2 Samuẹl 21 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A vwẹ Ihwo ri Gibiọn reihri

¹ Etiyin owẹvwe de rhi fi vwẹ ọke ri Devid vwẹ ẹgbukpe erha, nẹ ukpe ra ro ukpe; Devid da guọnọ Ọrovwohwo mrẹ. Ọrovwohwo da ta, Abe rẹ ọbara ọ hẹ enu rẹ Sọl vẹ evwruwevwi rọye, kidie o hwe ihwo ri Gibiọn.

² Ọtiọye o de se ihwo ri Gibiọn. Asakiephana ihwo ri Gibiọn dia emọ rẹ Izrẹli-i, ẹkẹvuọvo ayen uchokotọ rẹ emọ ri Amọr; jẹ ihwo rẹ Izrẹl duvwu iyori nẹ e jẹn ayen vwo. Sọl da guọnọ ayen hwe fiki rẹ erhiori rayen vwori kẹ emọ rẹ Izrẹl vi Juda.

³ Devid da ta kẹ ihwo ri Gibiọn, Die mi kẹ ovwan? Mavọ mi ru re ohọre vwo she ovwan re wa nẹ ẹrhovwo kẹ ireuku rẹ Ọrovwohwo?

⁴ Ihwo ri Gibiọn na da ta kẹ, ọ dia ota rẹ idọnọ vẹ oro ọye hẹ uvwre avwanre kugbe Sọl vẹ uwevwi rọye-e Avwanre je guọnọ ohwo ri Izrẹl hwe-e. Ọ da ta, Die wa tare ni mi ru kẹ ovwan?

⁵ Ayen da ta kẹ ovie, Ohwo rọ guọghọ avwanre, rọ jẹn iroro kpahe avwanre nọye hwe avwanre, rere avwanre vwo jẹn ẹdia evwo vwẹ ubrakpọ rẹ Izrẹl,

⁶ E jẹn emọ rọye ighwrẹ vwọ kẹ avwanre rere me churu ayen si vwẹ obaro rẹ Ọrovwohwo vwẹ ugbenu rẹ Ọrovwohwo vwi Gibiọn. Ovie da ta, Me vwọ kẹ ayen.

⁷ Ẹkẹvuọvo ovie da yan ji Mefiboshẹt rẹ ọmọ ri Jonatan vwo, fiki rẹ iveve rẹ Ọrovwohwo rọ uherevie rayen, rọ hẹ uvwre ri Devid vi Jonatan rẹ ọmọ ri Sọl,

⁸ Ovie da reyọ emeshare ivẹ rẹ emọ ri Rizpah ọmọtẹ rẹ Aiah, ro vwiẹ kẹ Sọl. Armoni kugbe Mefiboshẹt; kugbe emeshare iyori ri Merab ọmọtẹ ri Sọl ro vwiẹ kẹ Adriel ọmọ ri Barzillai ri Meholat.

⁹ O de phi ayen phihọ obọ rẹ ihwo ri Gibiọn ayen de churu ayen si vwẹ enu rẹ ugbenu vwẹ obaro rẹ Ọrovwohwo, ayen ighwrẹ na de ghwu siẹvo. Edẹ rẹ ẹsosuọ re vwo vuẹ orhọ ọye e vwo hwe ayen vwẹ ẹtuọhọ rẹ orhọ ri bali.

¹⁰ Etiyin Rizpah rẹ ọmọtẹ rẹ Aiah da reyọ esiso ọ da hwa enu rẹ oragha na, nẹ ẹsosuọ rẹ orhọ ẹriọ re duvwu ẹdẹ rẹ ẹsosuọ rẹ osio vwọ rhọ phihọ enu rayen, o jẹn emephran rha mu ayen vwẹ uvọ yẹrẹ eranvwe rẹ aghwa vwẹ ọke rẹ aso-on.

¹¹ Ọke ra vwọ ta kẹ Devid obo ri Rizpah rẹ ọmọtẹ rẹ Aiah, rẹ ọsen ri Sọl ruru.

¹² Devid da yanran ra reyọ ibeku ri Sọl kugbe ọ ri Jonatan rẹ ọmọ rọye mie ihwo ri Jabesh Gilead ri cho ayen ne urhuvwu ri Betshan, asan rẹ ihwo ri Filistia de churu ayen si, vwẹ ẹdẹ rẹ ihwo ri Filistia vwo hwe Sọl vwi Gilboa.

¹³ Ọ reyọ ibeku ri Sọl vi Jonatan rẹ ọmọ rọye nẹ etiyin, ayen da ghwẹ ibeku rẹ ihwo re churu si na koko.

¹⁴ Ayen de shi ibeku ri Sọl vẹ ọ ri Jonatan rẹ ọmọ rọye e de shi ayen phihọ otọ ri Bẹnjamin vwi Zilah vwẹ ushi ri Kish rẹ ọsẹ rọye. Ayen de ru emu ejobi rẹ ovie ta kẹ ayen nẹ ayen ru. E vwo ru ọyena nu Ọghẹnẹ de nyo orẹ rayen kẹ otọ na.

Abishai si Devid nẹ abo rẹ Arhuaran

¹⁵ Filistia vẹ ihwo rẹ Izrẹl da rhoma ri phi ofovwi, Devid da ghwẹ idibo rọye koko ra họnre Filistia; oma da ghwọrọ Devid.

¹⁶ Ishbibẹnọh, rọ dia ọmọ rẹ Arhuaran, ẹhọhọ rẹ oshuẹ rọye da dia ujori erha ri shekẹl rẹ ẹrovwo, a da vwẹ ọlọkọ ọkpokpọ vwọ choma, o de roro nẹ ọye hwe Devid.

¹⁷ Ẹkẹvuọvo Abishai ọmọ ri Zeruiah da chuko, ọ da họnre ohwo ri Filistia na hwe. Ihwo ri Devid da rẹ Devid, Wo gbi nene avwanre kpo ofovwi ọfa-a, wo de rhe furhie urhukpẹ rẹ Izrẹl;

Ihwo ri Devid hwe Erhuaran na

¹⁸ Ọna vwọ wan nu, ode rhi nene Fihstia phi ofovwi vwi Gọb; etiyin Sibbekai re Hushat de hwe Saph ọvo vwẹ emọ rẹ arhuaran na.

¹⁹ Ofovwi ọfa de rhe she vẹ ihwo ri Filistia vwi Gọb, Ọye Elhanan ọmọ ri Jaareorejim ohwo ri Bẹtlẹhẹm de hwa Golayat rẹ ohwo ri Git rẹ oshuẹ rọye e pha kerẹ urhe re vwo rhuo amwa.

²⁰ E de rhe phi ofovwi ọfa vwi Gat, ohwo ọvo rọ rhoro, o de vwo irhiabọ esan vẹ irhiawọ esan, ayen ejobi da dia uje gbe ẹne. jẹ ohwo ro ji nẹ uvwiẹ rẹ erhuanran rhe.

²¹ Ọke rọ vwọ vwẹ Izrẹl jehwẹ nu Jonatan rẹ ọmọ ri Shimẹi, omoni ri Devid, de hwe.

²² Ihwo ẹne nana nẹ uvwiẹ rẹ erhuanran ri Gat rhe; ayen da wan obọ ri Devid kugbe obọ rẹ idibo rọye.