2 Samuẹl 22 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Une rẹ Esivwo ri Devid

¹ Devid da ta kẹ Ọrovwohwo eta rẹ une nana vwẹ ẹdẹ rẹ Ọrovwohwo vwo si ayen nẹ obọ rẹ ivwighrẹ rọye ejobi kugbe obọ ri Sọl.

² Ọ da ta, Ọrovwohwo oragha mẹ odjahọ mẹ vẹ ọ ro si vwe,

³ Ọghẹnẹ mẹ, oragha mẹ, evun wẹ mi de sioma nu, ekpọfia mẹ, vẹ owanre rẹ arhọ mẹ, asan ọgangan mẹ kugbe asan mi de sioma nẹ, osivwi mẹ; wo si vwe nẹ ogidi.

⁴ Me kpare unu se Ọrovwohwo ro fo ejiro, o de si vwe nẹ obọ rẹ ivwighrẹ mẹ.

⁵ Kidie ọgbogho rẹ ughwu riariẹ ovwẹ phihọ, ọkẹre rẹ okpetu ke vwe phihọ;

⁶ uruhrẹ rẹ orho rẹ igbẹphẹre gba vwẹ ufi rẹ ughwu gbere obaro mẹ.

⁷ Vwẹ evun rẹ ukpokpogho mi de kperi se Ọrovwohwo; mi de bunu se Ọghẹnẹ mẹ. Nẹ obo uwevwi rọye Ọ de nyo urhuru mẹ, ukpere mẹ de te erhọn rọye.

⁸ Etiyin otọ na de phieghe o de kpogho: uchivwo rẹ irharheghe na da phariẹ, o de kpogho fikiridie ophu muo,

⁹ ivwirhi de bru nẹ evun rọye rhe kpenu, erhanre rọ torhẹ de nẹ unu rọye rhe;

¹⁰ Ọ nuẹ irharheghe te otọ o de wo rhe; ebri hwi ọ hẹ obotọ rẹ awọ rọye.

¹¹ Ọ gua vwẹ enu rẹ chẹrub enu rọye o da rhan; a da mrẹ vwẹ ibekpe rẹ odju.

¹² Ọ ma ebri riariẹ oma egedege rọye, okpan rẹ ivwirhi deghe, ame rọ ghwẹ koko.

¹³ Nẹ unu rẹ elo vwẹ obaro rọye, imwe rẹ erhanre da la phia.

¹⁴ Ọrovwohwo vanre nẹ obo odjuvwu rhe, Ọ ro Mekpenu ejobi ta ota.

¹⁵ Ọ sa edada yanran, Ọ da hra ayen, agbraran da vẹn ayen.

¹⁶ Etiyin a da rhe mrẹ idjerhe rẹ urhie, uchivwo rẹ akpọ na da fa phia, vwẹ ekan rẹ Ọrovwohwo, vwẹ ovan ro nẹ inwe rẹ Ọrovwohwo rhe.

¹⁷ Ọ riẹn obọ nẹ obenu rhe, rhe reyọ ovwẹ, O si vwe nẹ ame buebu.

¹⁸ Ọ sivwi uvwe nẹ obọ rẹ ọvweghrẹ mẹ rọ ganre, nẹ obọ rẹ ihwo ri tuoma mẹ. kidie ayen ganọ kẹ vwẹ,

¹⁹ Ayen bru vwe rhe vwẹ ẹdẹ rẹ ukpokpogho mẹ; ẹkẹvuọvo Ọrovwohwo re sẹro mẹ.

²⁰ Ọ vwo vwẹ kpo asan ro phẹre; o si vwe, fikiridie mi je.

²¹ Ọrovwohwo, hwa osa kẹ vwẹ kerẹ ọtiobo rẹ ẹfuọn mẹ epha, kerẹ ọtiobo rẹ abọ mẹ fonro ọtiọye ọ hwa osa kẹ vwẹ te.

²² Kidie mi nene idjerhe rẹ Ọrovwohwo Me rha vwẹ umwemwu vrẹn nẹ obọ rẹ Ọghẹnẹ mẹ-ẹ.

²³ Urhi rọye ọ obaro mẹ, mi ji bioma nẹ iji rọye-e.

²⁴ Mi vwo ekan vwẹ obaro rọye-e, mi sioma mẹ nẹ abe.

²⁵ Fiki rẹ ọtiọye na Ọrovwohwo hwa osa kẹ vwẹ kirobo rẹ ẹfuọn mẹ epha, kerẹ ọtiọbo rẹ obọ mẹ fonro vwẹ obaro rọye.

²⁶ Vwọ kẹ ihwo ri fuevun nene uvwe, ọye wọ je ghwa vwẹ evuesiri wẹn nẹ, vwọ kẹ ohwo ro vwo eka-an ọye wọ je ghwa dia ohwo ro jẹ ekan evwo kẹ;

²⁷ vwọ kẹ ohwo rọ fonro, ọye wo ji ru oma fuanfon kẹ, vwọ kẹ ihwo rẹ egbẹnẹkẹ ka je vwẹ egbẹnẹkẹ nẹ ayen.

