2 Samuẹl 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A vwi Devid ma ovie rẹ Izrẹl

¹ Etiyin orua rẹ Izrẹl ejobi de bru Devid rhe vwi Hebrọn, ayen da ta, Nighe, avwanre ubeku wẹn vẹ uvwo wẹn.

² Dẹvure, rẹ Sọl vwọ hẹ ovie vwẹ enu rẹ avwanre, we ri je sun Izrẹl ruafe, we ji sun ayen ro uwevwi. Ọrovwohwo da ta kẹ wẹ, Wẹ re cha dia osuigodẹ rẹ ihwo mẹ Izrẹl; wẹ re je cha dia ovie vwẹ enu rẹ Izrẹl.

³ Ọye ekpako rẹ Izrẹl ejobi de bru Devid rhe vwi Hebrọn; ọye ovie Devid rẹ ayen da re ọphọ vwi Hebrọn vwẹ obaro rẹ Ọrovwohwo, ayen da vwi Devid mu ovie vwẹ enu rẹ Izrẹl.

⁴ Devid ẹgbukpe ọgban vwẹ ọke rọ vwọ re ovie; ọ da re ovie ẹgbukpe ujuvẹ.

⁵ Ọ re ovie vwẹ enu ri Juda vwi Hebrọn ẹgbukpe ighwrẹ gbe emeranvwe esan vwi Jerusalẹm; ọ da re ovie ẹgbukpe ọgban gbe erha vwẹ Izrẹl vi Juda.

Devid phi Zayọn reyọ

⁶ Ovie vẹ ekru rọye de kpo Jerusalẹm ra họnre ihwo ri Jẹbus, ihwo ri vwo otọ na da ta kẹ Devid, Wọ cha rhe obonẹ-ẹ, ẹkẹvuọvo irhuẹro vẹ ikpono djẹ wẹ yanran; ayen roro nẹ Devid sa ruo-o.

⁷ Yẹ ẹkẹvuọvo Devid ghene sa ro asan ọgangan ri Zayọn na, kọye e se otorho ri Devid.

⁸ Devid da ta vwẹ ẹdẹ yena, kohwo kohwo rọ họnre Jebus e jo pho ugbo na vrẹn ro hwe ikpono vẹ irhuẹro ri tu erhi ri Devid oma na. Fiki rẹ ọtiọye a da tanẹ e gbi jẹn ikpono vẹ irhuẹro na gbe rha ro uwevwi-i.

⁹ Ọye Devid da dia asan ọgangan rẹ ofovwi sa rua-a na, o de se otorho ri Devid. Devid da bọn orere na riariẹ nẹ Millo ra ro evun rọye.

¹⁰ Etiyin Devid da rhe rho phihọ, Ọrovwohwo rẹ Ọghẹnẹ rẹ otuofovwi na, vọye da herọ.

Hiram mrẹ Devid vaghe

¹¹ Etiyin Hiram rẹ ovie ri Taya de ji ikọn bru Devid ọ da vwẹ igẹdu, kugbe ewena vẹ ihwo re bọn uwevwi vwo rhe.

¹² Devid da rhe riẹn nẹ Ọrovwohwo vwẹ ọye re ovie vwẹ enu rẹ Izrẹl nure; ọ da rha kpare uvie rọye kpenu fiki rẹ ihwo rọye Izrẹl.

Emọ ri Devid re vwiẹri vwi Jerasalẹm

¹³ Devid da rhe jẹn ẹsen buebu, ọ da rhe reyọ eya vwi Jerusalẹm ro vwo nẹ Hebrọn rhe nu, Devid de vwiẹ emeshare vẹ emetẹ;

¹⁴ Edẹ rẹ emọ rọye re vwiẹ ki Devid vwi Jerusalẹm da dia Shamua, Shohah, Natan, Solomọn,

¹⁵ Ibhar, Elishua, Nepheg, Japhia,

¹⁶ Elishama, Eliada, kugbe Eliphẹlẹt.

Devid phi ihwo ri Filistia kua

¹⁷ Ọke ri Filistia vwo nyo nẹ a vwi Devid re ovie vwẹ enu rẹ Izrẹl, Filistia ejobi da yanran ra guọnọ Devid, ẹkẹvuọvo Devid de nyo ota na, ọye ọ da yanran kpo asan ọgangan na,

¹⁸ Filistia da ghare oma phihọ iyara ri Refaim.

¹⁹ Devid da nọ vwẹ obọ rẹ Ọrovwohwo, Mi nene Filistia họnre? Wo phi ayen phihọ obọ mẹ? Ọrovwohwo da ta kẹ Devid, Ra họnre ayen, kidie mi ghine phi Filistia phihọ obọ wẹn nure.

²⁰ Devid de kpo Baalperazim, etiyin Devid de phi ayen kparobọ; ọ da ta, Ọrovwohwo hra ivwighrẹ mẹ kerẹ ame ro ku asan. Fiki rẹ ọtiọye e de se odẹ rẹ etiyin na Baalperazim.

²¹ Filistia da yan jẹn ema rayen vwo etiyin, Devid vẹ ihwo rọye de mu ayen yanran.

²² Filistia da rhuẹrẹ rhe, ayen da ghare oma phihọ iyara ri Refaim.

²³ Ọke ri Devid vwọ nọ vwẹ obọ rẹ Ọrovwohwo, Mi nene ayen họnre, Ọ da ta nẹ, Wọ ra-a; yanran kpo obuko rayen rere wo re vwrẹ ayen aro phihọ vwẹ obaro rẹ urhe ri Balsam na.

²⁴ Ọke wo de nyo edo rẹ oyan vwẹ enu rẹ irhe ri Balsam na, wo mi Jẹjẹ oma wẹn; kidie Ọrovwohwo ka obaro kẹ wẹ re hwe otuofovwi ri Filistia nure.

²⁵ Devid de ru obo rẹ Ọrovwohwo ta kẹ o de hwe Filistia ni Geha re te Gẹzer.