te nonẹ, rọ vwọ ban oma phihọ nonẹ vwẹ obaro rẹ idibo rọye rẹ eya o gbi rhe vwo omẹvuọ-ọ kerẹ omohwo diodi;

²¹ Devid da ta kẹ Mikal, Obaro rẹ Ọrovwohwo rọ jẹn vwẹ reyọ yan jẹ ọsẹ wẹn vwo kugbe ihwo rọye ejobi ni me re ovie vwẹ enu rẹ ihwo rọye Izrẹl: me sa ghọghọ vwẹ obaro rẹ Ọrovwohwo.

²² Mi ji vwẹ oma mẹ kpotọ nọ ọtiọna, Me je guọnọ nẹ me vwẹ oma gbotọ kẹ wẹ; ẹkẹvuọvo vwẹ obaro rẹ emetẹ rẹ wọ ta na, oma rayen e de mu ọghọ kẹ vwẹ.

²³ Mikal rẹ ọmọtẹ ri Sọl gbi vwo ọmọ rhi te nonẹ na-a.