²⁸ Wo sivwi ihwo re vwẹ oma kpotọ, ẹkẹvuọvo ẹro wẹn ọ hẹ enu rẹ uyovwi rẹ ihwo re kpare oma kpenu re wọ vwọ nyẹ ayen kpotọ.

²⁹ E wẹ hẹ urhukpẹ mẹ E Ọrovwohwo, kugbe Ọghẹnẹ mẹ, phi orẹmrẹ phihọ ebri mẹ.

³⁰ E, vwẹ oma wẹn me sa guọghọ otuofovwi, vwẹ oma rẹ Ọghẹnẹ mi se pho igbẹhẹ vrẹn,

³¹ Idjerhe rẹ Ọghẹnẹ nana gbare; iveve rẹ Ọrovwohwo vwẹ uyota phia, ọye odjahọ kẹ ihwo re djẹ bro rhe ri sioma nu.

³² Kono Ọghẹnẹ, ẹkẹvuọvo ọ dia Ọrovwohwo? ono oragha, jokpa rẹ Ọghẹnẹ rẹ avwanre?

³³ Ọghẹnẹ nana asan odjahọ mẹ o de ru idjerhe mẹ yovwi.

³⁴ Ọ ru owọ mẹ kerẹ owọ rẹ uzo o de mu vwe phihọ asan ro kpenu.

³⁵ Ọ yono abọ mẹ obo re phi ofovwi, me vwọ sa nuẹ umurhabọ rẹ ẹrovwo.

³⁶ Wọ je vwẹ ekpọfia rẹ esivwo wẹn kẹ vwẹ ọchuko wẹn nẹrhẹ ovwẹ rho,

³⁷ Wọwẹ kẹ vwẹ asan ọhẹhẹre ri mi chiyi wan, awọ mẹ gbe sa ghworiẹ-ẹ.

³⁸ Me vwọ tua ivwighrẹ mẹ, Me da guọghọ ayen, mi gbi rhivwi kpo uko bẹsiẹ me vwọ ghwọrọ ayen ejobi nu-u.

³⁹ Me ghwọrọ ayen, mi duvwu ayen fi, o gbi jẹ ayen vrẹn ọfa-a; ayen she phihọ obotọ rẹ awọ mẹ.

⁴⁰ Wọwẹ vwẹ ogangan rhuo vwe vwọ kẹ ofovwi, Wẹ ri ru ihwo re ghwiẹ vwẹ hwe she teye obotọ mẹ.

⁴¹ Wọ nẹrhẹ ivwighrẹ mẹ chuko ku vwe, ihwo ri tuoma mẹ, me da guọghọ ayen.

⁴² Ayen guọnọre, ẹkẹvuọvo a mrẹ ohwo ro sivwi aye-en; Ayen kperi se Ọrovwohwo, ẹkẹvuọvo ọ kpahe kẹ aye-en.

⁴³ Mi de hwe ayen vworovworo kerẹ iwurhie rẹ otọ, mi de rhe chiyi ayen muoto kerẹ ibehre rẹ urhuvwu.

⁴⁴ Kidie wẹ ri sivwe nẹ oseghe rẹ ihwo na; ihwo re me jẹ riẹ-ẹn ke ga vwẹ.

⁴⁵ Erhorha ki churu mu vwe; ayen de nyo urhuru mẹ, kẹ ayen mu ọghọ kẹ vwẹ.

⁴⁶ Oshọ mu erhorha ayen da rhe vẹ ophariẹ nẹ asan odjahọ rayen rhe.

⁴⁷ Ọrovwohwo na herọ; ebruba kẹ oragha mẹ, Ọghẹnẹ rẹ oragha rẹ esivwo mẹ ka kpenu.

⁴⁸ Ọghẹnẹ re choja kẹ vwẹ, Kọye vwẹ ihwo kpotọ kẹ vwẹ.

⁴⁹ Ọghẹnẹ ro si vwe nẹ obọ rẹ ivwighrẹ mẹ; Wọ da kpare ovwẹ kpenu nọ ivwighrẹ mẹ, wẹ ri si vwe nẹ obọ rẹ ihwo ri gidi gidi,

⁵⁰ Fiki rẹ ọtiọna, ke me kpare owẹ kpenu E Ọrovwohwo, Vwẹ ohri rẹ ẹgborho na, me so, ine rẹ ejiro kẹ odẹ wẹn.

⁵¹ Ephio kparobọ rode ọ vwọ kẹ ovie rọye ọ da vwẹ ẹguọnọ rọ jerhẹrie vwọ kẹ ovie rọye, kẹ Devid vẹ uvwiẹ rọye bẹdẹ.